ពន្លឺព្រះអាទិត្យត្រូវបានគេដឹងថាបន្ថយសម្ពាធឈាម ប៉ុន្តែឥឡូវ ក្រុមអ្នកស្រាវជ្រាវជនជាតិអង់គ្លេសបានបង្ហាញថាហេតុអ្វី។
អ្វីដែលពួកគេបានរកឃើញ គឺថា អុកស៊ីតនីទ្រិច ដែលត្រូវបានស្តុកទុកនៅស្រទាប់ខាងលើនៃស្បែកមានអំពើទៅនឹងពន្លឺព្រះអាទិត្យ ហើយបណ្តាលអោយសរសៃឈាមរីកនៅពេលដែលអុកស៊ីតធ្វើដំណើរនៅក្នុងចរន្តឈាម។ បន្ទាប់មក, វាបានបន្ថយសម្ពាធឈាម។
ម៉ាទីន ហ្វីលីស (Martin Feelisch) ជាសាស្ត្រាចារ្យខាងផ្នែកវេជ្ជសាស្ត្រ ដែលមកពីសាកលវិទ្យាល័យ Southampton បាននិយាយថា នេះគឺជាការស្រាវជ្រាវដែលមិនត្រូវបានរំពឹងទុកដែលថា ស្បែកមិនត្រូវបានចាត់ទុកថាត្រូវបានទាក់ទងទៅនឹងការរក្សាសម្ពាធឈាមនោះទេ។
Feelisch បាននិយាយថា គាត់គិតថា ប្រសិនបើការស្រាវជ្រាវនេះត្រូវបានបញ្ជាក់នៅក្នុងការស្រាវជ្រាវទៅថ្ងៃមុខ ថាការប៉ះពាល់ទៅនឹងពន្លឺអ៊ុលត្រាវីយូឡេ អាចជួយបន្ថយហានិភ័យនៃជំងឺបេះដូងបាននោះ, វានឹងក្លាយជារឿងដែលគួរអោយចាប់អារម្មណ៍។
Feelisch បានបន្តថា ក្នុងចំនោមអ្នកដែលមានសម្ពាធឈាមធម្មតា, ឥទ្ធិពលនៃពន្លឺអ៊ុលត្រាវីយូឡេគឺគ្រប់គ្រាន់ក្នុងការបន្ថយសម្ពាធឈាមពី២ ទៅ៥មីលីម៉ែត្របារតនោះ។
គាត់បាននិយាយថា នេះគឺជាឥទ្ធិពលតិចតួច។ ប៉ុន្តែប្រសិនបើអ្នកមើលម្តងទៀតពីការស្រាវជ្រាវនេះក្នុងចំនោមអ្នកដែលមានជំងឺលើសឈាម, ខ្ញុំនឹងព្យាករណ៍ថា អ្នកនឹងឃើញពីការធ្លាក់ចុះបន្ថែម។
Feelisch បាននិយាយថា ការចៀសវាងពីការត្រូវពន្លឺថ្ងៃ ឬការប្រើផលិតផលការពារពន្លឺព្រះអាទិត្យដោយសារខ្លាចពីជំងឺមហារីកស្បែកអាចជាកត្តាហានិភ័យថ្មីនៃជំងឺបេះដូង។
ទោះជាយ៉ាងណាក៏ដោយ, គាត់មិនបានបង្ហាញថា អ្នកគួរតែត្រូវពន្លឺថ្ងៃដើម្បីទទួលបានក្តីសង្ឃឹមថានឹងថយចុះសម្ពាធឈាម។ អ្វីដែលគាត់បានណែនាំគឺថា សូមចំណាយពេលក្នុងបរិមាណមធ្យមនៃការស្ថិតនៅខាងក្រៅផ្ទះ។
Feelisch បាននិយាយថា មនុស្សកំពុងតែស្លាប់ដោយសារជំងឺមហារីកស្បែក ហើយពន្លឺព្រះអាទិត្យគឺជាកត្តាហានិភ័យដែលត្រូវបានគេស្គាល់ដែលជម្រុញអោយមានជំងឺមហារីកស្បែក។
Feelisch បានបន្តថា ការប៉ះពាល់ខ្លាំងពេកទៅនឹងពន្លឺព្រះអាទិត្យផ្តល់នូវហានិភ័យក្នុងការវិវត្តទៅជាជំងឺមហារីកស្បែក ប៉ុន្តែការប៉ះពាល់តិចពេកនៃពន្លឺព្រះអាទិត្យក៏អាចបង្កើនហានិភ័យនៃជំងឺបេះដូងផងដែរ។ ទោះជាយ៉ាងណាក៏ដោយ, គាត់បាននិយាយថា មនុស្សជាច្រើនស្លាប់ដោយសារជំងឺបេះដូងជាងជំងឺមហារីក។
ការស្រាវជ្រាវត្រូវបានចេញផ្សាយនៅក្នុង Journal of Investigative Dermatology។
វេជ្ជបណ្ឌិត ហ្គ្រេក ហ្វូណារ៉ូវ (Gregg Fonarow) ជាប្រធានផ្នែកជំងឺបេះដូងនៅសាកលវិទ្យាល័យកាលីហ្វញ៉ា បាននិយាយថា សម្ពាធឈាមខ្ពស់គឺជាកត្តាហានិភ័យចំបងនៃជំងឺដាច់សរសៃឈាមខួរក្បាល និងជំងឺតម្រងនោម បន្ថែមទៅលើជំងឺបេះដូងនោះ។
កម្រិតសម្ពាធឈាមនោះគឺខ្ពស់អំឡុងពេលរដូវរងា ប៉ុន្តែហេតុផលពីក្រោយការសង្កេតនេះមិនទាន់ត្រូវបានគេដឹងច្បាស់នៅឡើយនោះទេ។
Fonarow បាននិយាយថា ការស្រាវជ្រាវថ្មីនេះបានរកឃើញថា ការត្រូវពន្លឺព្រះអាទិត្យទៅនឹងស្បែកអាចផ្តល់អោយមានការបញ្ចេញនូវអ៊ុកស៊ីតនីទ្រិច និងបានបន្ថយសម្ពាធឈាម, ដែលនេះបង្ហាញថា វាអាចដើរតួក្នុងការសម្របសម្រួលសម្ពាធឈាមផងដែរ។
ការស្រាវជ្រាវនៅថ្ងៃក្រោយគឺចាំបាច់ដើម្បីកំណត់ពីកម្រិតថាតើកម្រិតប្រែប្រួលនៃការប៉ះពាល់នឹងពន្លឺព្រះអាទិត្យណាដែលដើរតួក្នុងការរក្សាសម្ពាធឈាម និងបន្ថយហានិភ័យនៃជំងឺបេះដូងនោះ។
ចំពោះការស្រាវជ្រាវ, ក្រុមរបស់ Feelisch បានធ្វើទៅលើមនុស្ស២៤នាក់ដែលមានសម្ពាធឈាមធម្មតាប៉ះទៅនឹងពន្លឺព្រះអាទិត្យប្រហែលជា៣០នាទី។
ពួកគេបានរកឃើញថា ការប៉ះពាល់នោះធ្វើអោយរីកសរសៃឈា ដែលបន្ថយសម្ពាធឈាម និងធ្វើអោយប្រែប្រួលដល់កម្រិតអ៊ុកស៊ីតនីទ្រិចនៅក្នុងឈាម៕