មានរបស់មួយចំនួនតូចក្នុងអាហារដែលវាជម្រុញឲ្យយើងញ៉ាំវាកាន់តែច្រើន ជាពិសេសរស់ជាតិ និងគ្រឿងផ្សំមួយចំនួនតែម្តង។ គ្រឿងផ្សំប្រភេទ រមៀត គ្រឿងការី ខ្ទឹមស ខ្ញី និងម្ទេស សុទ្ធតែត្រូវបានគេរកឃើញថា មានប្រយោជន៍ច្រើនចំពោះសុខភាពមនុស្សយើងតែម្តង។
បើសិនជាអ្នកមិនចូលចិត្តញ៉ាំអាហារហិរខ្លាំងទេ ហេតុផលទាំងអស់ខាងក្រោមនេះ ប្រហែលជាអាចជួយជម្រុញ និងលើកទឹកចិត្តដល់អ្នកដើម្បីបន្ថែមរសជាតិហិរបន្តិចបន្តួចទៅក្នុងអាហារអ្នកបានហើយ៖
ជួយឲ្យមានអាយុវែង
យោងទៅតាមការសិក្សាមួយដែលធ្វើឡើងដោយ Harvard and China National Center for Disease Contorl and Prevention បានឲ្យដឹងថា ការញ៉ាំអាហារហិរ ៦ទៅ៧ថ្ងៃក្នុងមួយសប្តាហ៍ ទោះបីជាមួយថ្ងៃក៏ដោយ ក៏អាចបន្ថយអត្រានៃការស្លាប់បាន ១៤ភាគរយដែរ។
ជួយបង្កើនល្បឿននៃការរំលាយអាហារ
យោងទៅតាមទិន្នន័យនៃការសិក្សាជាច្រើនបានបញ្ជាក់ថា គ្រឿងផ្សំធ្វើម្ហូបដូចជា រមៀត ម្រិច និងម្ទេស អាចជួយបង្កើនការរំលាយអាហារក្នុងពេលសម្រាក និងបន្ថយចំណង់អាហារថែមទៀត។ ការសិក្សាមួយក៏បានរកឃើញទៀតថា រមៀតជួយទប់ស្កាត់ការលូតលាស់របស់ជាលិកាខ្លាញ់ក្នុងសត្វកណ្តុរ។
ទប់ស្កាត់ការរលាក
សារធាតុ Curcumin ក្នុងរមៀត ប្រហែលជាជួយបន្ថយការរលាកក្នុងខ្លួនបាន។ សមាសធាតុប្រឆាំងការរលាករបស់ខ្ញី និងខ្ទឹមសត្រូវបានគេប្រើប្រាស់អស់រយៈពេលច្រើនសតវត្សន៍ទៅហើយក្នុងការព្យាបាលជំងឺជាច្រើនដូចជា ការរលាកសន្លាក់ ជំងឺប្រព័ន្ធភាពស៊ាំធ្វើការខុសប្រក្រតី ឈឺក្បាល និងចង្អោ។
ប្រឆាំងកោសិកាមហារីក
សារធាតុ Capsaicin ដែលជាសមាសធាតុដ៏សកម្មរបស់ម្ទេសប្លោកនោះ ត្រូវបានគេបង្ហាញថា អាចបន្ថយ និងបំផ្លាញកោសិកាមហារីកបាន។ តាមការសិក្សាមួយរបស់ UCLA បានរកឃើញថា សារធាតុ Capsaicin អាចទប់ស្កាត់ការលូតលាស់របស់កោសិកាមហារីកក្រពេញប្រូស្តាតក្នុងសត្វកណ្តុរខណៈពេលដែលវាមិនប៉ះពាល់ដល់កោសិកាដែលមានសុខភាពល្អឡើយ។
សម្លាប់បាក់តេរី
រមៀតត្រូវបានកេបង្ហាញថា មានអង់ទីអុកស៊ីង់ និងសារធាតុសម្លាប់មេរោគដ៏ខ្លាំងក្លា។ មានន័យថា វាអាចប្រើដើម្បីប្រឆាំងនឹងបាក់តេរីគ្រោះថ្នាក់ក្នុងខ្លួនមនុស្សយើងបាន៕