អាហ្វ្រិកខាងត្បូងបានអះអាងកាលពីម្សិលមិញនេះថា ខ្លួននឹងផ្អាកការចាប់ផ្តើមចាក់វ៉ាក់សាំងកូវីដ-១៩ របស់ក្រុមហ៊ុន AstraZeneca ។ ការសម្រេចផ្អាកនេះ បានធ្វើឡើងក្រោយការសិក្សាមួយបានបង្ហាញថា វ៉ាក់សាំងនេះ មិនបានការពារករណីស្រាល និងមធ្យមនៃវីរុសកូរ៉ូណា ដែលបានកើតមានឡើងនៅក្នុងប្រទេសនោះ។
ការផ្អាកនេះ គឺជាឧបសគ្គចំបងមួយសម្រាប់ប្រទេសនេះ ប៉ុន្តែក្រុមមន្ត្រីបាននិយាយថា ការផ្តល់វ៉ាក់សាំងពីក្រុមហ៊ុនផលិតផ្សេងទៀតនឹងអាចរកបានឆាប់ៗ។
សាកលវិទ្យាល័យមួយ ដែលរៀបចំការសាកល្បងវ៉ាក់សាំងនេះ បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា វ៉ាក់សាំងរបស់ AstraZeneca ផ្តល់ការការពារតិចតួចបំផុតប្រឆាំងនឹងវីរុសកូរ៉ូណាបំលែងខ្លួនអាហ្វ្រិកខាងត្បូង ទោះជាវីរុសស្ថិតក្នុងកម្រិតស្រាលនិងមធ្យមក្តី។
ប៉ុន្តែ ទោះជាយ៉ាងណា នៅក្នុងឯកសារមួយដែលចេញផ្សាយនៅថ្ងៃចន្ទនេះ ក្រុមហ៊ុន AstraZeneca បានបញ្ជាក់ថា គ្មានអ្នកចាក់វ៉ាក់សាំងណាម្នាក់ក្នុងចំណោមមនុស្ស ២.០០០នាក់ វិវត្តរោគសញ្ញាធ្ងន់ធ្ងរនោះទេ។ ហេតុនេះ វានឹងនៅតែមានប្រសិទ្ធភាពលើជំងឺធ្ងន់ធ្ងរ ទោះបីជាទិន្នន័យមិនទាន់មានគ្រប់គ្រាន់ ដើម្បីធ្វើការវិនិច្ឆ័យច្បាស់លាស់ក៏ដោយ៕
