បើយោងទៅតាមសេចក្តីរាយការណ៍ របស់ Medical Daily បានអោយដឹងថា អ្នកស្រាវជ្រាវបានរកឃើញវិធីព្យាបាលថ្មីមួយដែលវាប្រហែលជាអាចព្យាបាលអ្នកជំងឺអេដស៍អោយជាដាច់តែម្តងនៅថ្ងៃណាមួយជាមិនខាន។
ក្នុងការសិក្សាមួយនៅឯ Radiological Society of North America (RSNA) អ្នកវិទ្យាសាស្ត្រដែលមកពីសាកលវិទ្យាល័យ Yeshiva បានបង្ហាញអំពីសមត្ថភាពនៃ Radioimmunotherapy (RIT) ក្នុងការសម្លាប់កោសិកាដែលមានជំងឺដោយមេរោគអេដស៍ លើឈាមដែលបានបូមចេញពីអ្នកជំងឺដែលធ្លាប់បានព្យាបាលដោយប្រើថ្នាំបែប Antiretroviral Therapy។
បើយោងទៅតាមប្រធាននៃការសិក្សាស្រាវជ្រាវបានអោយដឹងថា ខណៈពេលការព្យាបាលបែប Antiretroviral Thearpy (HAART) មានភាពសកម្មខ្លាំងបានបង្ហាញថាមានប្រសិទ្ធភាពក្នុងការគ្រប់គ្រងអ្នកជំងឺដែលផ្ទុកមេរោគអេដស៍វេជ្ជមាននោះ គឺវាមិនអាចសម្លាប់កោសិកាដែលមានជំងឺបានទាំងអស់នោះទេ។
វេជ្ជបណ្ឌិត អ៊ីកាធើរីណា ដាដាចឆូវ៉ាសសាដ (Dr. Ekaterina Dadachovasaid) បាននិយាយក្នុងសេចក្តីប្រកាសព័ត៌មានថា “នៅក្នុងខ្លួនអ្នកជំងឺផ្ទុកមេរោគអេដស៍ដែលបានប្រើវិធីព្យាបាល HAART ថ្នាំគ្រាន់តែទប់ស្កាត់ការបំបែកកូនចៅរបស់មេរោគប៉ុណ្ណោះ មានន័យថាវានឹងធ្វើអោយចំនួនមេរោគក្នុងឈាមអ្នកជំងឺទាបបំផុត។ ទោះបីជាយ៉ាងនេះក្តី HAART មិនអាចសម្លាប់កោសិការដែលឆ្លងជំងឺ HIV បានទេ។ រាល់យុទ្ធសាស្ត្រទាំងអស់សម្រាប់ព្យាបាលការបង្ករោគដោយមេរោគអេដស៍ ត្រូវតែមានវិធីសាស្ត្រមួយដើម្បីសម្លាប់កោសិកាដែលឆ្លងជំងឺដោយវីរុសប្រភេទនេះផង”។
អ្នកស្រាវជ្រាវនិយាយថា RIT នឹងបញ្ជូនកម្មរស្មីបំពុលកោសិកាក្មេងខ្ចី (Blast of Cytotoxic Radiation) ដែលបានកំចាត់ចោលកោសិការឆ្លងជំងឺដោយវីរុស HIV ពីក្នុងឈាមដែលបានបូមចេញពីក្នុងខ្លួនរបស់អ្នកជំងឺអេដស៍ទាំង ១៥នាក់ បានយ៉ាងជោគជ័យ។ ការប្រើប្រាស់ផ្សំគ្នាជាមួយនឹងការព្យាបាលបែប Antiretroviral Therapy ប្រធាននៃការសិក្សាស្រាវជ្រាវជឿជាក់ថា នៅថ្ងៃណាមួយវានឹងអាចព្យាបាលអ្នកជំងឺអេដស៍អោយជាសះស្បើយបាន៕