សេចក្តីរាយការណ៍ថ្មីបានបង្ហាញថា ការញ៉ាំខ្លាញ់ត្រីជាប្រចាំដូចជាត្រីសាម៉ុង, ត្រីសាឌីនជាដើម អាចជួយបន្ថយហានិភ័យនៃជំងឺមហារីកសុដន់។
ត្រីទាំងនេះមានអាស៊ីតខ្លាញ់មួយប្រភេទដែលត្រូវបានគេស្គាល់ថា n-3 polyunsaturated fatty acids (PUFAs)។
ដូវ លី (Duo Li) ជាសាស្ត្រាចារ្យខាងផ្នែកចំណីអាហារ នៅសាកលវិទ្យាល័យ Zhejiang បាននិយាយថា ការកើនឡើងការញ៉ាំ n-3 PUFA មានឥទ្ធិពលការពារខ្ពស់ចំពោះជំងឺមហារីកសុដន់។
លី បានពិនិត្យមើលការស្រាវជ្រាវ២១ផ្សេងគ្នាដែលបានមើលពីការញ៉ាំត្រី និងអាស៊ីតខ្លាញ់ PUFAs។ ការស្រាវជ្រាវបានរាប់បញ្ចូលលើស្ត្រីជាង៨០០.០០០នាក់នៅក្នុងសហរដ្ឋអាមេរិក, អ៊ឺរ៉ុប និងអាស៊ី និង២០.០០០ករណីនៃជំងឺមហារីកសុដន់។ ការតាមដានមានភាពប្រែប្រួលចន្លោះពី៤ឆ្នាំ ទៅ២០ឆ្នាំ។
ការស្រាវជ្រាវថ្មីត្រូវបានចេញផ្សាយនៅក្នុងកាសែត BMJ។
ត្រីរួមមានប្រភេទទូទៅនៃ PUFAs ដែលត្រូវបានពាក់ព័ន្ធទៅនឹងព័ត៌មានទៅក្នុងខួរក្បាល, ជួយរក្សាសកម្មភាពរបស់សរសៃឈាម និងប្រព័ន្ធភាពស៊ាំ។ អាស៊ីតខ្លាញ់ក៏ត្រូវបានផ្សារភ្ជាប់ជាមួយនឹងអត្ថប្រយោជន៍សុខភាពដទៃទៀត ដូចជាបន្ថយហានិភ័យនៃបញ្ហាបេះដូងជាដើម។
ការស្រាវជ្រាវថ្មីៗនេះបានបង្ហាញពីលទ្ធផលអំពីឥទ្ធិពលការពារនៃអាស៊ីតខ្លាញ់ PUFAs ដែលត្រូវបានរកឃើញនៅក្នុងត្រី និងហានិភ័យនៃជំងឺមហារីកសុដន់។ ដូចនេះ លីបានសម្រេចធ្វើការវិភាគលើលទ្ធផលនៃការស្រាវជ្រាវទាំង២១ពីមុនម្តងទៀត។
នៅក្នុងការវិភាគរបស់គាត់, ការញ៉ាំប្រភេទអាស៊ីតខ្លាញ់ PUFAs ប៉ុន្តែមិនញ៉ាំត្រីទាំងមូលនោះទេ ត្រូវបានផ្សារភ្ជាប់ជាមួយនឹងការថយចុះហានិភ័យ។ ស្ត្រីដែលញ៉ាំអាស៊ីតខ្លាញ់ PUFAs ខ្ពស់ មានការថយចុះ១៤%នៃហានិភ័យនៃជំងឺមហារីកសុដន់។ ការស្រាវជ្រាវបានរកឃើញថា ការញ៉ាំអាស៊ីតខ្លាញ់០,១ក្រាមក្នុងមួយថ្ងៃ អាចបន្ថយហានិភ័យនៃជំងឺមហារីកសុដន់បាន៥%។
ដូចនេះ តើត្រីប៉ុន្មានដែលអ្នកគួរញ៉ាំនោះ? លីបាននិយាយថា ខ្លាញ់ត្រីមួយ ឬពីរក្បាលនៃត្រីចំពោះមនុស្សម្នាក់ក្នុងមួយសប្តាហ៍ត្រូវបានគេណែនាំ។
លីបាននិយាយថា គាត់មិនអាចពន្យល់ជាមួយនឹងការផ្សារភ្ជាប់គ្នារវាងអាស៊ីតខ្លាញ់ PUFAs និងការថយចុះហានិភ័យនៃជំងឺមហារីកសុដន់នោះទេ។ ក្នុងចំនោមភាពដែលអាចទៅរួចដទៃទៀត, គាត់បានលើកឡើងថា អាស៊ីតខ្លាញ់អាចជួយរក្សាសកម្មភាពនៃមូលេគុលដែលពាក់ព័ន្ធនឹងការលូតលាស់កោសិកា និងការរាលដាលនៃកោសិកាមហារីក។
វេជ្ជបណ្ឌិត ស្តេហ្វានី បឺរនីក (Stephanie Bernik) ជាប្រធានផ្នែកវះកាត់ជំងឺមហារីកនៅមន្ទីរពេទ្យ Lenox Hill បាននិយាយថា ទោះបីជាចំនួននៃស្ត្រីក្នុងការស្រាវជ្រាវមានទំហំធំក៏ពិតមែន, ប៉ុន្តែការផ្សារភ្ជាប់គ្នាបានរកឃើញចន្លោះពីការញ៉ាំអាស៊ីតខ្លាញ់ និងការថយចុះហានិភ័យនៃជំងឺមហារីកសុដន់នោះ គឺមិនបង្ហាញជាហេតុ និងផលនោះទេ។
អ្នកស្រាវជ្រាវដទៃទៀតបាននិយាយថា បន្ថែមពីលើការញ៉ាំអាស៊ីតខ្លាញ់ត្រី, ទម្លាប់នៃការធ្វើលំហាត់ប្រាណក៏ផ្តល់អត្ថប្រយោជន៍នៃការថយចុះហានិភ័យនៃជំងឺមហារីកសុដន់ផងដែរ៕