ការស្រាវជ្រាវថ្មីមួយបានបង្ហាញថា ស្ត្រីមានផ្ទៃពោះដែលលើសទម្ងន់ ឬធាត់គឺមានហានិភ័យខ្ពស់នៃការសម្រាលដោយការវះកាត់។
អ្នកស្រាវជ្រាវបានពិនិត្យមើលស្ត្រីជាង៥០.០០០នាក់នៅក្នុងប្រទេសនរវ៉េសដែលបានសម្រាលកូន។ ស្ត្រីដែលមានជំងឺព្រាយក្រឡាភ្លើង, ជំងឺលើសឈាម, ជំងឺទឹកនោមផ្អែម និងជំងឺសុកបាំងមាត់ស្បូន មិនត្រូវបានគេរាប់បញ្ចូលនៅក្នុងការស្រាវជ្រាវនេះនោះទេ។
ការស្រាវជ្រាវត្រូវបានចេញផ្សាយនៅក្នុងកាសែត Acta Obstetricia et Gynecologica Scandinavica។ស្ត្រីដែលលើសទម្ងន់ និងធាត់មុនមានផ្ទៃពោះ មានការកើនឡើងហានិភ័យនៃការសម្រាលកូនដោយការវះកាត់។ អ្នកដែលធាត់ខ្លាំង មានហានិភ័យខ្ពស់បំផុតនៃការសម្រាលកូនដោយការវះកាត់នេះ ហើយក៏មានការកើនឡើងហានិភ័យនៃការសម្រាលដោយការប្រើឧបករណ៍ជួយ។
អ្នកស្រាវជ្រាវក៏បានរកឃើញថា ស្ត្រីដែលបានឡើងទម្ងន់លើសពី១៦គីឡូក្រាមអំឡុងពេលមានផ្ទៃពោះមានការកើនឡើងហានិភ័យដោយគួរអោយកត់សម្គាល់នៃការសម្រាលកូនដោយការប្រើឧបករណ៍ជួយ និងការសម្រាលដោយការវះកាត់។ ការស្រាវជ្រាវគឺធ្វើតែនៅលើទម្ងន់របស់ស្ត្រីមុនពេលមានផ្ទៃពោះប៉ុណ្ណោះ។
ក្នុងឆ្នាំ ២០០៨, មនុស្សពេញវ័យ១,៤កោដិនាក់លើពិភពលោកគឺលើសទម្ងន់ និងជាង៥០០លាននាក់គឺធាត់, នេះដោយយោងតាមរបាយការណ៍របស់អង្គការសុខភាពពិភពលោក។ វេជ្ជបណ្ឌិត នីល ហាលដេន ម៉រគេន (Nils-Halvdan Morken) ដែលមកពីសាកលវិទ្យាល័យ Bergen បាននិយាយថា ជាមួយនឹងអត្រាប្រកាសអាសន្ននៃការធាត់, ការយល់ពីឥទ្ធិពលរបស់វាគឺជាបញ្ហាសុខភាពសំខាន់, ជាពិសេសចំពោះស្ត្រីដែលវ័យបន្តពូជ។
ម៉រគេនបានសរុបថា ទោះបីជាកត្តាដទៃទៀតអាចនាំអោយមានហានិភ័យខ្ពស់នៃការសម្រាលកូនដោយការវះកាត់ និងដោយការប្រើឧបករណ៍ជំនួយក៏ដោយ, ប៉ុន្តែគ្រូពេទ្យត្រូវការការធានានៃឥទ្ធិពលដែលការលើសទម្ងន់ និងធាត់អាចមានលើស្ត្រីមានផ្ទៃពោះ៕