បន្ទាប់ពីការធ្វើមូលដ្ឋានីយកម្មនៃការឆ្លងមេរោគកូវីដ-១៩ នៅតំបន់ខ្លះ នៃប្រទេសចិនរួមទាំងទីក្រុងប៉េកាំង អាជ្ញាធរនៅទីនោះ បានចាប់ផ្តើមប្រើវិធីធ្វើតេស្តរកវីរុសនេះតាមរយៈរន្ធគូថ ជំនួសឱ្យការធ្វើតេស្តតាមច្រមុះនិងបំពង់ក។ តើអ្វីជាហេតុផល? អ្នកឯកទេសខ្លះ ជឿថាការធ្វើតេស្តតាមរន្ធគូថអាចល្អប្រសើរក្នុងការរកឃើញវីរុស។
យោងតាមទូរទស្សន៍រដ្ឋ CCTV ការធ្វើតេស្តិ៍តាមរយៈរន្ធគូថ ត្រូវបានធ្វើឡើងជាចម្បងលើប្រជាជន ដែលរស់នៅក្នុងតំបន់ដែលដែលបានបញ្ជាក់មានករណីជម្ងឺកូវីដ និងអ្នកដែលត្រូវបានធ្វើចត្តាឡីស័ក។
យោងតាមទស្សនាវដ្តី Forbes បានឱ្យដឹងថា អ្នកដំណើរដែលបានធ្វើដំណើរទៅដល់ទីក្រុងប៉េកាំង និងក្រុមសិស្ស និងគ្រូជាង ១.០០០នាក់ ដែលត្រូវបានគេគិតថាបានប៉ះពាល់នឹងវីរុសនេះ គឺស្ថិតក្នុងចំណោមមនុស្ស ដែលបានធ្វើតេស្តតាមរន្ធគូថ។
ការធ្វើតេស្តលើរន្ធគូថទាក់ទងនឹងការបញ្ចូលកប្បាស (ដែលមានសណ្ឋានដូចប្រដាប់ត្បាល់ត្រចៀក) ពី ១,២ ទៅ ២អ៊ីញចូលទៅក្នុងរន្ធគូថ ហើយវាត្រូវបានបង្វិល ឫត្បាល់ យ៉ាងទន់ភ្លន់ជាច្រើនដង បន្ទាប់មកយកចេញហើយដាក់ក្នុងធុងគំរូ។ ដំណើរការទាំងមូលចំណាយពេលតែ ១០ វិនាទីប៉ុណ្ណោះ៕