បន្ទាប់ពីអាហ្វ្រិកខាងត្បូងបានផ្អាកកម្មវិធីចាក់ថ្នាំបង្ការរបស់ខ្លួន ដោយសារបារម្ភអំពីប្រសិទ្ធភាពរបស់វ៉ាក់សាំង AstraZeneca ក្នុងការប្រឆាំងនឹងវីរុសកូរ៉ូណាបំលែងខ្លួននោះ អង្គការសុខភាពពិភពលោក (WHO) បាននិយាយថាវ៉ាក់សាំងរបស់ក្រុមហ៊ុន AstraZeneca នៅតែមានសារៈសំខាន់ក្នុងការទប់ទល់នឹងជំងឺឆ្លងកូវីដ-១៩។
អ្នកដឹកនាំសម្ព័ន្ធភាពសម្រាប់ការត្រៀមបង្ការជំងឺរាតត្បាត និងជាសហដឹកនាំមណ្ឌលវ៉ាក់សាំង Covax ជាមួយ WHO និង Gavi ក្រោយពីវ៉ាក់សាំងរបស់ AstraZeneca ជួបឧបសគ្គជាច្រើន រួមទាំងសំណួរអំពីប្រសិទ្ធភាពរបស់វាសម្រាប់មនុស្សអាយុលើសពី ៦៥ ឆ្នាំ បាននិយាយថា “វាពិតជាលឿនពេកហើយក្នុងការបោះបង់ចោលវ៉ាក់សាំងនេះ”។
វ៉ាក់សាំង AstraZeneca បច្ចុប្បន្នគឺជាផ្នែកសំខាន់មួយនៃ Covax ដែលត្រូវបានបង្កើតឡើងដើម្បីផ្គត់ផ្គង់វ៉ាក់សាំងកូវីដ-១៩ និងធានាការចែកចាយប្រកបដោយសមធម៌នៅជុំវិញពិភពលោក។
វាមានចំនួនស្ទើរតែទាំងអស់នៃវ៉ាក់សាំងចំនួន ៣៣៧,២ លានដូស ដែល Covax កំពុងត្រៀមចាប់ផ្តើមដឹកជញ្ជូនទៅប្រទេសចំនួន ១៤៥ ក្នុងអំឡុងឆមាសទីមួយនៃឆ្នាំនេះ នៅពេលណាដែលវាទទួលបានការអនុញ្ញាតពី WHO ដែលរំពឹងផ្តល់ការអនុញ្ញាតនៅសប្តាហ៍ក្រោយ៕