ថ្នាំ​ទឹកនោមផ្អែម​ឈ្មោះ​ថា Metformin ប្រហែលជា​មាន​ប្រយោជន៍​ច្រើន​ជាង​ការ​គ្រប់គ្រង​ជាតិ​ស្ករ​ក្នុង​ឈាម​ទៅ​ទៀត ព្រោះ​ការ​ស្រាវជ្រាវ​ថ្មី​បាន​បញ្ជាក់​ថា វា​ក៏​ជួយ​កាត់​បន្ថយ​ជំងឺ​វង្វេងស្មារតី​ពេល​ចាស់ជរា​ដែរ​។

បើ​យើង​ធ្វើការ​ប្រៀបធៀប​អ្នក​ដែល​ប្រើ​ថ្នាំ​ជំងឺ​ទឹកនោមផ្អែម​ផ្សេង​មួយទៀត​ឈ្មោះ​ថា Sulonylureas ឃើញ​ថា អ្នក​ប្រើ​ថ្នាំ Metformin អាច​កាត់​បន្ថយ​ការ​កើត​ជំងឺ​វង្វេងស្មារតី​ពេល​ចាស់ជរា​រហូត​ដល់ ២០​ភាគរយ​ឯណោះ​ក្នុង​រយៈពេល ៥​ឆ្នាំ​ក្នុង​ពេល​ស្រាវជ្រាវ​។

វេជ្ជបណ្ឌិត រ៉ា​ឆេ​ល វីត​មឺ (Dr. Rachel Whitmer) អ្នកឯកទេស​ខាង​ជំងឺ​រាតត្បាត និង​ជា នាយក​នៃ​ការ​ស្រាវជ្រាវ​បាន​និយាយ​ថា “​ថ្នាំ Metformin អាច​មាន​ប្រសិទ្ធភាព​ការពារ​សរសៃប្រសាទ​ក្នុង​ខួរក្បាល​បាន​”​។

ទោះបីជា​យ៉ាងណា​ក៏​ដោយ លោក​បាន​បន្ត​ទៀត​ថា “​នេះ​គឺជា​ការ​សង្កេត​, ការ​គិត​ទៅ​រក​អតីតកាល​, និង​ជា​ការ​សិក្សា​ដោយ​ផ្អែក​ទៅ​លើ​អត្រា​ប្រជាជន​។ យើង​បាន​រក​ឃើញ​ទំនាក់ទំនង​មួយ ប៉ុន្តែ​មិន​បាន​អះអាង​អំពី​មូលហេតុ និង​ឥទ្ធិពល​របស់​វា​ឡើយ​”​។

បើ​យោង​ទៅ​តាម​ប្រវត្តិ​នៃ​ការ​ស្រាវជ្រាវ​បានអោយ​ដឹង​ថា អ្នកជំងឺ​ទឹកនោមផ្អែម​ប្រភេទ​ទី​២ មានការ​ប្រឈម​នឹង​ជំងឺ​វង្វេងស្មារតី​ពេល​ចាស់ជរា​រហូត​ដល់​ពីរ​ដង នេះ​បើ​យើង​ធ្វើការ​ប្រៀបធៀប​នឹង​អ្នក​ដែល​គ្មាន​ជំងឺ​ទឹកនោមផ្អែម​។ ប៉ុន្តែ​ទោះបីជា​ជំងឺ​ទឹកនោមផ្អែម​មាន​កត្តា​ប្រឈម​មុខ​ពិតប្រាកដ​នឹង​ជំងឺ​វង្វេងស្មារតី​ពេល​ចាស់ជរា​ក៏​ដោយ ក៏​អ្នក​ស្រាវជ្រាវ​បាន​រក​ឃើញ​ថា មាន​ថ្នាំ​ជំងឺ​ទឹកនោមផ្អែម​មាន​ឥទ្ធិពល​តិចតួច​ចំពោះ​កត្តា​ប្រឈម​នឹង​ជំងឺ​នេះ​ដែរ​៕