ជំងឺបេះដូង ជាជំងឺ ដែលមានចំណាត់ថ្នាក់ខ្ពស់ជាងគេក្នុងចំណោមជំងឺដទៃទៀត ដោយមានអ្នកស្លាប់រហូតទៅដល់មួយភាគបីនៃអត្រាមរណភាពរបស់ពិភពលោក។ របបចំណីអាហារ គឺជាមូលហេតុចំបង ដែលអាចឱ្យអ្នកកើតជំងឺបេះដូង។ ដូច្នេះ ដើម្បីឱ្យបេះដូងអ្នកមានសុខភាពល្អ គួរពិចារណាលើរបបអាហារដូចខាងក្រោមនេះ៖
១. បន្លែបៃតង៖ ស្ពៃខ្មៅ ខាត់ណា សុទ្ធសឹងតែជាបន្លែដែលមានផ្ទុកនូវ វីតាមីន ជាតិរ៉ែ និងសារធាតុប្រឆាំងអុកស៊ីតកម្ម។ វាមានផ្ទុកវីតាមីន ខេ (K) ដែលជាសារធាតុមួយប្រភេទជួយការពារសរសៃឈាម និងការពារកំណកឈាមផងដែរ។ បន្លែបៃតងក៏មានផ្ទុកនូវសារធាតុនីត្រាត ដែលជួយការពារពីជំងឺលើសឈាម កកឈាម និងបង្កើនសមត្ថភាពកោសិកាក្នុងសរសៃឈាម។
២. ពពួកផ្លែប៊ឺរី៖ គឺជាក្រុមផ្លែឈើដែលពោរពេញទៅដោយសារធាតុចិញ្ចឹមសំខាន់ៗសម្រាប់សុខភាពបេះដូង ហើយវាក៏ផ្ទុកសារធាតុប្រឆាំងអុកស៊ីតកម្ម ដែលប្រឆាំងនឹងការឡើងកម្តៅ និងអុកស៊ីតកម្មដែលជាភ្នាក់ងារនៃជំងឺបេះដួង។
៣. ផ្លែប័រ៖ គឺជាឃ្លាំងស្តុកនៃសារធាតុខ្លាញ់មានប្រយោជន៍ ដែលការពារពីបញ្ហាបេះដូង និងបន្ថយសារធាតុកូឡេស្តេរ៉ល (cholesterol) នៅក្នុងឈាម។ វាក៏មានផ្ទុកនូវជាតិប៉ូតាស្យូម ដែលជាសារធាតុចាំបាច់សម្រាប់សុខភាពបេះដូងផងដែរ។
៤. សាច់ត្រី៖ ពពួកសាច់ត្រីដួចជា ត្រីសាល់ម៉ុន ត្រីធូណា មានផ្ទុកនូវអាស៊ីតអូមេហ្គា ៣ ដែលជាសារធាតុជំនួយដល់បេះដូង។
៥. គ្រាប់អាល់ម៉ុន៖ ផ្ទុកនូវសារធាតុចិញ្ចឹម វីតាមីន និងជាតិរ៉ែ ដែលជាសារធាតុសំខាន់សម្រាប់សុខភាពបេះដួង។ វាជាប្រភេទគ្រាប់ធញ្ញជាតិដែលមានផ្ទុកជាតិសរសៃ (fiber) និងសារធាតុខ្លាញ់មានប្រយោជន៍ដែលការពារអ្នកពីជំងឺបេះដូង៕