ពិតណាស់ការទទួលទានអាហារសុខភាពល្អ គឺគន្លឹះចាំបាច់បំផុតមួយដើម្បីរក្សាបាននូវសុខភាពប្រសើរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហើយភាគច្រើននៃពួកយើងបានដឹងអំពីប្រភេទនៃអាហារសុខភាពល្អ ប៉ុន្តែប្រហែលជាមិនចាប់អារម្មណ៍ទេថាវាអាចបង្កប៉ះពាល់មួយចំនួន។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអាហារសុខភាពល្អមួយចំនួនដែលតាមពិតទៅអាចជះឥទ្ធិពលអវិជ្ជមាន ៖
១. ទឹកក្រូចឆ្មារ
ទឹកក្រូចឆ្មារអាចបង្កអាការៈច្រាលទឹកអាស៊ីតក្រពះ ឬធ្វើឱ្យស្ថានភាពនៃអាការៈកាន់តែអាក្រក់ឡើងសម្រាប់អ្នកដែលកំពុងជួយប្រទះបញ្ហានេះស្រាប់ (ពិសេសកំឡុងពេលមុនចូលគេង)។ នេះក៏ព្រោះតែភេសជ្ជៈនេះនៅតែមានផ្ទុកជាតិអាស៊ីតទោះបីមិនខ្ពស់ ដូច្នេះហើយទើបវាអាចបណ្ដាលឱ្យកើតមានបញ្ហាច្រាលទឹកអាស៊ីតក្រពះ ឬក្រហាយទ្រូងប្រសិនបើទទួលទានច្រើន។ ភេសជ្ជៈមានផ្ទុកជាតិអាស៊ីតដូចទឹកក្រូចឆ្មារក៏អាចបង្កផលប៉ះពាល់ដល់កាចាធ្មេញផងដែរ។ វេជ្ជបណ្ឌិតណែនាំឱ្យប្រើប្រាស់ទុយោរនៅពេលទទួលទាននិងកុំភ្លេចខ្ពុរសម្អាតក្នុងមាត់ជាមួយទឹកធម្មតាតាមក្រោយផង។
២. តែ
ភាគច្រើននៃពួកយើងសុទ្ធតែដឹងថាកាហ្វេខ្មៅអាចបង្កស្នាមប្រឡាក់ជាប់ធ្មេញ ប៉ុន្តែតែក៏អាចជះផលប៉ះពាល់នេះដូចគ្នាតាមរយៈសារធាតុ tannin ដែលវាមានផ្ទុក។ ដើម្បីជាការប្រសើរចូរទទួលទានទឹកធម្មតាមួយកែវក្រោយពេលទទួលទានតែដើម្បីកាត់បន្ថយស្នាមប្រឡាក់។
៣. ភេសជ្ជៈគ្មានជាតិស្ករ ឬផ្ទុកជាតិផ្អែមសិប្បនិម្មិត
ប្រសិនបើអ្នកគិតថាភេសជ្ជៈគ្មានជាតិស្ករដែលផ្ទុកជាតិផ្អែមសិប្បនិម្មិតមិនអាចជះឥទ្ធិពលអ្វីលើកម្រិតនៃជាតិស្ករក្នុងឈាមនោះចូរគិតម្ដងទៀត! តាមពិតទៅជាតិផ្អែមសិប្បនិម្មិតអាចបង្កើនកម្រិតនៃជាតិស្ករក្នុងឈាមគួរឱ្យកត់សម្គាល់។ នោះក៏ព្រោះតែជាតិផ្អែមសិប្បនិម្មិតជះឥទ្ធិពលលើសុខភាពពោះវៀនដែលនឹងបង្កផលប៉ះពាល់ដល់កម្រិតនៃជាតិស្ករក្នុងឈាម។
៤. ផ្លែឈើក្រៀម
ការជំនួសស្ករគ្រាប់ដោយទទួលទានផ្លែឈើក្រៀមវិញមិនមែនជាគំនិតដ៏ល្អឡើយ! នេះក៏ព្រោះតែវាអាចបង្កគ្រោះថ្នាក់គួរឱ្យព្រួយបារម្ភដល់សុខភាពធ្មេញ។ ផ្លែឈើក្រៀមនិងដំណាំផ្លែឈើភាគច្រើនមានផ្ទុកជាតិពណ៌បន្ថែមដែលមិនល្អសោះឡើយចំពោះធ្មេញ។ ម្យ៉ាងវិញទៀតផ្លែឈើក្រៀមអាចបន្ថយការបញ្ចេញទឹកមាត់។ ខណៈដែលទឹកមាត់ជួយប្រឆាំងរាល់បាក់តេរី នោះការថយចុះនូវបរិមាណទឹកមាត់នឹងបង្កជាបញ្ហាមាត់ធ្មេញផ្សេងៗ។
៥. អាហារមានផ្ទុកកាឡូរីទាប
ប្រសិនបើអ្នកជាទូទៅទទួលទានកាឡូរីទាបជាងតម្រូវការនៃរាងកាយ នោះវាអាចពន្យឺតដល់ដំណើរការនៃការដុតរំលាយអាហារក្នុងរាងកាយ។ នេះក៏ព្រោះតែរបបអាហារដែលមានកាឡូរទាបតែងមានផ្ទុកប្រូតេអ៊ីនទាបដែលជះឥទ្ធិពលដល់ជាលិកាសាច់ដុំ។ ជំនួសឱ្យការបន្តឹងលើបរិមាណនៃកាឡូរី អ្នកចាំបាច់គួរទទួលទានប្រូតេអ៊ីនឱ្យបានគ្រប់គ្រាន់ និងកុំភ្លេចធ្វើលំហាត់ប្រាណជាប្រចាំ។
៦. អាហារមានផ្ទុកកាបូអ៊ីដ្រាតទាប
អ្នកជំនាញផ្នែកសុខភាពបានណែនាំឱ្យចៀសវាងរបបអាហារដែលមានផ្ទុកកាបូអ៊ីដ្រាតទាប។ ទោះបីការកាត់បន្ថយអាហារសម្បូរកាបូអ៊ីដ្រាតអាចជួយឱ្យស្រកទម្ងន់បានយ៉ាងឆាប់រហ័ស ប៉ុន្តែកង្វះកាបូអ៊ីដ្រាតក្នុងរាងកាយរយៈពេលយូរអាចបង្កជាជំងឺសសៃឈាមបេះដូង។
៧. ទឹកផ្លែឈើ
ធ្លាប់ដឹងទេថាទឹកផ្លែឈើដែលដាក់លក់លើទីផ្សារភាគច្រើនមានផ្ទុកជាតិស្ករខ្ពស់ដូចក្រូចកំប៉ុងដែរ? លើសពីនេះទៅទៀតទឹកផ្លែឈើកំប៉ុង ឬដបគ្មានផ្ទុកវីតាមីននិងកាឡូរីគ្រប់គ្រាន់ដែលផ្ដល់ថាមពល ក៏ដូចជាអត្ថប្រយោជន៍ចំពោះសុខភាពឡើយ។ ដូច្នេះដើម្បីជាការប្រសើរ ចូរជ្រើសទទួលទានផ្លែឈើស្រស់ជាប្រចាំជំនួសវិញ។ ប៉ុន្តែប្រសិនបើអ្នកចូលចិត្តទទួលទានទឹកផ្លែឈើស្រស់ ចូរធ្វើខ្លួនឯងនៅផ្ទះ! ទោះជាយ៉ាងណាមិនត្រូវទទួលទានច្រើនពេកឡើយ ក៏ព្រោះវានៅតែមានផ្ទុកជាតិស្ករខ្ពស់ជាងការទទួលទានផ្លែឈើធម្មតា៕