ភាគច្រើននៃពួកយើងប្រហែលជាស្គាល់ម្សៅ Baking soda ប៉ុន្តែប្រាកដជាមិនធ្លាប់ដឹងទេថាម្សៅពណ៌សៗនេះមានប្រយោជន៍ចំពោះសុខភាពសម្រស់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) អ្នកអាចរកទិញម្សៅ Baking Soda បានយ៉ាងងាយនៅតាមបណ្ដាផ្សារទំនើបនានា។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបប្រើប្រាស់ម្សៅ Baking Soda ថែរក្សាសម្រស់ ៖
១. សម្អាតស្បែកមុខ
អ្វីដែលអ្នកត្រូវធ្វើ គឺគ្រាន់តែលាយទឹកឃ្មុំ ២ស្លាបព្រាកាហ្វេជាមួយទឹកក្រូចឆ្មារស្រស់ ១ស្លាបព្រាបាយ និងម្សៅ Baking soda ២ ស្លាបព្រាបាយ។ កូរឱ្យសព្វ សឹមលាបម៉ាស្សាល្បាយលើស្បែកមុខ ក្រោយពេលលាងសម្អាតស្បែកមុខជាមួយហ្វូមដែលប្រើជាប្រចាំរួច។ រងចាំសម្រាប់រយៈពេល ១៥ នាទី សឹមលាងសម្អាតមុខចេញជាមួយទឹកក្ដៅឧណ្ហៗ។ កុំភ្លេចប្រើប្រាស់ផលិតផលផ្ដល់សំណើម ក្រោយពេលជូតសម្អាតមុខរួច។
២. កម្ចាត់មុនខ្មៅ
លាយម្សៅ baking soda ១ ស្លាបព្រាបាយជាមួយទឹកធម្មតាឱ្យក្លាយជាល្បាយខាប់ៗ។ លាបល្បាយលើច្រមុះនិងរងចាំរហូតដល់ស្ងួតល្អសម្រាប់រយៈពេល ១០ ទៅ ១៥ នាទី សឹមលាងសម្អាតចេញ។
៣. កម្ចាត់ស្នាមមុន
អ្វីដែលអ្នកត្រូវធ្វើ គឺគ្រាន់តែលាយម្សៅ Baking soda ២ ស្លាបព្រាបាយជាមួយទឹកធម្មតាបន្តិចរហូតក្លាយជាល្បាយខាប់ៗ។ លាបម៉ាស្សាល្បាយលើតំបន់ស្បែកមុខដែលទទួលរងផលប៉ះពាល់សម្រាប់រយៈពេលពី ២ ទៅ ៣ នាទី ហើយទុកចោលសម្រាប់រយៈពេល ៥ នាទី សឹមលាងសម្អាតចេញជាមួយទឹកធម្មតា។ រូបមន្តនេះក៏ជួយកម្ចាត់ជាតិខ្លាញ់និងកោសិកាស្បែកងាប់ៗចេញផងដែរ។
៤. ធ្វើឱ្យធ្មេញសជាងមុន
រូបមន្តនេះមិនត្រឹមតែជួយធ្វើអោយធ្មេញសប៉ុណ្ណោះទេ ប៉ុន្តែក៏ជួយកម្ចាត់កំណកកំបោរជាប់ធ្មេញផងដែរ! អ្វីដែលអ្នកត្រូវធ្វើ គឺគ្រាន់តែលាយម្ស៉ៅ baking soda ចំនួន ១ ស្លាបព្រាបាយជាមួយអំបិលមួយច្បិចដៃ ហើយដាក់ល្បាយនេះលើច្រាសដុសធ្មេញ រួចចាប់ផ្ដើមដុសសម្អាតធ្មេញរបស់អ្នកជាមួយល្បាយនេះដូចធម្មតាជាការស្រេច។ ទោះជាយ៉ាងណាមិនត្រូវដុសសម្អាតធ្មេញជាមួយម្ស៉ៅ baking soda លើសពី ១ ដង ក្នុងមួយសប្តាហ៍ឡើយព្រោះវាអាចបណ្ដាលឱ្យខូចកាចាធ្មេញ។
៥. សម្អាតសក់កម្ចាត់ក្លិនអាក្រក់
អ្វីដែលអ្នកត្រូវធ្វើ គឺលាយម្ស៉ៅ Baking soda ចំនួន ១ ស្លាបព្រាកាហ្វេក្នុងទឹកកន្លះពែង រួចកូរឱ្យសព្វ។ កក់សម្អាតសក់ដូចធម្មតាជាមុនសិន សឹមលាងសម្អាតជាចុងក្រោយជាមួយល្បាយ Baking soda ដែលបានលាយទុក។ បន្ទាប់មកលាងសម្អាតសក់ម្ដងទៀតជាមួយទឹកធម្មតាជាការស្រេច។ អនុវត្តម្ដងក្នុងមួយសប្តាហ៍។
៦. កម្ចាត់ក្លិនជើងមិនល្អ
អ្វីដែលអ្នកត្រូវធ្វើ គឺគ្រាន់តែលាយម្ស៉ៅ baking soda ចំនួន ១ ស្លាបព្រាបាយ ក្នុងក្ដៅឧណ្ហៗចំនួន ១ លីត្រ។ កូរឱ្យសព្វ សឹមត្រាំជើងក្នុងទឹកល្បាយសម្រាប់រយៈពេលពី ១៥ ទៅ ២០ នាទីជាការស្រេច។ ដើម្បីជាការប្រសើរ ចូររោយម្ស៉ៅ baking soda បន្តិចក្នុងស្បែកជើងមុនពេលអ្នកពាក់ចេញក្រៅដោយគ្មានស្រោមជើង។
៧. កម្ចាត់អង្គែ
អ្វីដែលអ្នកត្រូវធ្វើ គឺផ្សើមសក់ជាមុនសិន រួចរោយម្ស៉ៅ Baking soda លើសក់ ហើយម៉ាស្សាឱ្យដល់ស្បែកក្បាល។ ទុកចោលសម្រាប់រយៈពេល ១ នាទី សឹមលាងសម្អាតចេញ។ អ្នកក៏អាចកក់សក់ចេញដូចពេលធម្មតាផងដែរដើម្បីលាងជម្រះបានស្អាតសព្វ។
៨. កម្ចាត់ស្បែកខ្មៅត្រង់ក
លាយម្សៅ baking soda ជាមួយទឹកធម្មតារហូតក្លាយជាល្បាយខាប់ក្រាស់។ លាបល្បាយលើក ហើយទុកចោលសម្រាប់រយៈពេល ២០ នាទី ឬរងចាំរហូតដល់ស្ងួតទាំងស្រុង សឹមលាងសម្អាតចេញជាមួយទឹកត្រជាក់។ អនុវត្តឱ្យបានយ៉ាងហោចណាស់ ២ ដងក្នុងមួយសប្តាហ៍។
៩. ជួយឱ្យអណ្ដាតមានពណ៌ផ្កាឈូក
អ្វីដែលអ្នកត្រូវធ្វើ គឺគ្រាន់តែរោយម្សៅ Baking soda ខ្លះលើច្រាសដុសធ្មេញដែលសើមនិងប្រើប្រាស់វាដុសសម្អាតអណ្ដាត។ អ្នកក៏អាចលាយទឹកក្រូចឆ្មារស្រស់ប៉ុន្មានដំណក់ជាមួយម្សៅ Baking soda ផងដែរដើម្បីបង្កើនប្រសិទ្ធភាពនៃការសម្អាត។ ចុងក្រោយខ្ពុរមាត់ចេញជាមួយទឹកធម្មតាជាការស្រេច។
១០. កម្ចាត់ក្លៀកខ្មៅ
លាយម្ស៉ៅ Baking soda ជាមួយទឹកធម្មតាអោយក្លាយជាល្បាយខាប់ៗ រួចលាបដុសក្រោមក្លៀកក្នុងចលនាបែបរង្វង់យឺតៗសម្រាប់រយៈពេលប៉ុន្មាននាទីសឹមលាងសម្អាតចេញ។ ព្យាយាមអនុវត្តអោយបានពី ៣ ទៅ ៤ ដងក្នុងមួយសប្តាហ៍។
១១. ជួយបង្រួមរន្ធញើស
លាយម្សៅ Baking soda ២ ស្លាបព្រាបាយជាមួយទឹកធម្មតា ២ ស្លាបព្រាបាយ។ កូរឱ្យក្លាយជាល្បាយខាប់ៗ សឹមលាបម៉ាស្សាលើស្បែកមុខក្នុងបែបរង្វង់ និងរងចាំសម្រាប់រយៈពេល ១៥ នាទី សឹមលាងសម្អាតចេញជាមួយទឹកត្រជាក់៕