​ផ្លែ​សារី​ត្រូវបាន​គេ​ចាត់ទុកថា​មាន​បង្កប់​នូវ​ជាតិ​ថ្នាំ​ក្នុង​ខ្លួន​អស់​រយៈពេល​ច្រើន​សតវត្ស​ន៍​ទៅហើយ​។ ដោយសារ​តែ​កម្រិត​ជាតិ​សរសៃ​ដ៏​ច្រើន​របស់​វា ធ្វើ​អោយ​ផ្លែ​សារី​មាន​ឥទ្ធិពល​យ៉ាង​ខ្លាំង​នៃ​អត្ថប្រយោជន៍​ដល់​សុខភាព​ដូចជា ការពារ​ខ្លួន​ពី​ជំងឺ​បេះដូង​-​សរសៃឈាម​, រលាក​ស​ន្ល​ក់​, ជំងឺ​បេះដូង និង​ដាច់​សរសៃឈាម​ខួរក្បាល​។ ក្រៅពីនេះ ផ្លែ​សារី​ក៏​ជា​ប្រភព​នៃ​ជាតិ​ទង​ដែង​, វីតាមីន C, វីតាមីន K, ប៉ូ​តា​ស្យូម​, Phytonutrients និង Flavonoids​។​
 
​អង់​ទី​អុក​ស៊ីដង់ និង Flavonoids

​ផ្លែ​សារី​គជា​ប្រភព​ដ៏​ល្អ​បំផុត​នៃ​សារធាតុ Phytonutrients ព្រមទាំង​មាន​សកម្មភាព​ជា​អង់​ទី​អុក​ស៊ីដង់​។ អង់​ទី​អុក​ស៊ីដង់​ជាច្រើន​ដូចជា វីតាមីន C, និង​ជាតិ​រ៉ែ​ដូចជា ទង​ដែង សុទ្ធ​តែ​ដើរ​តួនាទី​មួយ​ក្នុង​ការបន្ថយ​ការខូចខាត​បេះដូង​-​សរសៃឈាម​។ សារធាតុ​ដ៏​មាន​ប្រយោជន៍​ទាំងនេះ​ជួយ​បន្ថយ​សកម្មភាព​របស់​រ៉ាឌីកាល​សេរី​ក្នុង​រាងកាយ​។ រ៉ាឌីកាល​សេរី​ទៅ​បំផ្លាញ​សរសៃឈាម​ជា​ច្រើន​ដោយផ្ទាល់ និង​អាច​បណ្តាល​អោយ​កូ​ឡេ​ស្ទើ​រ៉ុល​កើន​ឡើង​ក្នុង​ជញ្ជាំង​សរសៃឈាម​បាន ដូច្នេះ​ហើយ​អង់​ទី​អុកស៊ីដ​ង​អាច​មាន​ប្រយោជន៍​ក្នុង​ការបង្ការ​ការកើត​មាន និង​វិវឌ្ឈន៍​ទៅ​ជា​ជំងឺ​ក្រិន​រឹង​សរសៃឈាម​, ដាច់​សរសៃឈាម​ខួរក្បាល​, ជំងឺ​បេះដូង និង​រលាក​សន្លាក់​។​
 
​កាត់បន្ថយ​ការ​ប្រឈម​នឹង​ជំងឺ​បេះដូង​-​សរសៃឈាម​

​ការ​ញ៉ាំ​ផ្លែ​សារី​ជួយ​កាត់បន្ថយ​ការ​ប្រឈម​នឹង​ជំងឺ​ក្រិន​រឹង​សរសៃឈាម​, ដាច់​សរសៃឈាម​ខួរក្បាល និង​ជំងឺ​បេះដូង​។ ផ្លែ​សារី​ជា​ប្រភព​ដ៏​ល្អ​មួយ​នៃ​អាហារ​សរសៃ​, វីតាមីន C និង វីតាមីន K​។ វីតាមីន C គឺជា​អង់​ទី​អុក​ស៊ីដង់ដ៏​មាន​អំណាច​មួយ​ដែល​អាច​ជួយ​ទប់ស្កាត់​រ៉ាឌីកាល់​សេរី​កុំ​អោយ​បង្កើត​បាន​ក្នុង​សរីរាង្គកាយ ដូច្នេះ​ហើយ​វា​ក៏​អាច​កាត់បន្ថយ​ការ​ប្រឈម​នឹង​ជំងឺ​បេះដូង និង​ដាច់​សរសៃឈាម​ខួរក្បាល​បាន​។ ផ្លែ​សារី​ពណ៌​បៃតង​ជា​ប្រភព​ដ៏​ល្អ​មួយ​នៃ​វីតាមីន K ដែល​វា​មាន​សារៈសំខាន់​ទាំង​សុខភាព​ឆ្អឹង និង​អោយ​ឈាមកក​បានល្អ​។​
 
​លើសពីនេះទៅទៀត ជាតិ​សរសៃ​មាន​នាទី​ជួយ​បញ្ចុះ​កម្រិត​កូ​ឡេ​ស្ទើ​រ៉ុល​ក្នុងឈាម និង​បន្ថយ​ការ​ប្រឈម​នឹង​ជំងឺ​ក្រិន​រឹង​សរសៃឈាម និង​ជំងឺ​បេះដូង​។​
 
​ជា​ប្រភព​នៃ​អាហារ​សរសៃ​
​ដូច​បាន​និយាយ​ដូច​ខាងលើ​អញ្ជឹង​គឺ​ផ្លែ​សារីជា​ប្រភពដ៏​ល្អ​មួយ​នៃ​អាហារ​សរសៃ​។ ជាតិ​សរសៃ​ប្រហែល​ជា​ជួយ​ក្នុង​ការគ្រប់គ្រង​ទម្ងន់ ព្រមទាំង​ជួយ​ថែរក្សា​សុខភាព​ផ្លូវ​រំលាយ​អាហារ​ទៀតផង​។ ជាតិ​សរសៃ​ក៏​ដើរតួរ​ជា​អ្នក​បង្ការ​អាការៈ​ទល់លាមក​, ច​ញ្ចុះ​កម្រិ​តកូ​ឡេ​ស្ទើ​រ៉ុល​, កាត់បន្ថយ​ការ​ប្រឈម​នឹង​ជំងឺមហារីក ព្រមទាំង​បំបាត់​បញ្ហា​ក្រពះ​ពោះវៀន​ផ្សេងៗ​ទៀត​។ ការ​ទទួលទាន​ផ្លែឈើ​ដែល​មាន​ជាតិ​សរសៃ​ខ្ពស់​ជា​ទៀងទាត់​ដូច​ជា​ផ្លែ​សារី​នេះ ប្រហែល​ជា​ជួយ​កាត់បន្ថយ​ការ​ប្រឈម​នឹង​ជំងឺមហារីក​សុដន់​លើ​ស្ត្រី​ក្រោយ​រ៉ាំ​ង​រដូវ​បាន​។​
 
​ទម្លាប់​នៃ​ការប្រើប្រាស់​ផ្លែ​សារី​
​ផ្លែ​សារី​ត្រូវបាន​គេ​ប្រើប្រាស់​ដើម្បី​ព្យាបាល​អា​ការៈក្អក​, បំបាត់​ស្លេស​, និង​ជួយ​អោយ​បំពង់​ក៏​រអិល​ល្អ​។ ផ្លែ​សារី​ក៏​ត្រូវបាន​គេ​យក​ទៅប្រើ​ដើម្បី​ជួយ​អោយ​អារម្មណ៍​ស្ងប់ស្ងាត់ ព្រមទាំង​មាន​ឥទ្ធិពល​ជា​សារធាតុ​ច្រោះ​ជាតិពុល​យ៉ាងខ្លាំង​ផងដែរ​៕