ការស្រាវជ្រាវថ្មីពីរបានប្រមានថា ការឡើងទម្ងន់ និងការផឹកស្រាច្រើនពេកអាចបណ្តាលអោយប៉ះពាល់ធ្ងន់ធ្ងរដល់ថ្លើម។
ការស្រាវជ្រាវមួយបានរកឃើញថា ស្ត្រីលើសទម្ងន់ ឬធាត់ដែលផឹកស្រាច្រើន មានការកើនឡើងហានិភ័យនៃការវិវត្ត និងស្លាប់ដោយសារជំងឺថ្លើម។ ការស្រាវជ្រាវដទៃទៀតក៏បានរកឃើញពីការកើនឡើងហានិភ័យនៃជំងឺមហារីកថ្លើមចំពោះអ្នកដែលមានជំងឺក្រិនថ្លើមដោយសារការផឹកស្រាដែលមានជំងឺខ្លាញ់រុំថ្លើម, ជំងឺទឹកនោមផ្អែមប្រភេទទី២ និងធាត់ផងដែរ។
ការស្រាវជ្រាវទីមួយបានមើលទៅលើស្ត្រីជាង១០៧.០០០នាក់នៅក្នុងចក្រភពអង់គ្លេស។ ពួកគេត្រូវបានគេចែកទៅតាមសន្ទស្សន៍នៃទម្ងន់ខ្លួនស្រាល និងធ្ងន់ និងអ្នកដែលផឹកស្រាតិច ឬច្រើន។ស្ត្រីដែលមានសន្ទស្សន៍នៃទម្ងន់ខ្លួនខ្ពស់ និងផឹកស្រាវច្រើនហាក់ដូចជាមានជំងឺថ្លើមរ៉ាំរ៉ៃជាងស្ត្រីដទៃទៀតនៅក្នុងការស្រាវជ្រាវ។
វេជ្ជបណ្ឌិត ដានីល ប្រាទី (Daniele Prati) បាននិយាយថា ការស្រាវជ្រាវនេះនឹងមានការប៉ះពាល់ទៅលើថាតើយើងអាចជួយមនុស្សជាច្រើនលាននាក់អោយឆ្លងកាត់ពីហានិភ័យនៃការវិវត្តទៅជាជំងឺថ្លើមនោះយ៉ាងដូចម្តេច។គាត់បានពន្យល់ថា ស្ត្រីគឺមានហានិភ័យខ្ពស់នៅពេលដែលពួកគេងាយនឹងមានការខូចខាតថ្លើមដោយសារតែការផឹកស្រា២ដងច្រើនជាងុបរស និងវិវត្តទៅជាទម្រង់ធ្ងន់ធ្ងរនៃជំងឺនេះដោយការផឹកតិច និងរយៈពេលខ្លីក៏ដោយ។
ប្រាទីបាននិយាយថា ដោយពឹងផ្អែកលើការស្រាវជ្រាវនេះ, យើងដឹងថា អ្នកដែលមានសន្ទស្សន៍នៃទម្ងន់ខ្លួនទាប និងផឹកស្រាច្រើនមានហានិភ័យខ្ពស់ក្នុងការវិវត្តទៅជាជំងឺថ្លើមរ៉ាំរ៉ៃបើធៀបទៅនឹងស្ត្រីដែលមានសន្ទស្សន៍នៃទម្ងន់ខ្លួនខ្យល់ដែលមិនផឹកស្រាច្រើននោះ។ គាត់បានបន្ថែមថា ការស្រាវជ្រាវបន្ថែមគឺជារឿងចាំបាច់ ប៉ុន្តែនេះគឺជាជំហ៊ានដំបូងសំខាន់ក្នុងការតម្រង់ទិសដៅដ៏ត្រឹមត្រូវមួយ។
ការស្រាវជ្រាវទី២បានមើលទៅលើអ្នកជំងឺ១០០នាក់ដែលមានហានិភ័យនៃជំងឺមហារីកថ្លើមដែលធ្វើការប្តូរថ្លើម ដោយសារតែពួកគេស្ថិតនៅក្នុងដំណាក់កាលចុងក្រោយនៃជំងឺថ្លើម។អ្នកស្រាវជ្រាវបានរកឃើញថា ជំងឺមហារីកថ្លើមបានកើតមានឡើង៥៤%នៃអ្នកជំងឺដែលលើសទម្ងន់ និង៤៣%នៃអ្នកដែលមានជំងឺទឹកនោមផ្អែម បើធៀប១៤%នៃអ្នកដែលមិនលើសទម្ងន់ និង២២%នៃអ្នកដែលមិនមានជំងឺទឹកនោមផ្អែមនោះ។៥០%នៃអ្នកជំងឺដែលមានជំងឺខ្លាញ់រុំថ្លើម និងលើសទម្ងន់, ធាត់ ឬមានជំងឺទឹកនោមផ្អែមប្រភេទទី២នោះ គឺមានជំងឺមហារីកថ្លើម បើធៀបទៅនឹង៦%នៃអ្នកដែលមិនមានជំងឺខាងលើនេះ។
ប្រាទីបាននិយាយថា ការស្រាវជ្រាវនេះបង្ហាញថា អ្នកជំងឺដែលទទួលរងពីជំងឺក្រិនថ្លើមដោយសារការផឹកស្រាដែលមានប្រវត្តិនៃជំងឺខ្លាញ់រុំថ្លើម, ធាត់ ឬជំងឺទឹកនោមផ្អែមប្រភេទទី២នោះ គឺមានហានិភ័យខ្ពស់ក្នុងការវិវត្តទៅជាជំងឺមហារីកថ្លើម។ លទ្ធផលនឹងមានប្រយោជន៍ដើម្បីផ្តល់ភាពប្រសើរឡើងក្នុងការគ្រប់គ្រងស្ថានភាពរបស់អ្នកជំងឺក្រិនថ្លើម ហើយដើម្បីកំណត់ពីដំណាក់កាលនៃជំងឺមហារីកផងដែរ៕