ការ​ស្រាវជ្រាវ​ថ្មី​មួយ​បាន​ចង្អុលបង្ហាញ​ថា អ្នក​ធាត់ ឬ​លើស​ទម្ងន់​ដែល​ថយ​ចុះ​សម្ពាធ​ឈាម​, កម្រិត​កូ​ឡេ​ស្តេ​រ៉ុល និង​កម្រិត​ជាតិ​ស្ករ​នៅ​ក្នុង​ឈាម​របស់​ពួក​គេ អាច​កាត់​បន្ថយ​ហានិភ័យ​នៃ​ជំងឺ​បេះដូង និង​ជំងឺ​ដាច់​សរសៃឈាម​ខួរក្បាល​បាន​ដល់​ទៅ​ជាង​ពាក់កណ្តាល​។

អ្នក​ស្រាវជ្រាវ​បាន​វិភាគ​លើ​ការ​ស្រាវជ្រាវ​៩៧​ករណី​ដែល​រាប់​បញ្ចូល​មនុស្ស​ជាង​១,៨​លាន​នាក់​នៅ​ក្នុង​ពិភពលោក​។ ពួក​គេ​បាន​រក​ឃើញ​ថា សម្ពាធ​ឈាម​ខ្ពស់​, កម្រិត​កូ​ឡេ​ស្តេ​រ៉ុល​ខ្ពស់ និង​កម្រិត​ជាតិ​ស្ករ​នៅ​ក្នុង​ឈាម​ខ្ពស់​ពន្យល់​បាន​ពី​ការ​កើនឡើង​ហា​ហ​និ​ភ័យ​នៃ​ជំងឺ​បេះដូង​ចំពោះ​អ្នក​ធាត់ ឬ​ឡើង​ទម្ងន់​។ អ្នក​ដែល​មាន​កត្តា​ដូច​គ្នា​នោះ​មាន​ប្រហែល​៣/៤​ដែល​មានការ​កើនឡើង​ហានិភ័យ​នៃ​ជំងឺ​ដាច់​សរសៃឈាម​ខួរក្បាល​។

សម្ពាធ​ឈាម​ខ្ពស់​ជម្រុញ​ការ​គំរាមកំហែង​ខ្ពស់

ពោល​គឺ​មាន​៣១%​ក្នុង​ការ​កើនឡើង​ហានិភ័យ​នៃ​ជំងឺ​បេះដូង និង​៦៥%​នៃ​ការ​កើនឡើង​ហានិភ័យ​នៃ​ជំងឺ​ដាច់​សរសៃឈាម​ខួរក្បាល​។

ហ្គូ​ដា ដា​ណា (Goodarz Danaei) ជា​សាស្ត្រាចារ្យ​រង​ខាង​ផ្នែក​សុខភាព​ទូទៅ​នៅ​សាលា​វេជ្ជសាស្ត្រ Harvard បាន​និយាយ​ថា លទ្ធផល​នៃ​ការ​ស្រាវជ្រាវ​របស់​យើង​បាន​បង្ហាញ​ថា ឥទ្ធិពល​ប៉ះពាល់​នៃ​ការ​ឡើង​ទម្ងន់ ឬ​ធាត់​លើ​ជំងឺ​បេះដូង និង​ដាច់​សរសៃឈាម​ខួរក្បាល​នោះ​កើតឡើង​ដោយ​ការ​កើនឡើង​សម្ពាធ​ឈាម​, កម្រិត​កូ​ឡេ​ស្តេ​រ៉ុល និង​កម្រិត​ជាតិ​ស្ករ​នៅ​ក្នុង​ឈាម​ខ្ពស់​។ គាត់​បាន​បន្ថែម​ថា លើស​ពី​នេះ​, ការ​គ្រប់គ្រង​កត្តា​ហានិភ័យ​ដូច​ជា ការ​ព្យាបាល​ជំងឺលើសឈាម​ជាដើម ក៏​អាច​ការពារ​នៃ​ឥទ្ធិពល​ប៉ះពាល់​មួយ​ចំនួន​នៃ​ការ​ធាត់ និង​លើស​ទម្ងន់​ផង​ដែរ​។

ការ​ធាត់​បាន​កើនឡើង​ទ្វេ​ដង​លើ​ពិភពលោក​ចាប់តាំងពី​ឆ្នាំ​១៩៨០​។ មនុស្ស​ពេញវ័យ​ជាង​១​កោដិ​នាក់​ដែល​មាន​អាយុ​លើស​ពី​២០​ឆ្នាំ គឺ​ធាត់ ឬ​លើស​ទម្ងន់​។ បញ្ហា​បេះដូង​ដែល​ទាក់ទង​ទៅ​នឹង​ការ​ធាត់ ឬ​លើស​ទម្ងន់​នោះ​រួម​មាន ជំងឺ​បេះដូង និង​ជំងឺ​ដាច់​សរសៃឈាម​ខួរក្បាល ដែល​ជា​មូលហេតុ​បង្ក​អោយ​ស្លាប់​ក្នុង​ពិភពលោក​, ជំងឺ​ទឹកនោមផ្អែម និង​ប្រភេទ​នៃ​ជំងឺមហារីក​ដទៃ​ទៀត​។

យ៉ាងណាមិញ​, មនុស្ស​ប្រហែល​៣,៤​លាន​នាក់​ក្នុង​ពិភពលោក​បាន​ស្លាប់​ក្នុង​មួយ​ឆ្នាំ​ៗ​ដោយសារ​ការ​ធាត់ ឬ​លើស​ទម្ងន់​នេះ​។

ម៉ា​ហ្សី​ដ អេ​ហ្សា​ទី (Majid Ezzati) ជា​សាស្ត្រាចារ្យ​ខាង​ផ្នែក​សុខភាព​បរិស្ថាន​នៅ​មហាវិទ្យាល័យ Imperial បាន​និយាយ​ថា ការ​គ្រប់គ្រង​សម្ពាធ​ឈាម​, កម្រិត​កូ​ឡេ​ស្តេ​រ៉ុល និង​ជំងឺ​ទឹកនោមផ្អែម​ជា​រឿង​សំខាន់ ប៉ុន្តែ​មានការ​ឆ្លើយ​តប​ដោយ​ផ្នែក និង​បណ្តោះអាសន្ន​ទៅ​នឹង​ការ​ធាត់​៕