ដឹងទេថាភេសជ្ជៈកំប៉ុងគ្មានជាតិស្ករមិនល្អចំពោះសុខភាពដូចដែលភាគច្រើននៃពួកយើងធ្លាប់បានគិតឡើយ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) វាក៏មិនខុសអីខ្លាំងពីការទទួលទានភេសជ្ជៈកំប៉ុងធម្មតាដែរ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរឈប់ទទួលទាន ឬកម្រិតការទទួលទានភេសជ្ជៈកំប៉ុងគ្មានជាតិស្ករ ៖
១. ហានិភ័យនៃជំងឺពុកធ្មេញ ឬបញ្ហាដង្កូវស៊ីធ្មេញ
ភេសជ្ជៈគ្មានផ្ទុកជាតិស្ករក៏អាចបង្កបញ្ហាពុកធ្មេញគួរឱ្យកត់សម្គាល់ផងដែរ ក៏ព្រោះវាមានផ្ទុកអាស៊ីតផូស្វ័រិក។ ក្រៅពីបញ្ហាដង្កូវស៊ីធ្មេញ ជាតិពណ៌សិប្បនិម្មិតក្នុងភេសជ្ជៈគ្មានផ្ទុកជាតិស្ករក៏បណ្ដាលឱ្យធ្មេញប្រែពណ៌មិនស្អាតផងដែរ។
២. ហានិភ័យនៃជំងឺពុកឆ្អឹង
ការទទួលទានភេសជ្ជៈគ្មានជាតិស្ករជាប្រចាំក៏ប៉ះពាល់ដល់សុខភាពឆ្អឹងគួរឱ្យបារម្ភផងដែរ។ អាស៊ីតផូស្វរិកអាចរារាំងសមត្ថភាពនៃការស្រូបយកជាតិកាល់ស្យូម។ ពិសេសប្រសិនបើអ្នកស្ថិតក្នុងវ័យ ៥០ឆ្នាំ ឬលើសនេះ គឺប្រឈមមុខខ្ពស់ណាស់នឹងហានិភ័យនៃជំងឺពុកឆ្អឹង ប្រសិនបើមិនបញ្ឈប់ការទទួលទានភេសជ្ជៈកំប៉ុងគ្មានជាតិស្ករ។
៣. ហានិភ័យនៃជំងឺទឹកនោមផ្អែម
មួយក្នុងចំណោមមូលហេតុចម្បងដែលមនុស្សភាគច្រើនជ្រើសរើសភេសជ្ជៈកំប៉ុងគ្មានជាតិស្ករជំនួសភេសជ្ជៈកំប៉ុងធម្មតាដោយសារគិតថាអាចចៀសផុតពីហានិភ័យនៃជំងឺទឹកនោមផ្អែម។ ជាក់ស្ដែងតាមពិតទៅការទទួលទានភេសជ្ជៈកំប៉ុងគ្មានជាតិស្ករជាប្រចាំមិនយូរមិនឆាប់នៅតែបង្កជំងឺទឹកនោមផ្អែមដដែលដោយបង្កើនកម្រិតនៃជាតិស្ករក្នុងឈាម។ ភេសជ្ជៈគ្មានផ្ទុកជាតិស្ករបណ្ដាលឱ្យមានភាពធន់នឹងអាំងស៊ុយលីនដែលជាដើមហេតុដំបូងនៃជំងឺទឹកនោមផ្អែម។ ជាតិផ្អែមសិប្បនិម្មិតអាចបង្កើនកម្រិតនៃជាតិស្ករក្នុងឈាមគួរឱ្យកត់សម្គាល់។ ជាតិផ្អែមសិប្បនិម្មិតក៏ជះឥទ្ធិពលលើសុខភាពពោះវៀនដែលនឹងបង្កផលប៉ះពាល់ដល់កម្រិតនៃជាតិស្ករក្នុងឈាមផងដែរ។
៤. ហានិភ័យនៃជំងឺធាត់ជ្រុល
ជាតិផ្អែមសិប្បនិម្មត្តិដែលមានផ្ទុកក្នុងភេសជ្ជៈគ្មានជាតិស្ករអាចបណ្ដាលឱ្យរាងកាយចាប់ផ្ដើមឃ្លានអាហារសម្បូរជាតិស្ករកាន់តែខ្លាំងពិបាកនឹងគ្រប់គ្រង។ ដើម្បីជាការប្រសើរចូរជ្រើសរើសទទួលទានទឹកផ្លែឈើស្រស់ៗ ឬទឹកធម្មតាឱ្យបានច្រើនជំនួសវិញ។
៥. បង្កអាការៈឈឺក្បាល
ភេសជ្ជៈគ្មានជាតិស្ករក៏អាចបង្កបញ្ហាខ្សោះជាតិទឹកក្នុងរាងកាយដែលជាមូលហេតុចម្បងបំផុតមួយនៃអាការៈឈឺក្បាលផងដែរ៕