Join with Health.com.kh on Telegram

​ជំងឺ​គេង​មិន​លក់ ជះឥទ្ធិពល​អវិជ្ជមាន​ដល់​សមត្ថភាព​ក្នុងការ​គេង​លក់ ឬ​គេង​បាន​ស្កប់​។ មាន​បញ្ហា​សុខភាព​ជាច្រើន​ដែល​បណ្ដាល​ឲ្យ​កើតមាន​ការ​គេង​មិន​លក់ ហើយ​ជារឿយៗ​។ លើសពីនេះទៅទៀត ថ្នាំ​សម្រាប់​ព្យាបាល​បញ្ហា​សុខភាព​មួយចំនួន​ក៏​ផ្សារភ្ជាប់​ទៅនឹង​ជំងឺ​គេង​មិន​លក់​ផងដែរ​។ អត្ថបទ​ខាងក្រោម​នឹង​បង្ហាញ​ឲ្យ​ដឹង​ពី​បញ្ហា​សុខភាព​ទូទៅ​បំផុត​ដែល​បណ្ដាល​ឲ្យ​គេង​មិន​លក់ រួម​ជាមួយនឹង​ដំណោះស្រាយ ៖

១.ជំងឺ​ទឹកនោមផ្អែម៖ អ្នក​កើត​ជំងឺ​ទឹកនោមផ្អែម គឺ​ឈឺ​នោម​ញឹក ដែលជា​ហេតុ​អាចធ្វើ​ឲ្យ​ភ្ញាក់​ដឹងខ្លួន​ជាច្រើន​ដង​នៅពេល​យប់​ពិបាក​នឹង​គេង​លក់បាន​ស្កប់​។ ដើម្បី​ជៀសវាង​បញ្ហា​នេះ​កើតឡើង អ្នក​មិនគួរ​ទទួលទាន​ទឹក ឬ​ភេសជ្ជៈ​ដទៃទៀត​នៅ​រយៈពេល ២ ឬ ៣ ម៉ោង​មុន​ចូល​គេង​ឡើយ​។​

២.ការឈឺចាប់​រ៉ាំរ៉ៃ៖ ជំងឺ​រលាក​សន្លាក់ ជំងឺ​ឈឺ​សាច់ដុំ និង​ស​សៃ​ពួរ ជាដើម ជា​មូល​ហេតុដែល​អាចអោយ​ភ្ញាក់​ដឹងខ្លួន​នៅ​ពាក់​កណ្តាលយប់​ពេលដែល​អ្នក​ឈឺចាប់​។ វិធី​ដ៏​ល្អ​បំផុត​ដើម្បី​បំបាត់​អា​ការៈឈឺចាប់​នោះ គឺ​អ្នក​ត្រូវ​ទៅពិនិត្យ​ព្យាបាល​ជាមួយ​គ្រូពេទ្យ​ជំនាញ ឬ​ប្រើប្រាស់​ថ្នាំ​បំបាត់​ការឈឺចាប់​ដែលមាន​វេជ្ជបញ្ជា​ត្រឹមត្រូវ​។​

៣.ការ​ច្រាល​ឡើង​នៃ​អាស៊ីត​ក្រពះ៖ អាកា​រៈ​នៃ​ការ​ច្រាល​អាស៊ីត​ក្រពះ ក៏​ជា​កត្តា​ដែល​បណ្ដាល​ឲ្យ​អ្នក​ភ្ញាក់​ដឹងខ្លួន​កណ្ដាលយប់​ផងដែរ ដោយសារតែ​ការឈឺចាប់ ឬ​ក្រហាយ​ទ្រូង​។ ពេលវេលា​ដែល​រាងកាយ​បង្កើត​ជាតិ​អាស៊ីត គឺ​ចន្លោះ​ពី​ម៉ោង ១០ យប់ ដល់ ២ ភ្លឺ​។ នេះ​មានន័យថា ប្រសិនបើ​អ្នកទទួល​ទាន​អាហារ​គៀក​នឹង​ម៉ោង ឬ​ពេល​ចូល​គេង​ពេក អ្នកនឹង​ជួបប្រទះ​បញ្ហា​ច្រាល​អាស៊ីត​ក្រពះ ខណៈពេល​កំពុង​គេង​ជាមិនខាន​។ ដូច្នេះ​ដើម្បី​ជៀសវាង​បញ្ហា​នេះ​កើតឡើង ចូរ​ជៀសវាង​ការទទួល​ទាន​អាហារ​ផ្សេងៗ​ច្រើន​នៅ​ខណៈពេល​ជិត​ចូល​គេង​។​

៤.ការប្រើប្រាស់​ឱសថ៖ រោគ​គេង​មិន​លក់​អាច​កើតមាន ដោយសារតែ​ការប្រើប្រាស់​ថ្នាំ​មួយចំនួន​ដូចជា ថ្នាំ alpha-blockers (​បន្ថយ​សម្ពាធ​ឈាម​) ថ្នាំ beta-blockers (​ព្យាបាល​ជំងឺលើសឈាម និង​បញ្ហា​បេះដូង​) ថ្នាំ corticosteroids (​ព្យាបាល​ជំងឺហឺត​) ថ្នាំ SSRI antidepressants (​ព្យាបាល​ជំងឺ​ធ្លាក់​ទឹកចិត្ត​) ថ្នាំ​លើសឈាម ACE inhibitors ថ្នាំ angiotensin II-receptor blockers (​បញ្ចុះ​សម្ពាធ​ឈាម​) ថ្នាំ cholinesterase inhibitors (​ព្យាបាល​ជំងឺ​ភ្លេចភ្លាំង ឬ​វង្វេងវង្វាន់​) ថ្នាំ non-sedating antihistamines ថ្នាំ glucosamine និង chondroitin (​ព្យាបាល​ជំងឺ​សន្លាក់​) និង​ថ្នាំ statins (​បន្ថយ​កម្រិត​កូ​ឡេ​ស្តេ​រ៉ូ​ល​)​។ ប្រសិនបើ​អ្នកទទួល​ទាន ឬ​ប្រើប្រាស់​ថ្នាំ​ប្រភេទ​ដូចដែល​បាន​រៀបរាប់ ហើយ​ជួបប្រទះ​នូវ​បញ្ហា​គេង​មិន​លក់ ចូរ​ពិភាក្សា​ជាមួយនឹង​គ្រូពេទ្យ​ជំនាញ​អំពី​ដំណោះស្រាយ ដោយ​គ្រូពេទ្យ ឬ​វេជ្ជបណ្ឌិត​អាច​នឹងធ្វើ​ការផ្លាស់ប្ដូរ​ថ្នាំ​ប្រភេទ​ផ្សេង​។​

៥.​បញ្ហា​ជំងឺផ្លូវចិត្ត៖ បញ្ហា​ផ្លូវចិត្ត គឺជា​មូលហេតុ​ទូទៅ​បំផុត​មួយ​ដែល​បណ្ដាល​ឲ្យ​គេង​មិន​លក់​។ ហើយ​ការ​ថប់​បារម្ភ និង​ធ្លាក់​ទឹកចិត្ត គឺជា​អាកា​រៈ​ចម្បង​បំផុត​៕