ទទឹមជាផ្លែឈើពណ៌ក្រហមមួយប្រភេទដែលមានរសជាតិជូរអែមនិងសម្បូរណាស់ដែរក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះបីភាគច្រើននៃពួកយើងសុទ្ធតែស្គាល់និងឧស្សាហ៍ទទួលទានផ្លែទទឹម ប៉ុន្តែប្រហែលជាមិនធ្លាប់ដឹងពីអត្ថប្រយោជន៍ដ៏អស្ចារ្យរបស់វាចំពោះសុខភាពទប់ស្កាត់ជំងឺសាហាវផ្សេងៗឡើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរញ៊ាំទទឹមឱ្យបាន ១ ផ្លែក្នុងមួយថ្ងៃ ៖
១. វាជួយពង្រឹងប្រព័ន្ធភាពស៊ាំរាងកាយ
នេះក៏ព្រោះតែទទឹមជាផ្លែឈើមួយប្រភេទដែលមានផ្ទុកសម្បូរទៅដោយវីតាមីន C ដែលជួយពង្រឹងដល់ប្រព័ន្ធភាពស៊ាំរាងកាយ។
២. វាអាចបន្ថយសម្ពាធឈាមដែលឡើងខ្ពស់
លក្ខណៈសម្បត្តិប្រឆាំងអុកស៊ីតកម្មនៃផ្លែទទឹមពិតជាអាចជួយបន្ថយសម្ពាធឈាមដែលឡើងខ្ពស់និងទប់ទល់ជំងឺលើសសម្ពាធឈាមគួរឱ្យកត់សម្គាល់។ ដើម្បីជាការប្រសើរចូរជ្រើសរើសទទួលទានទឹកផ្លែទទឹមស្រស់ដោយមិនបន្ថែមស្ករ។ ម្យ៉ាងវិញទៀតទទឹមក៏ជាប្រភពដ៏ល្អនៃជាតិប៉ូតាស្យូមដែលជួយគ្រប់គ្រងសម្ពាធឈាម, រក្សាសុខភាពឆ្អឹងនិងមុខងារបេះដូង។
៣. កាត់បន្ថយហានិភ័យនៃជំងឺមហារីកសួត
ទឹកផ្លែទទឹមជាប្រភពដ៏ប្រសើរនៃសារធាតុប្រឆាំងអុកស៊ីតកម្ម រួមទាំងអាស៊ីត ellagic ដែលមានប្រសិទ្ធិភាពជួយពន្យឺតការលូតលាស់នៃដុំសាច់និងទប់ស្កាត់ការរីករាលដាលនៃកោសិកាមហារីកសួត។
៤. កាត់បន្ថយហានិភ័យនៃជំងឺបេះដូង
ទទឹមជាប្រភពដ៏ប្រសើរនៃសារធាតុប្រឆាំងអុកស៊ីតកម្ម រួមបញ្ចូលទាំងសារធាតុ anthocyanins និង polyphenols ដែលជួយការពារសសៃឈាមពីការបំផ្លាញ ឬខូចខាត និងរក្សាសុខភាពសសៃឈាមបេះដូង។ ទទឹមក៏ជួយកាត់បន្ថយជាតិខ្លាញ់ដែលប្រមូលផ្ដុំនៅក្នុងសសៃឈាមអាកទែផងដែរ។ លើសពីនេះទៅទៀត ផ្លែទទឺមជម្រុញការផលិតអុកស៊ីតនីទ្រិកនៅក្នុងរាងកាយដើម្បីរក្សាសសៃឈាមពីការស្ទះធ្វើអោយឈាមហូរបានស្រួល។ ដូច្នេះចូរព្យាយាមទទួលទានផ្លែទទឺមជាប្រចាំ ដើម្បីទប់ស្កាត់បញ្ហាស្ទះសសៃឈាម។
៥. ប្រយុទ្ធប្រឆាំងនឹងជំងឺមហារីក
ក្រៅពីជំងឺសសៃឈាមបេះដូងហើយនោះ ទទឹមក៏អាចកាត់បន្ថយហានិភ័យនៃជំងឺមហារីកជាច្រើនប្រភេទផងដែរ។ នោះព្រោះតែវាមានផ្ទុកសម្បូរទៅដោយវីតាមីន C វីតាមីន A ជាតិដែក ជាតិសសៃនិងសារធាតុ anthocyanins ដែលជួយកម្ចាត់រ៉ាឌីកាល់សេរីការពារកោសិកាចៀសផុតពីជំងឺមហារីកសុដន់ ជំងឺមហារីកក្រពេញប្រូស្តាត ជំងឺមហារីកសួត និងជំងឺមហារីកពោះវៀនធំ។
៦. កាត់បន្ថយការរលាកសន្លាក់
នោះក៏ព្រោះតែផ្លែទទឹមជាប្រភពនៃសារធាតុ flavonoids និង polyphenols។ លើសពីនេះទៅទៀតផ្លែឈើពណ៌ក្រហមនេះក៏មានលក្ខណៈសម្បត្តិប្រឆាំងការរលាកដែលជួយទប់ស្កាត់បញ្ហាសុខភាពផ្សេងទៀតដូចជាជំងឺហឺតនិងជំងឺទឹកនោមផ្អែមផងដែរ។
៧. ល្អសម្រាប់សុខភាពខួរក្បាលបង្កើនការចងចាំ
ការទទួលទានផ្លែទទឹម ឬទឹកផ្លែទទឹមស្រស់ជាប្រចាំជួយសម្រួលចរន្តឈាមទៅកាន់ខួរក្បាលបានយ៉ាងប្រសើរ។ នេះមានន័យថាកោសិកាខួរក្បាលនឹងទទួលបានសារធាតុចិញ្ចឹម ព្រមទាំងអុកស៊ីសែនគ្រប់គ្រាន់ដើម្បីដំណើរមុខងារ។
៨. ជួយឱ្យឆាប់គេងលក់
ផ្លែទទឹមមានផ្ទុកសម្បូរទៅដោយជាតិម៉ាញ៉េស្យូមសម្រួលសាច់ដុំ បង្កើនអារម្មណ៍ល្អប្រសើរ និងជម្រុញការផលិតសារធាតុ GABA ក្នុងខួរក្បាលជួយឱ្យគេងលក់ស្រួលឆាប់រហ័ស៕