ការស្រាវជ្រាវថ្មីមួយបានរកឃើញថា ការលេងវីដេអូហ្គេមមួយចំនួនអាចជម្រុញអោយមានភាពបត់បែននៃការគិតរបស់មនុស្ស។
អ្នកស្រាវជ្រាវបានបង្ហាញថា ការស្រាវជ្រាវអាចនាំអោយមានការព្យាបាលថ្មីចំពោះអ្នកដែលមានការគ្រោះថ្នាក់លើខួរក្បាល ឬបញ្ហាដូចជា ជំងឺនៃការកង្វះការយកចិត្តទុកដាក់។
វេជ្ជបណ្ឌិត ប្រាយអេន ក្លាស (Brian Glass) បាននិយាយថា ការស្រាវជ្រាវពីមុនបានបង្ហាញថា សកម្មភាពរបស់វីដេអូហ្គេមអាចពន្លឿនដល់ការសម្រេចចិត្ត ប៉ុន្តែការស្រាវជ្រាវថ្មីៗនេះបានបង្ហាញថា យុទ្ធសាស្ត្រនៃហ្គេមអាចជម្រុញអោយមានសមត្ថភាពទៅនឹងការគិតលើការសិក្សាពីកំហុសពីមុន។
ចំពោះការស្រាវជ្រាវ, អ្នកស្រាវជ្រាវបានមើលទៅលើស្ត្រី៧២នាក់ដែលបានលេងវីដេអូហ្គេមអស់រយៈពេលតិចជាង២ម៉ោងក្នុងមួយសប្តាហ៍។ ការស្រាវជ្រាវមិនអាចរកពីអ្នកលេងដែលជាមនុស្សប្រុសដែលចំណាយពេលតិចក្នុងការលេងហ្គេមវីដេអូនោះទេ។
២/៣នៃអ្នកចូលរួមបានលេងទាំងវីដេអូហ្គេមស្រួលលេង និងវីដេអូហ្គេមដែលស្មុគស្មាញ ដូចជាហ្គេម StarCraft ដែលជាហ្គេមដែលអ្នកលេងត្រូវបង្កើន និងរៀបចំទ័ពដើម្បីប្រឆាំងនឹងសត្រូវ។ ១/៣នៃអ្នកចូលរួមបានលេងហ្គេងដែលភ្ញោចលើជីវិតដូចជាហ្គេម The Sims ដែលមិនពឹងផ្អែកលើជំនាញនៃការចងចាំ ឬរកយុទ្ធវិធីនោះទេ។
អ្នកស្ម័គ្រចិត្តបានលេងហ្គេមអស់រយៈពេល៤០ម៉ោងក្នុងរយៈពេលពី៦ ទៅ៨សប្តាហ៍ ហើយបានធ្វើតេស្តដើម្បីរកមើលភាពបត់បែននៃការយល់ដឹងរបស់ពួកគេ។ អ្នកស្រាវជ្រាវជនជាតិអង់គ្លេសបានពន្យល់ថា នេះសំដៅទៅលើសមត្ថភាពរបស់មនុស្សដើម្បីសម្របរវាងការងារ និងគិតអំពីគំនិតជាច្រើនក្នុងពេលដែលត្រូវដោះស្រាយបញ្ហា។
លទ្ធផលបានបង្ហាញថា អ្នកចូលរួមដែលបានលេងហ្គេម StarCraft ហាក់ដូចជាមានភាពរហ័សរហួសក្នុងការគិតលឿនជាងអ្នកដែលលេងហ្គេម The Sime។
ការស្រាវជ្រាវត្រូវបានចេញផ្សាយនៅក្នុងកាសែត PLoS One។
ក្លាសបានពន្យល់ថា ព័ត៌មានរបស់យើងបានបង្ហាញថា ការបត់បែនៃការយល់ដឹងមិនមែនជាលក្ខណៈដែលនៅមួយកន្លែងនោះទេ ប៉ុន្តែវាអាចត្រូវបានគេបង្វឹក និងធ្វើអោយមានភាពប្រសើរឡើងដោយការប្រើប្រាស់ការសិក្សាដែលផ្តល់នូវភាពសប្បាយរីករាយដូចជាការលេងហ្គេមជាដើម។
ប្រេដ លូវ (Brad Love) ដែលមកពីមហាវិទ្យាល័យ London បាននិយាយថា ភាពបត់បែននៃការយល់ដឹងមានការប្រែប្រួលក្នុងចំនោមមនុស្សនីមួយៗ និងអាយុនីមួយៗ។
ការដោះស្រាយបញ្ហាភ្លាមៗតម្រូវអោយមានភាបត់បែននៃការគិតខ្ពស់។
តាមការស្រាវជ្រាវរបស់ក្លាស, អ្នកស្ម័គ្រចិត្តដែលបានលេងហ្គេមសាំញ៉ាំ បានបង្ហាញពីភាពល្អប្រសើរបំផុតនៅក្នុងតេស្តចិត្តសាស្ត្រក្រោយការលេងហ្គេមនោះ។ យើងត្រូវការការយល់ដឹងនូវអ្វីដែលពិតប្រាកដអំពីហ្គេមដែលនាំអោយមានការប្រែប្រួលទាំងនេះ ហើយមើលថាតើការរីកចម្រើននៃការយល់ដឹងរបស់ពួកគេគឺមានរហូតឬយ៉ាងណា៕