​អ្នក​ដឹង​ទេ​ថា​ប៉េងប៉ោះ​មាន​ផលប្រយោជន៍​ជា​ច្រើន​ចំពោះ​សុខភាព​។ ថ្ងៃនេះ​វេបសាយ​សុខភាព www.health.com.kh សូម​ណែនាំ​អំពី​ផលប្រយោជន៍​មួយចំនួន​របស់​ប៉េងប៉ោះ​។​

​ប្រភព​នៃ​អង់​ទី​អុក​ស៊ីដង់ដ៏​ច្រើន​
​ប៉េងប៉ោះ​ផ្ទុក​ទៅ​ដោយ​សារធាតុ Lycopene ដែល​ជា​អង់​ទី​អុក​ស៊ីដង់ដ៏​ច្រើន និង​មាន​ប្រសិទ្ធភាព​ខ្ពស់​ក្នុង​ការទប់ស្កាត់​រ៉ាឌីកាល់​សេរី​កុំអោយ​បង្ក​ជំងឺមហារីក​បាន​។ អត្ថប្រយោជន៍​មួយ​នេះ​ក៏​អាច​ទទួល​បាន​ទាំង​ការ​ញ៉ាំ​ផលិតផល​ធ្វើ​ពី​ប៉េងប៉ោះ​ដែរ​។ សារធាតុ Lycopene ក្នុង​ប៉េងប៉ោះ​ជួយ​ប្រឆាំងនឹង​ជំងឺមហារីក និង​ត្រូវ​បាន​បង្ហាញថា មាន​ប្រសិទ្ធភាព​យ៉ាង​ពិសេស​ក្នុង​ការប្រឆាំង​នឹង​ជំងឺមហារីក​ក្រពេញប្រូ​ស្តាត​, មហារីក​មាត់ស្បូន​, មហារីកក្រពះ​, មហារីក​ចុង​ពោះវៀន​ធំ ព្រមទាំង​មហារីក​បំពង់​អាហារ និង​មហារីក​បំពង់ Esophagus, ជំងឺមហារីក​សុដន់ និង​មហារីក​មាត់​ផងដែរ​។ នេះ​បើ​យោង​ទៅ​តាម​ការ​សិក្សា​ដែល​ចុះ​ផ្សាយ​ដោយ​សាលា Harvard ខាង​ផ្នែក​សុខភាព​សាធារណៈ​។​

កាត់បន្ថយ​កូ​ឡេ​ស្ទើ​រ៉ុល និង​ការពារ​បេះដូង​

​សារធាតុ Lycopene ដែល​មាន​ក្នុង​ប៉េងប៉ោះ​ជួយ​បង្ការ​កុំអោយ​សេរ៉ូប​ជា​តិខ្លាញ់​ធ្វើ​អុកស៊ីត​កម្មបាន ដូច្នេះ​វា​មាន​ប្រសិទ្ធភាព​ក្នុង​ការប្រឆាំង​នឹង​ជំងឺ​បេះដូង​-​សរសៃឈាម​ដែរ​។ ការ​ទទួលទាន​ប៉េងប៉ោះ​ជា​ញឹកញាប់​ត្រូវបាន​គេ​អះអាង​ថា​ជួយ​កាត់បន្ថយ​កម្រិត​កូ​ឡេ​ស្ទើ​រ៉ុល LDL និង​ខ្លាញ់ Triglycerides ក្នុង​ឈាម​។ ជាតិ​ខ្លាញ់​ទាំងនេះ​គឺជា​ពិរុទ្ធជន​ដ៏​សំខាន់​ក្នុង​ការបង្ក​ជំងឺ​បេះដូង​-​សរសៃឈាម និង​បណ្តាលអោយ​កក​ជាតិ​ខ្លាញ់​ក្នុង​សរសៃឈាម​ទៀតផង​។​

សម្បូរ​វីតាមីន និង​ជាតិ​រ៉ែ​
​ប៉េងប៉ោះ​មួយ​ផ្លែ​អាច​ផ្តល់​ជា​វីតាមីន C ប្រហែល ៤០%​នៃ​តម្លៃ​តម្រូវការ​ទទួលទាន​រាល់ថ្ងៃ​។ វីតាមីន C គឺជា​អង់​ទី​អុកស៊ី​ដង់​ធម្មជាតិ​មួយ​ប្រភេទ​ដែល​ដើរតួនាទី​ប្រឆាំងនឹង​រ៉ាឌីកាល់​សេរី​បង្ក​ជំងឺមហារីក​។ វា​ក៏​ផ្ទុក​ទៅដោយ​វីតាមីន A, ប៉ូ​តា​ស្យូម និង​ជាតិ​ដែក​ដ៏​ច្រើន​លើសលប់​ផងដែរ​។ ប៉ូ​តា​ស្យូម​ដើរតួនាទី​យ៉ាង​សំខាន់​មួយ​ក្នុង​ការរក្សា​សុខភាពរ​បស់​សរសៃប្រសាទ ចំណែកឯ​ជាតិ​ដែក​វិញ​មាន​សារៈសំខាន់​ក្នុង​ការថែរក្សា​សុខភាព​គ្រាប់​ឈាម​អោយ​នៅ​ធម្មតា​។ វីតាមីន K ដែល​មាន​សារៈសំខាន់​ក្នុងការ​ធ្វើ​អោយ​ឈាមកក និង​គ្រប់គ្រង​ការ​ហូរ​ឈាម​ក៏មាន​យ៉ាង​សម្បើម​ណាស់​ដែរ​ក្នុង​ផ្លែ​ប៉េង​ប៉ោះ​។​

​ប្រឆាំង​នឹង​ឥទ្ធិពល​នៃ​ការជក់បារី​

​ធាតុ​ផ្សំ​សំខាន់ៗ​ពីរ​ប្រភេទ​របស់​ប៉េងប៉ោះ​ដែល​មាន​ដូចជា Coumaric Acid និង Chlorogenic Acid ជួយ​ប្រឆាំងនឹង​សារធាតុ Nitrosamines ដែល​រាងកាយ​ផលិតឡើង ព្រមទាំង​ជា​សារធាតុបង្កមហារីក​ដែល​មាន​ក្នុង​បារី​ផង​។​

ពង្រឹង​ចក្ខុវិញ្ញាណ​
​វីតាមីន A ដែល​មាន​ក្នុង​ផ្លែ​ប៉េងប៉ោះ​ជា​ផ្នែក​មួយ​ក្នុង​ការពង្រឹង​ដល់​សុខភាព​ភ្នែក​, បង្ការ​ជំងឺខ្វាក់មាន់ និង​ជំងឺ​ភ្នែក Macular Degeneration​។​

ថែរក្សា​សុខភាព​ពោះវៀន​
​ប៉េងប៉ោះ​ជួយ​ថែរក្សា​សុខភាព​ប្រព័ន្ធ​រំលាយ​អាហារ​តាមរយៈ​ការបង្ការ​ទាំង​អាការៈ​ទល់លាមក និង​រាគ​។ វា​ក៏​ជួយ​បង្ការ​បញ្ហា​ឡើង​លឿង​លើ​ស្បែក និង​បញ្ចេញ​ជាតិពុល​ពី​រាងកាយ​បាន​យ៉ាង​មាន​ប្រសិទ្ធភាព​។​

បញ្ចុះ​សម្ពាធ​ឈាម​
​ការ​ញ៉ាំ​ប៉េងប៉ោះ​ជា​រៀងរាល់ថ្ងៃ​អាច​ជួយ​កាត់បន្ថយ​ការ​ប្រឈម​នឹង​ការកើតមាន​ជំងឺ​លើស​សម្ពាធ​ឈាម​។​

សម្រាប់​ស្ថានភាព​ជំងឺ​ទឹកនោម​ផ្អែម​
​ការ​សិក្សា​ដែល​ធ្វើឡើង​ដោយ​សារព័ត៌មាន Journal of the American Medical Association បានអោយដឹងថា ការ​ទទួលទាន​ផ្លែ​ប៉េងប៉ោះ​រៀងរាល់ថ្ងៃ​ជួយ​កាត់បន្ថយ​សម្ពាធ​អុកស៊ីតកម្ម​លើ​ជំងឺ​ទឹកនោម​ផ្អែម​ប្រភេទ​ទី​២​បាន​។​

​ធ្វើអោយ​ស្បែក​មាន​សុខភាព​ល្អ​

​ប៉េងប៉ោះ​ជួយ​បន្ថែម​ការថែរក្សា​សុខភាព​ធ្មេញ​, ឆ្អឹង​, សក់ និង​ស្បែក​។ ផលិតផល​ទឹក​ប៉េងប៉ោះ​ដែល​ប្រើ​សម្រាប់​លាប​លើ​ស្បែក​ត្រូវបាន​គេ​ស្គាល់​ថា​ជួយ​ព្យាបាល​ជំងឺ​រលាក​ស្បែក​ដោយសារ​ពន្លឺព្រះអាទិត្យ​ធ្ងន់ធ្ងរ​បាន​។ ការ​ទទួលទាន​ប៉េងប៉ោះ​រាល់ថ្ងៃ​ជួយ​ការពារ​សុខភាព​ស្បែក​ក្នុង​ការប្រឆាំង​នឹង​កាំរស្មី​យូ​វី​ដែល​ធ្វើអោយ​ស្បែក​ក្រហម​។ ប៉េងប៉ោះ​ស្ថិតក្នុង​ចំណាត់​ថ្នាក់​ដ៏​ខ្ពស់​ក្នុង​ចំណោម​ផលិតផល​កាត់បន្ថយ​ការ​ចាស់​ទៅតាម​អាយុ​។ ការ​ញ៉ាំ​ប៉េងប៉ោះ​ក៏​ជួយ​កាត់បន្ថយ​អត្រា​នៃ​ការបង្ក​រោគ​លើផ្លូវ​ទឹកនោម ព្រមទាំង​មហារីក​ផ្លោក​នោម​ដែរ​។ ការ​ញ៉ាំ​ប៉េងប៉ោះ​ជា​ទៀងទាត់​អាច​ជួយ​រំលាយ​គ្រួស​ក្នុង​ថងទឹកប្រមាត់​បាន​ទៀត​ផង​៕