Join with Health.com.kh on Telegram

ភាគច្រើននៃពួកយើងសុទ្ធតែដឹងពីអត្ថប្រយោជន៍របស់ស៊ុតចំពោះសុខភាព ប៉ុន្តែប្រហែលជាមិនចាប់អារម្មណ៍ពីផលល្អៗរបស់វាទៅលើសម្រស់ឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើស៊ុតល្អអ្វីខ្លះទៅចំពោះសម្រស់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រើប្រាស់ស៊ុតរក្សាសម្រស់ ៖

១. បន្តឹងស្បែកតាមបែបធម្មជាតិ

អ្វីដែលអ្នកត្រូវធ្វើ គឺគ្រាន់តែលាយផ្នែកពណ៌សនៃស៊ុតជាមួយទឹកឃ្មុំ។ បន្ទាប់មកលាបម៉ាស្សាល្បាយលើស្បែកមុខនិងរងចាំរហូតដល់ស្ងួតសិន សឹមលាងសម្អាតចេញ។

២. ផ្ដល់សំណើមដល់សក់

អ្វីដែលអ្នកត្រូវការ គឺចេកទុំកិនម៉ដ្ឋចំនួនពាក់កណ្ដាល ផ្លែបឺរទុំកិនម៉ដ្ឋចំនួនម្ខាង ប្រេងអូលីវ ២ស្លាបព្រាកាហ្វេ និងស៊ុត ១គ្រាប់។ ចាប់ផ្ដើមដំបូងដោយលាយចេកនិងផ្លែបឺរចូលគ្នាសិន បន្ទាប់មកសឹមបន្ថែមស៊ុតនិងប្រេងអូលីវចូល។ កូរឱ្យសព្វ សឹមលាបម៉ាស្សាល្បាយលើសក់ដែលស្ងួតនិងរងចាំសម្រាប់រយៈពេលពី ១៥ ទៅ ៣០ នាទី។ លាងសម្អាតចេញជាមួយទឹកត្រជាក់។

៣​. លាងសម្អាតស្បែក

អ្វីដែលអ្នកត្រូវធ្វើ គឺគ្រាន់តែលាយប្រេងអូលីវ ១ស្លាបព្រាបាយជាមួយទឹកឃ្មុំក្ដៅឧណ្ហៗ ១ស្លាបព្រាបាយ និងស៊ុត ១គ្រាប់។ កូរឱ្យសព្វ សឹមលាបម៉ាស្សាល្បាយលើស្បែកមុខ។ រងចាំសម្រាប់រយៈពេលពី ១៥ ទៅ ៣០នាទី សឹមលាងសម្អាតចេញ។

៤. ផ្នែកពណ៌ស៊ុតជាមួយយ៉ាអួរ

រូបមន្តនេះនឹងជួយឱ្យស្បែកស្រស់ស្អាតដោយកម្ចាត់កោសិកាស្បែកងាប់ៗ។ អ្វីដែលអ្នកត្រូវធ្វើ គឺគ្រាន់តែលាយយ៉ាអួរ ១ ស្លាបព្រាបាយជាមួយផ្នែកពណ៌ស រួចបន្ថែមស្ករសចូលបន្តិច។ កូរឱ្យសព្វ សឹមលាបម៉ាស្សាល្បាយលើស្បែកមុខនិងក។ ម៉ាស្សាថ្នមៗសម្រាប់រយៈពេល ១០នាទី និងរងចាំសម្រាប់រយៈពេល ១០នាទីទៀត សឹមលាងសម្អាតចេញ។

៥. ផ្នែកពណ៌សនៃស៊ុតសម្រាប់លើកត្របកភ្នែក

អ្វីដែលអ្នកត្រូវធ្វើ គឺជាដំបូងត្រូវលាងសម្អាតត្របកភ្នែកឱ្យស្អាតជាមុនសិន និងជូតផ្ដិតថ្នមៗរហូតដល់ស្ងួត។ កូរវឹកផ្នែកពណ៌សនៃស៊ុតមួយគ្រាប់ឱ្យសព្វ សឹមប្រើប្រាស់សំឡីត្បារត្រចៀកជ្រលក់លាបផ្នែកពណ៌សនៃស៊ុតលើផ្នត់នៃត្របកភ្នែក។ រងចាំរហូតដល់ស្ងួត សឹមប្រើប្រាស់ក្រណាត់ស្អាតជ្រលក់ទឹកក្ដៅឧណ្ហៗជូតសម្អាតចេញ។

៦. សម្រាប់បំបាត់ស្នាមមុន

អ្វីដែលអ្នកត្រូវធ្វើ គឺគ្រាន់តែលាយផ្នែកពណ៌សនៃស៊ុតជាមួយទឹកក្រូចឆ្មារស្រស់ប្រហែល ២ ស្លាបព្រា។ អ្នកអាចបន្ថែមទឹកឃ្មុំចូលបន្តិចក៏បាន។ កូរវឹកគ្រឿងផ្សំទាំងអស់ឱ្យសព្វចូលគ្នា សឹមលាបម៉ាស្សាល្បាយលើស្បែកមុខ។ រងចាំសម្រាប់រយៈពេល ៣០ នាទី សឹមលាងសម្អាតចេញ។ រូបមន្តនេះក៏ជួយបន្តឹងស្បែកមុខផងដែរ។

៧. សម្រាប់ដោះស្រាយបញ្ហាអង្គែ

អ្វីដែលអ្នកត្រូវធ្វើ គឺគ្រាន់តែលាយផ្នែកពណ៌លឿងនៃស៊ុតពី ១ ទៅ ២ គ្រាប់ ជាមួយផ្លែបឺរម្ខាងក្នុងម៉ាស៊ីនកិនក្រឡុក។ ក្រោយពេលកិនក្រឡុកចូលគ្នាសព្វ សឹមប្រើប្រាស់ល្បាយលាបលើសក់ និងរងចាំសម្រាប់រយៈពេល ៣០នាទី។ លាងសម្អាតចេញជាមួយត្រជាក់ និងកុំភ្លេចកក់សក់ជាមួយសាប៊ូដូចពេលធម្មតា៕