អ្នកឯកទេសមួយរូបបាននិយាយថា ការញ៉ាំអាហារដែលសំបូរទៅដោយជាតិសរសៃគឺជម្រុញដោយភាពប្រសើរឡើងដល់ប្រព័ន្ធរំលាយអាហារ, ហើយវាក៏ល្អផងដែរដល់សុខភាពបេះដូងរបស់អ្នក។
ជូឌី ហ្គីគ្រីស (Jody Gilchrist) ដែលមកពីសាកលវិទ្យាល័យ Alabama បាននិយាយថា អាហារជាតិសរសៃដែលមាននៅក្នុងផ្លែឈើ, បន្លែជាដើមនោះត្រូវបានបង្ហាញនៅក្នុងការស្រាវជ្រាវថាជួយបន្ថយជាតិកូឡេស្តេរ៉ុល។
ហ្គីលគ្រីសបាននិយាយថា អ្នកឯកទេសខាងចំណីអាហារភាគច្រើនបាននិយាយថា មនុស្សម្នាក់ត្រូវញ៉ាំអាហារដែលមានជាតិសរសៃអោយបាន២៥ក្រាមក្នុងមួយថ្ងៃ។ សមាគមន៍ជំងឺបេះដូងអាមេរិកក៏បានណែនាំថា ការញ៉ាំរៀងរាល់១.០០០កាឡូរីត្រូវញ៉ាំជាតិសរសៃអោយបាន១៤ក្រាម ហើយយ៉ាងហោចណាស់១០ក្រាមនៃជាតិសរសៃគួរតែបានមកពីជាតិសរសៃដែលរលាយ។
ជាតិសរសៃដែលរលាយធ្វើអោយអ្នកងាយឆ្អែតដែលជួយគ្រប់គ្រប់បរិមាណដែលអ្នកញ៉ាំ។ ការស្រាវជ្រាវបានបង្ហាញថា ជាតិសរសៃរលាយក៏ជួយបន្ថយកូឡេស្តេរ៉ុលអាក្រក់ LDL ផងដែរដោយរារាំងពីរបៀបដែលខ្លួនស្រូបយកជាតិកូឡេស្តេរ៉ុលនោះពីអាហារ។
ហ្គីលគ្រីសបាននិយាយថា អាហារសំបូរទៅដោយជាតិសរសៃរលាយរួមមាន សណ្តែក, បាយ, ក្រូច, ស្តប៊ឺរី និងផ្លែប៉ោមជាដើម។ ជាតិសរសៃដែលមិនរលាយបន្ថែមជាតិសរសៃនៅក្នុងអាហារដែលជួយការពារពីការទល់លាម និងជាជាតិសរសៃដែលជួយអោយប្រព័ន្ធរំលាយអាហារមានសុខភាពល្អច្រើនជាងគេបំផុត។ អាហារដែលសំបូរទៅដោយជាតិសរសៃមិនរលាយនេះរួមមាន ស្ពៃក្តោប, ការ៉ុត, សំបកផ្លែប៉ោម និងផ្កាខាត់ណា។
ហ្គីលគ្រីសបាននិយាយថា នៅពេលដែលទិញម្ហូបអាហារ, ត្រូវអានពីស្លាកសញ្ញានៃការណែនាំដោយប្រុងប្រយ័ត្ន។ អាហារទាំងនោះអាចមានបរិមាណខ្ពស់នៃជាតិស្ករ, សូដ្យូម ឬខ្លាញ់។
មធ្យោបាយមួយទៀតដើម្បីជម្រុញអោយទទួលទានជាតិសរសៃនោះគឺប្រើថ្នាំគ្រាប់ដែលជាតិសរសៃ។ ហ្គីលគ្រីសបាននិយាយថា សូមប្រាកដថា បង្កើនការទទួលទានជាតិសរសៃយឺតៗ និងផឹកទឹកអោយបានច្រើន៕