ទោះបីជាភាគច្រើននៃពួកយើងសុទ្ធស្គាល់និងឧស្សាហ៍ទទួលទានឈើអែម ប៉ុន្តែប្រហែលជាមិនធ្លាប់ដឹងទេថាគ្រឿងទេសនេះអាចផ្ដល់អត្ថប្រយោជន៍ល្អៗជាច្រើនចំពោះសក់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ថាតើឈើអែមអាចផ្ដល់ផលល្អៗអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រើប្រាស់ឈើអែមជួយបង្កើនសម្រស់សក់ ៖

១. ជួយឱ្យសក់ក្រាស់ជាងមុន

អ្វីដែលអ្នកត្រូវធ្វើ គឺគ្រាន់តែលាយស៊ុត ១គ្រាប់ ជាមួយប្រេងអូលីវសុទ្ធ ១ ស្លាបព្រាបាយ, ទឹកឃ្មុំឆៅ ១ស្លាបព្រាកាហ្វេ និងម្សៅឈើអែម ១ស្លាបព្រាកាហ្វេ ឱ្យសព្វចូលគ្នា។ បន្ទាប់មកលាបម៉ាស្សាល្បាយលើស្បែកក្បាល និងរងចាំសម្រាប់រយៈពេល ២០ ទៅ ៣០ នាទី សឹមលាងសម្អាតចេញជាមួយទឹកធម្មតា។ កុំភ្លេចកក់សម្អាតសក់ជាមួយសាប៊ូកម្រិតស្រាល។ អនុវត្តសារឡើងវិញ ២ដងក្នុងមួយសប្តាហ៍ រហូតទទួលបានលទ្ធផលគាប់ចិត្ត។

២. វាធ្វើឱ្យពណ៌ធម្មជាតិនៃសក់ស្រាលជាងមុន

អ្វីដែលអ្នកត្រូវធ្វើ គឺគ្រាន់តែលាយម្សៅឈើអែមក្នុងបរិមាណស្មើគ្នាជាមួយក្រែមបន្ទន់សក់ដែលអ្នកប្រើរាល់ដង។ ចូរលាបល្បាយលើសក់ពីគល់មកចុងក្រោយពេលកក់រួច។ បន្ទាប់មកសឹមពាក់មួកផ្លាស្ទិកគ្របសក់ឱ្យជិត។ រូបមន្តនេះសម្រាប់អនុវត្តមុនពេលចូលគេង និងលាងសម្អាតចេញនៅព្រឹកបន្ទាប់។

៣. សម្រាប់កម្ចាត់អង្គែ

អ្វីដែលអ្នកត្រូវធ្វើ គឺគ្រាន់តែលាយម្សៅឈើអែមជាមួយទឹកធម្មតាបន្តិចឱ្យក្លាយជាល្បាយខាប់ៗ។ បន្ទាប់មកលាបល្បាយផ្ទាល់លើស្បែកក្បាលនិងរងចាំសម្រាប់រយៈពេល ៣០នាទី សឹមលាងសម្អាតចេញ។ អនុវត្តរូបមន្តនេះជាប្រចាំរហូតទទួលបានលទ្ធផលគាប់ចិត្ត។ ដើម្បីកម្ចាត់អង្គែដែលបង្កឡើងដោយមេរោគផ្សិតកុំឱ្យកើតទៀត ចូររោយម្សៅឈើអែមបន្តិចលើសាប៊ូកក់សក់ និងម៉ាស្សាពេញលើសក់ ព្រមទាំងស្បែកក្បាល។ រងចាំរយៈពេលពី ២ ទៅ ៣ នាទី សឹមលាងសម្អាតចេញ។ អនុវត្តរូបមន្តនេះម្ដងក្នុងមួយសប្តាហ៍៕