ខណៈពេលដែលវប្បធម៌ជាច្រើនពេញចិត្តនឹងការដើរបែបសុភាព យឺតៗ នោះពិភពធម្មជាតិបែរជាឲ្យតម្លៃខ្ពស់ទៅអ្នកមានទម្លាប់ដើរលឿន។ អ្នកប្រហែលជាមិនដឹងទេថា គ្រាន់តែដើរលឿន អ្នកអាចអាយុវែងថែមដល់ ១៥ ទៅ ២០ ឆ្នាំ។
ការស្រាវជ្រាវបង្ហាញថា អាយុមធ្យមរបស់ស្ត្រីដែលដើរលឿន គឺ ៨៦,៧ ទៅ ៨៧,៨ ឆ្នាំ ក្នុងពេលបុរសដែលដើរលឿនមានអាយុមធ្យម ៨៥,២ ទៅ ៨៦,៨ ឆ្នាំ។ បើប្រៀបនឹង ស្ត្រីដែលដើរយឺតអាយុមធ្យមមានប្រមាណ ៧២,៤ ឆ្នាំ ហើយបុរសគឺ ៦៤,៨ ឆ្នាំ ។
គិតទៅ ស្ត្រីដើរលឿនអាយុវែងជាងអ្នកមានដំណើររមទម្យដល់ទៅ ១៥ ឆ្នាំ ។ ចំពោះបុរស តួលេខ គឺជាង ២០ ឆ្នាំ គួរឲ្យភ្ញាក់ផ្អើល។ លើសពីនេះទៅទៀត ទោះបីអ្នកដើរលឿនរូបនោះ លើសទម្ងន់ ឬ មានជំងឺ ក៏គេនៅតែអាយុវែងជាងអ្នកដើរយឺត ។
អ្នកជំនាញការអំពីសកម្មភាពរាងកាយ បានឲ្យដឹងថា កត្តាឥទ្ធិពលដល់អាយុច្បាស់លាស់បំផុត ដែលគេសង្កេតឃើញ គឺហានិភ័យជំងឺសរសៃឈាមបេះដូង ។ ក្រុមមនុស្សដើរយឺតបំផុត មានហានិភ័យស្លាប់ដោយសារជំងឺសរសៃឈាមបេះដូងខ្ពស់ជាង ២ ដង ប្រៀបនឹងអ្នកមានជំហានដើររហ័សរហួនបំផុត៕