​ការស្រាវជ្រាវ​ថ្មី​មួយ​បានចង្អុលបង្ហាញ​ថា ការថយចុះ​កម្រិត​ជាតិ​ដែក អាច​បង្កើន​ហានិភ័យ​នៃ​ជំងឺ​ដាច់​សរសៃឈាម​ខួរក្បាល​ដោយ​ធ្វើអោយ​ឈាម​របស់​អ្នក​ងាយ​នឹង​ស្អិត​។​

​អ្នកស្រាវជ្រាវ​បាន​មើល​ទៅលើ​មនុស្ស​ជិត​៥០០​នាក់​ដែល​មាន​ជំងឺ​តំនរ​ពូជ​កម្រ​ដែល​បណ្តាល​អោយ​ពួកគេ​មាន​សរសៃឈាម​រីក​ធំ​នៅក្នុង​សួត​។ ជាទូទៅ​, សរសៃឈាម​នៅក្នុង​សួត​មិន​អនុញ្ញាត​អោយ​កំនក​ឈាម​ចូលក្នុង​សរសៃឈាម​អារទែ​នោះទេ​។ ប៉ុន្តែ​ចំពោះ​អ្នកជំងឺ​ទាំងនេះ​, ដុំ​ឈាម​អាច​ចេញ​ពី​សួត​, ធ្វើដំណើរ​ទៅកាន់​ខួរក្បាល និង​បណ្តាលអោយមាន​ជំងឺ​ដាច់​សរសៃឈាម​ខួរក្បាល​។​

​អ្នក​ដែល​មាន​ការខ្វះខាត​ជាតិ​ដែក​នៅក្នុង​ឈាម មាន​ប្លាកែ​ត​ស្អិត​ជាប់គ្នា ដែល​ជា​កោសិកា​ឈាម​តូច​ដែល​បណ្តាល​អោយ​បង្កើត​ជា​កំណក​ឈាម​នៅពេល​ដែល​វា​ស្អិត​ជាប់​គ្នា ហើយ​វា​ហាក់ដូចជា​បណ្តាល​អោយ​ទទួល​រង​នឹង​ជំងឺ​ដាច់​សរសៃឈាម​ខួរក្បាល​។​

​សូម្បី​តែ​អ្នក​ដែល​មាន​ការខ្វះខាត​ជាតិ​ដែក​កម្រិត​ទាប​ក៏ដោយ ក៏​ហាក់ដូចជា​ងាយ​នឹង​ទទួល​រង​នឹង​ជំងឺ​ដាច់​សរសៃឈាម​ខួរក្បាល​ដល់​ទៅ​ទ្វេដង​, នេះ​ដោយយោង​តាម​ការស្រាវជ្រាវ​ដែល​ត្រូវ​បាន​ចេញផ្សាយ​នៅក្នុង PLoS One​។​

​អ្នកស្រាវជ្រាវ​បាន​សម្គាល់​ឃើញថា មនុស្ស​ជាច្រើន​មាន​ប្រភេទ​ដទៃ​ទៀត​នៃ​បញ្ហា​នោះ​ដែល​នាំអោយ​កំនក​ឈាម​ឆ្លងកាត់​ប្រព័ន្ធ​ច្រោះ​នៃ​សួត ហើយ​ពួកគេ​បាន​បន្ថែមថា ការស្រាវជ្រាវ​របស់​ពួកគេ​អាច​ជួយ​ការពារ​ជំងឺ​ដាច់​សរសៃឈាម​ខួរក្បាល​ផងដែរ​។​

​កង្វះ​ជាតិ​ដែក​ប៉ះពាល់​លើ​មនុស្ស​ប្រហែល​២​កោដិ​នាក់​ក្នុង​ពិភពលោក និង​ការស្រាវជ្រាវ​ថ្មីៗ​នេះ​បាន​បង្ហាញថា វា​អាច​ជា​កត្តា​ហានិភ័យ​នៃ​ជំងឺ​ដាច់​សរសៃឈាម​ខួរក្បាល ប៉ុន្តែ​របៀប​ដែល​ការខ្វះ​ជាតិ​ដែក​នាំអោយ​ជម្រុញ​ហានិភ័យ​នៃ​ការ​ដាច់​សរសៃឈាម​ខួរក្បាល​នោះ មិន​ត្រូវបាន​គេ​ដឹង​នោះ​ទេ​។​

​វេជ្ជបណ្ឌិត ខ្លែ សូវ​លីន (Claire Shovlin) បាន​និយាយថា នៅពេល​ដែល​ប្លាកែ​ត​នៅ​ក្នុងឈាម​ស្អិត​ជាប់​គ្នា​ប្រសិន​បើ​អ្នក​មាន​ជាតិ​ដែក​តិច​ក៏ដោយ​, យើង​គិតថា នេះ​អាច​ពន្យល់បាន​ពី​មូលហេតុ​ដែល​ជាតិ​ដែក​តិច​អាច​នាំអោយ​កើត​ជំងឺ​ដាច់​សរសៃឈាម​ខួរក្បាល​នោះ​, ប៉ុន្តែ​ការស្រាវជ្រាវ​បន្ថែម​នឹង​ចាំបាច់​ត្រូវធ្វើ​បន្ថែម​ដើម្បី​បង្ហាញ​ពី​ការផ្សារភ្ជាប់​គ្នា​នេះ​។​

​ជំហាន​បន្ទាប់​គឺ​ថា ដើម្បី​ធ្វើ​តេស្ត​ថា​តើ​យើង​អាច​បន្ថយ​ឪ​កាស​អ្នកជំងឺ​ដែល​មាន​ហានិភ័យ​ខ្ពស់​នៃ​ការ​មាន​ជំងឺ​ដាច់​សរសៃឈាម​ខួរក្បាល​ដោយ​ព្យាបាល​ការខ្វះខាត​ជា​តិដែក​។ Shovlin បាន​និយាយថា យើង​នៅតែ​អាច​មើល​ថា​តើ​ប្លាកែ​តរបស់​ពួកគេ​មិន​ក្លាយ​ជា​ស្អិត​ជាប់​គ្នា​ឬ​យ៉ាងណា​៕