ភាគច្រើននៃពួកយើងសុទ្ធតែដឹងថាការទទួលទានការ៉ុត គឺល្អណាស់សម្រាប់ភ្នែក! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែតើអ្នកធ្លាប់ចាប់អារម្មណ៍ទេថាក្រៅពីការ៉ុតហើយនោះក៏នៅមានអាហារជាច្រើនផ្សេងទៀតដែលអាចផ្ដល់អត្ថប្រយោជន៍យ៉ាងប្រសើរសម្រាប់រក្សាសុខភាពភ្នែកដែរ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរទទួលទានដើម្បីរក្សាពង្រឹងសុខភាពភ្នែក ក៏ដូចជាទប់ស្កាត់បញ្ហាភ្នែកនានា ៖
១. ត្រីសម្បូរខ្លាញ់
បរិមាណខ្ពស់នៃអាស៊ីតខ្លាញ់អូមេហ្កា ៣ ដែលមានផ្ទុកក្នុងត្រីសម្បូរខ្លាញ់មិនត្រឹមតែល្អសម្រាប់សុខភាពសសៃឈាមបេះដូងប៉ុណ្ណោះទេ ប៉ុន្តែក៏ចាំបាច់ចំពោះសុខភាពភ្នែកផងដែរ។ អាស៊ីតខ្លាញ់អូមេហ្កា ៣ មានប្រសិទ្ធភាពទប់ស្កាត់បញ្ហាជំងឺភ្នែកឡើងបាយ ជំងឺខ្សោយភ្នែក ក៏ដូចជាជំងឺភ្នែកស្ងួត។
២. ស៊ុត
ស៊ុតមានផ្ទុកសារធាតុ zeaxanthin និង lutein ដែលចាំបាច់សម្រាប់រក្សាសុខភាពភ្នែកល្អប្រសើរនិងមើលឃើញបានច្បាស់ដោយការពារការចុះខ្សោយនៃសសៃបាតភ្នែក។ ប៉ុន្តែត្រូវប្រាកដថាអ្នកជ្រើសរើសទទួលទានស៊ុតធម្មជាតិដែលមានគុណភាពខ្ពស់ទើបទទួលបានអត្ថប្រយោជន៍ពេញលេញមិនប៉ះពាល់សុខភាព។
៣. បន្លែស្លឹកបៃតង
ជាប្រភពដ៏ប្រសើរនៃសារធាតុ zeaxanthin និង lutein ដែលមានប្រសិទ្ធិភាពខ្ពស់ជួយទប់ស្កាត់កាត់បន្ថយហានិភ័យនៃជំងឹភ្នែកឡើងបាយ និងជំងឺខ្សោយភ្នែកគួរឱ្យកត់សម្គាល់។ ដូច្នេះដើម្បីរក្សាបាននូវសុខភាពភ្នែកល្អប្រសើរ ចូរព្យាយាមទទួលទានបន្លែបៃតងឱ្យបានច្រើន។
៤. បន្លែផ្លែឈើស្រស់ៗចម្រុះពណ៌
រួមបញ្ចូលទាំងប៉េងប៉ោះ ការ៉ុត ស្ត្របឺរី ម្ទេសផ្លោក ពោត និងល្ពៅសុទ្ធតែជាប្រភពដ៏ប្រសើរនៃវីតាមីន A វីតាមីន C ក៏ដូចជាសមាសធាតុ carotenoids មានប្រសិទ្ធិភាពខ្ពស់ជួយកាត់បន្ថយហានិភ័យនៃជំងឺភ្នែកផ្សេងៗគួរឱ្យកត់សម្គាល់។
៥. ផ្លែបឺរ
ផ្លែបឺរមានផ្ទុកសម្បូរទៅដោយជាតិសសៃ dietary រួមទាំងជាតិទង់ដែង វីតាមីន K វីតាមីន C វីតាមីន D វីតាមីន B វីតាមីន E ប៉ូតាស្យូម សារធាតុ Sterols សារធាតុ Lutein និងសារធាតុប្រឆាំងអុកស៊ីតកម្មដែលជួយរក្សាតុល្យភាពនៃកម្រិតកូឡេស្តេរ៉ូលធ្វើឱ្យចរន្តឈាមរត់មានលក្ខណៈកាន់តែប្រសើរឡើង ពង្រឹងប្រព័ន្ធភាពស៊ាំរាងកាយ បង្កើនសុខភាពភ្នែក និងទប់ស្កាត់ជំងឺមហារីក។ វាក៏ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ដែលល្អសម្រាប់សុខភាពបេះដូងនិងខួរក្បាលផងដែរ។
៦. ទំពាំងបារាំង
វីតាមីន A នៅក្នុងទំពាំងបារាំង គឺជាសារធាតុអុកស៊ីតកម្មមួយដែលមានអត្ថប្រយោជន៍ណាស់សម្រាប់សុខភាពភ្នែក។ វីតាមីន A មានប្រសិទ្ធិភាពជួយទប់ស្កាត់ការបំផ្លាញដល់រ៉េទីនភ្នែក ក៏ដូចជាកាត់បន្ថយហានិភ័យនៃជំងឺភ្នែកផ្សេងៗផងដែរ។
៧. អាហារសម្បូរសារធាតុប្រឆាំងអុកស៊ីតកម្ម
សារធាតុប្រឆាំងអុកស៊ីតកម្មមានប្រសិទ្ធភាពកម្ចាត់រ៉ាឌីកាល់សេរី។ ជាលទ្ធផលកោសិកាសុខភាពល្អត្រូវទទួលបានការការពារ។ វីតាមីន C និងវីតាមីន E ជាសារធាតុប្រឆាំងអុកស៊ីតកម្មចាំបាច់ក្នុងចំណោមសារធាតុប្រឆាំងអុកស៊ីតកម្មទាំងអស់ដែលជួយការពារភ្នែក។
៨. អាហារសម្បូរស័ង្កសី
ស័ង្កសីក៏ល្អណាស់ដែរសម្រាប់សុខភាពភ្នែក។ កង្វះជាតិស័ង្កសី ភ្នែកនឹងមិនអាចទទួលបានវីតាមីន A គ្រប់គ្រាន់តាមតម្រូវការចាំបាច់ឡើយដែលជាលទ្ធផលនៃបញ្ហាការមើលចុះខ្សោយ។