មិនមែនអាហារកែច្នៃទាំងអស់សុទ្ធតែមិនល្អទេ ប៉ុន្តែភាគច្រើនមានផ្ទុកសារធាតុគីមីដូចជាសារធាតុរក្សាទុកបានយូរ គ្រឿងផ្សំបន្ថែមពណ៌ ក្លិន និងរសជាតិអាហារ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បន្ថែមពីនេះអាហារកែច្នៃក៏មានផ្ទុកជាតិសូដ្យូម ជាតិស្ករ និងខ្លាញ់ខ្ពស់ផងដែរ។ ថាតើនឹងមានបញ្ហាអ្វីកើតឡើងចំពោះសុខភាពរាងកាយប្រសិនបើអ្នកទទួលទានតែអាហារកែច្នៃរាល់ថ្ងៃសម្រាប់រយៈពេល ១សប្តាហ៍ពេញ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីបញ្ហាសុខភាពដែលអាចកើតឡើងប្រសិនបើអ្នកទទួលទានអាហារកែច្នៃជាប្រចាំ ៖

១. ឈឺចាប់សន្លាក់

អាហារកែច្នៃភាគច្រើនមានផ្ទុកសម្បូរទៅដោយសារធាតុគីមី ជាតិសូដ្យូម និងស្ករខ្ពស់ដែលអាចបង្កការរលាកក្នុងសន្លាក់នាំឱ្យឈឺចាប់បានយ៉ាងងាយ។ 

២. កើនទម្ងន់

អាហារកែច្នៃភាគច្រើនមានផ្ទុកសម្បូរទៅដោយជាតិស្ករ កាបូអ៊ីដ្រាត និងជាតិខ្លាញ់ដែលមិនល្អចំពោះសុខភាព។ នេះហើយជាមូលហេតុដែលការទទួលទានអាហារកែច្នៃ​គ្រប់ពេលអាចបណ្ដាលឱ្យងាយនឹងកើនទម្ងន់ហួសប្រមាណ។ ពិសេសប្រសិនបើអ្នកមិនធ្វើលំហាត់ប្រាណទៀងទាត់ថែមទៀត!

៣. ហើមពោះ

អាហារកែច្នៃមានផ្ទុកជាតិសូដ្យូមខ្ពស់ដែលអាចនាំឱ្យហើមពោះ។ ដូច្នេះដើម្បីជាការប្រសើរចូរព្យាយាមទទួលទានអាហារស្រស់ៗជំនួសវិញ ឬកម្រិតការទទួលទានអាហារកញ្ចប់និងជ្រើសរើសប្រភេទដែលមានផ្ទុកជាតិសូដ្យូមត្រឹម ៥០០ មីលីក្រាម ឬតិចជាងនេះ។

៤. ជាតិស្ករក្នុងឈាមឡើងខ្ពស់

មិនត្រឹមតែឡើងទម្ងន់ហួសប្រមាណប៉ុណ្ណោះទេ ប៉ុន្តែការទទួលទានអាហារកែច្នៃជាប្រចាំក៏បណ្ដាលឱ្យជាតិស្ករក្នុងឈាមឡើងខ្ពស់ផងដែរ! ជាតិស្ករខ្ពស់ក្នុងអាហារកែច្នៃបង្កើនហានិភ័យនៃជំងឺទឹកនោមផ្អែមប្រភេទទី ២។

៥. សម្ពាធឈាមឡើងខ្ពស់

អាហារកែច្នៃភាគច្រើនមានផ្ទុកសម្បូរទៅដោយជាតិសូដ្យូម ដូច្នេះប្រសិនបើទទួលទានជាប្រចាំវាងាយនឹងបណ្ដាលឱ្យអ្នកជួបបញ្ហាសម្ពាធឈាមឡើងខ្ពស់ជាមិនខាន។ អ្វីដែលគួរឱ្យបារម្ភថែមទៀតនោះ គឺសម្ពាធឈាមឡើងខ្ពស់បង្កើនហានិភ័យនៃជំងឺគាំងបេះដូង និងដាច់សសៃឈាមខួរក្បាល។

៦. ទល់លាមក

អាហារកែច្នៃគ្មានផ្ទុកជាតិសសៃឡើយ! នេះហើយជាមូលហេតុដែលងាយនឹងធ្វើឱ្យអ្នកជួបប្រទះបញ្ហាទល់លាមក ក៏ដូចជាហានិភ័យនៃជំងឺមហារីកពោះវៀនធំ។

៧. ហានិភ័យនៃជំងឺមហារីក

ក្រៅពីជំងឺមហារីកពោះវៀនធំហើយនោះ ការទទួលទានអាហារកែច្នៃជាប្រចាំក៏បង្កើនហានិភ័យនៃជំងឺមហារីកច្រើនប្រភេទផ្សេងទៀតផងដែរ។ ដូច្នេះដើម្បីជាការប្រសើរកុំទទួលទានអាហារកែច្នៃច្រើនពេក!

៨. បញ្ហាស្បែក

អាហារកែច្នៃមានផ្ទុកសម្បូរទៅដោយជាតិប្រៃ ឬអំបិលដែលអាចធ្វើឱ្យអ្នកមានអាការៈហើម។ អាហារប្រភេទនេះក៏ជាប្រភពនៃសារធាតុ nitrites ដែលបំផ្លាញកូឡាជែន និងភាពបត់បែនក្នុងស្បែកផងដែរ។ ការទទួលទានសាច់កែច្នៃក៏អាចធ្វើឱ្យស្បែកឆាប់ចាស់ជាងអាយុផងដែរ ដោយវាគ្មានផ្ទុកសារធាតុចិញ្ចឹមល្អៗដើម្បីទ្រង់ទ្រង់សុខភាពស្បែករក្សាភាពក្មេងជាងវ័យ។ ដូច្នេះដើម្បីជៀសផុតពីគ្រោះថ្នាក់ កុំទទួលទានអាហារកែច្នៃច្រើនពេក និងមិនត្រូវទទួលទានរាល់ថ្ងៃឡើយ។

៩. ខ្សោយការចងចាំ

ការទទួលទានអាហារមានផ្ទុកជាតិសូដ្យូម ឬអាហារប្រៃច្រើនពេក គឺមិនល្អសម្រាប់សុខភាពសម្ពាធឈាមនិងបេះដូងឡើយ។ លើសពីនេះទៅទៀតការទទួលទានអាហារមានជាតិសូដ្យូមច្រើនអាចបង្កផលប៉ះពាល់ដល់មុខងារនៃភាពយល់ដឹងរបស់ខួរក្បាលគួរអោយព្រួយបារម្ភ។ ដូច្នេះប្រសិនបើអ្នកចង់រក្សាបាននូវសុខភាពខួរក្បាល ក៏ដូចជាបេះដូងល្អប្រសើរ ចូរកាត់ប​​​ន្ថយ ឬបញ្ឈប់ការទទួលទានអាហារដែលមានផ្ទុកសម្បូរទៅដោយជាតិសូដ្យូម។ អាហារកែច្នៃក៏មិនល្អដូចគ្នា!  អាហារកែច្នៃច្រើនតែមានផ្ទុកនូវសារធាតុគីមីដែលអាចបង្កការរលាក និងបំផ្លាញដល់កោសិកាខួរក្បាល។ ចូរព្យាយាមទទួលទានបន្លែផ្លែឈើស្រស់ៗឱ្យបានច្រើនជំនួសវិញ៕