ស៊ុកកូឡា គឺមានផ្ទុកនូវសារជាតិ oxalate ដែលវាជាសមាសធាតុមានពីធម្មជាតិ នៅក្នុងកាកាវ ដែលវា អាចនឹងរារាំងដល់ ការបឺតស្រូបរបស់ជាតិកាល់ស្យូម។ តែទោះជាយ៉ាងណាក៏ដោយ ការវិនិច្ឆ័យថា តើ ស៊ុកកូឡាអាចបណ្តាលអោយមានបញ្ហា សម្រាប់មនុស្សដែលមានសុខភាពល្អ ដែលបានបរិភោគអាហារ ដែលសំបូរជាតិកាល់ស្យូមយ៉ាងណានោះ គឺមិនទាន់មានភាពច្បាស់លាស់នៅឡើយទេ។
ការព្រួយបារម្ភពីការបឺតស្រូបរបស់ជាតិកាល់ស្យូម និង សុខភាពរបស់ឆ្អឹង នេះគឺដោយយោងទៅតាម ការសិក្សាស្រាវជ្រាវមួយ ដែលបានធ្វើឡើងនៅក្នុងឆ្នាំ ២០០៨។ វាបានរកឃើញថា ស្ត្រីវ័យចំណាស់ ដែលបាន ទទួលទានស៊ុកកូឡា ១ដង ឬ ច្រើនជាងនេះ ក្នុងមួយថ្ងៃ គឺមានកំហាប់ និង សុខភាពឆ្អឹងចុះ ខ្សោយជាងស្ត្រីដទៃទៀត ដែលបានទទួលទានវាតិចជាងនេះ ។ ក្រុមអ្នកសិក្សាស្រាវជ្រាវជឿថា វាអាចកើតមានដោយសារតែ សារជាតិ oxalate ដែលបានរារាំងដល់ការបឺតស្រូបរបស់ជាតិកាល់ស្យូម ប៉ុន្តែវាក៏អាចដោយសារតែ បរិមាណជាតិស្ករ ដែលមានផ្ទុកនៅក្នុងស៊ុកកូឡានេះផងដែរ ដែលវាអាច កាត់បន្ថយដល់ការបញ្ចេញរបស់ជាតិកាល់ស្យូម ។
តែចំពោះផ្នែកជាវិជ្ជមានរបស់វា ស្ករស៊ុកកូឡាខ្មៅ ( ឬកាកាវ) មានផ្ទុកសារជាតិ flavonoids ដែលវា ត្រូវបានគេគិតថា វាមានអត្ថប្រយោជន៍ដល់សុខភាព។ វាតម្រូវអោយមានការសិក្សាបន្ថែមទៀត ដើម្បី ធ្វើការបញ្ជាក់អោយច្បាស់ពី មុខងាររបស់ស៊ុកកូឡា ដែលជះឥទ្ធិពលដល់ តុល្យភាព និង សុខភាពរបស់ឆ្អឹង ។
ទន្ទឹមនឹងនេះ ប្រសិនបើអ្នកបានទទួលនូវបរិមាណ នៃជាតិកាល់ស្យូម និង វីតាមីន D ត្រឹមត្រូវតាម ការណែនាំពីប្រភេទអាហារមួយចំនួន ឬ ថ្នាំគ្រាប់សារជាតិបន្ថែម ជាប្រចាំថ្ងៃ និង អនុវត្តផងដែរនូវ លំហាត់ប្រាណនៃការលើកទម្ងន់ នោះការទទួលទានស៊ុកកូឡា ក្នុងបរិមាណសមស្រប គឺហាក់នឹងមិន មានផលប៉ះពាល់អ្វីដល់ សុខភាពឆ្អឹងរបស់អ្នកទេ ៕