ជំងឺមហារីកត្រូវបានគេចាត់ទុកថាជាគ្រោះមហន្តរាយមួយសម្រាប់ជីវិតមនុស្សនៅពេលកើតឡើងលើនរណាម្នាក់ហើយ។ ក្នុងចំណោមជំងឺមហារីកជាច្រើនប្រភេទ ជំងឺមហារីកប្លោកនោមភាគច្រើនកើតឡើងលើមនុស្សអាយុចាប់ពី ៦៥ឆ្នាំឡើយទៅ ហើយវាក៏ទំនងជាកើតមានលើមនុស្សប្រុសច្រើនជាងមនុស្សស្រីដែរ។
ដោយសារតែមហារីកផ្សេងៗទៀតដូចជា មហារីកសុដន់ និងស្បូនកើតមានជាញឹកញាប់លើមនុស្សស្រីនោះ ពួកគេអាចនឹងមើលរំលោងអាការៈ និងរោគសញ្ញាជំងឺមហារីកប្លោកនោមទៅវិញ។ មានស្ត្រីច្រើនណាស់ទំនងជាត្រូវបានគ្រូពេទ្យរកឃើញជំងឺមហារីកប្លោកនោមក្នុងដំណាក់កាលចុងក្រោយ ដោយសារតែមើលរំលោងអាការៈរបស់វា។
ដូច្នេះការ ស្វែងយល់ និងសិក្សាអំពីរោគសញ្ញាដំបូងៗនៃជំងឺមហារីកគ្រប់ប្រភេទគឺជារឿងសំខាន់បំផុត ដើម្បីកុំឲ្យមានផលវិបាកច្រើនបើសិនជាមិនបានព្យាបាល និងអាចព្យាបាលបានទាន់ពេលវេលាផង។
ខាងក្រោមនេះ ខ្ញុំនឹងបង្ហាញនូវសញ្ញាសំខាន់ៗដែលបញ្ជាក់អំពីជំងឺមហារីកប្លោកនោម ហើយក៏ត្រូវទៅជួបពេទ្យពិនិត្យដែរនៅពេលដឹងកំពុងតែមានអាការៈទាំងនេះ។
ទឹកនោមមានឈាម
សញ្ញាដ៏សំខាន់បំផុតនៃជំងឺមហារីកប្លោកនោមគឺមានឈាមក្នុងទឹកនោម ហើយក៏បានធ្វើឲ្យស្ត្រីភាគច្រើនមើលរំលងសញ្ញាព្រមានមួយនេះដែរ ព្រោះច្រឡំថា វាជាឈាមរដូវ ឬអាការៈនៃការរ៉ាំងរដូវ។
អាការៈជំងឺបង្ករោគនៅផ្លូវទឹកម៉ូត្រ
ជំងឺមហារីកប្លោកនោមអាចត្រូវបានមើលរំលងដោយសារតែរោគសញ្ញារបស់វាមានលក្ខណៈដូចគ្នានឹងការបង្ករោគនៅផ្លូវទឹកម៉ូត្រដែរ។ អាការៈទាំងនោះមានដូចជា នោមញឹក ចេះតែចង់ទៅនោម នោមឈឺ ឬនោមដោយមិនដឹងខ្លួន។ ដូច្នេះបើសិនជាអ្នកយល់ថា អាការៈទាំងនេះមិនចេះស្រាកស្រាន្តជាមួយនឹងការប្រើថ្នាំផ្សះទេ ចូរពិគ្រោះជាមួយគ្រូពេទ្យអំពីជំងឺមហារីកប្លោកនោមវិញទៅ។
ឈឺដោយគ្មានមូលហេតុ
ការឈឺចាប់ដោយគ្មានមូលហេតុគឺកើតឡើងនៅពេលដុំសាច់មហារីកក្លាយទៅជាដំណាក់កាលធ្ងន់ធ្ងរ។ តំបន់ដែលឈឺចាប់ខ្លាំងនោះគឺ ស្ថិតនៅត្រង់កណ្តៀតក្អម ពោះ និងអាងត្រគាក។ មហារីកក៏អាចរាលដាលទៅកន្លែងផ្សេងៗទៀតដែរដូចជា ឆ្អឹង (ដំណាក់កាលចុងក្រោយ) ដូច្នេះការឈឺក្នុងឆ្អឹងក៏ជាអាការៈមួយដែលមើលរំលោងដែរ។
បាត់បង់ចំណង់អាហារ
ការថយចុះចំណង់អាហារគឺជាអាការៈមួយដ៏សំខាន់នៃជំងឺមហារីកគ្រប់ប្រភេទ ជាពិសេសបើសិនជាវាលូតលាស់ខ្លាំង ឬរាលដាលទៅកន្លែងផ្សេងៗ។ ការដែលលែងឃ្លានអាហារ ជាមួយគ្នានឹងការអស់កម្លាំង និងស្រកទម្ងន់ភ្លាមៗ អាចជារឿងមួយត្រូវប្រកាសអាសន្នហើយ។
ជក់បារី
តាមការសិក្សាបានរកឃើញថា ៥០ភាគរយនៃស្ត្រីដែលរកឃើញជំងឺមហារីកប្លោកនោមគឺជាអ្នកជក់បារី។ ការជក់បារីគឺជាកត្តាប្រឈមមុខដ៏ធំបំផុតនៃជំងឺមហារីកប្លោកនោម ដូច្នេះ បើសិនជាអ្នកកំពុងតែជក់បារី ហើយមានអាការៈដូចបានរៀបរាប់ខាងលើហើយ ចូរទាក់ទងទៅគ្រូពេទ្យជាបន្ទាន់ទៅ៕