ក្រៅពីទទួលទានទឹកដោះគោក្ដៅឧណ្ហៗ លេបថ្នាំ ស្ដាប់ចម្រៀងសម្រួលអារម្មណ៍ជាដើមហើយនោះថាតើអ្នកធ្លាប់ដឹងទេថាការទទួលទានផ្លែឈើមួយចំនួនអាចជួយឱ្យអ្នកគេងលក់បានស្រួល? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផ្លែឈើដែលអ្នកគួររួមបញ្ចូលក្នុងរបបអាហារប្រចាំថ្ងៃដើម្បីជៀសផុតពីបញ្ហាពិបាកគេងលក់ ឬជំងឺគេងមិនលក់ ៖

១. ផ្លែព្រូន

ជាប្រភពដ៏ប្រសើរនៃវីតាមីនក្រុម B ដែលល្អណាស់សម្រាប់អ្នកពិបាកគេងលក់តាមរយៈការផលិតមេឡាតូនីន (អ័រម៉ូនគ្រប់គ្រងការគេង)។ ការទទួលទានផ្លែឈើនេះក៏ជួយទប់ស្កាត់អាការៈទល់លាមកបានយ៉ាងប្រសើរផងដែរ។

២. ផ្លែចេក

ការទទួលទានផ្លែចេកជាប្រចាំមិនត្រឹមតែជួយឱ្យគេងលក់បានស្រួលប៉ុណ្ណោះទេ ប៉ុន្តែល្អចំពោះសុខភាពរាងកាយទាំងមូលតែម្ដង។ ផ្លែចេកមានផ្ទុកសម្បូរទៅដោយជាតិប៉ូតាស្យូមនិងម៉ាញ៉េស្យូមដែលមិនត្រឹមតែជួយបញ្ចុះសម្ពាធឈាមប៉ុណ្ណោះទេ ប៉ុន្តែក៏សម្រួលសាច់ដុំធ្វើឱ្យឆាប់គេងលក់ផងដែរ។

៣. ផ្លែបឺរ

ក្រៅពីជា​ប្រភពដ៏ល្អបំផុតមួយនៃជាតិម៉ាញ៉េស្យូមហើយនោះ ផ្លែបឺរក៏មានផ្ទុកសម្បូរទៅដោយជាតិខ្លាញ់សុខភាពល្អនិងវីតាមីន B ដែលជួយកាត់បន្ថយបញ្ហាថប់បារម្ភជួយឱ្យឆាប់គេងលក់ផងដែរ។ ភាគច្រើននៃពួកយើងសុទ្ធតែបានដឹងហើយថាផលវិបាកនៃការថប់បារម្ភ គឺគេងមិនលក់។

៤. ផ្លែទំពាំងបាយជូរ

ផ្លែឈើនេះមានលក្ខណៈសម្បត្តិបង្កើនអ័រម៉ូនមេឡាតូនីនដែលគ្រប់គ្រងវដ្ដនៃការគេង។ ដូច្នេះការទទួលទានផ្លែទំពាំងបាយជូរប៉ុន្មានគ្រាប់នៅពេលយប់អាចជួយឱ្យអ្នកឆាប់គេងលក់បានស្កប់។

៥. ផ្លែម្នាស់

ក៏មិនខុសពីផ្លែទំពាំងបាយជូរដែរ ម្នាស់មានលក្ខណៈសម្បត្តិបង្កើនការសំយោគអ័រម៉ូនមេឡាតូនីន។ ប៉ុន្តែប្រសិនបើអ្នកមានបញ្ហាអាស៊ីតក្រពះកុំទទួលទានផ្លែឈើនេះអី។

៦. ផ្លែទទឹម

មានផ្ទុកសម្បូរទៅដោយជាតិម៉ាញ៉េស្យូមសម្រួលសាច់ដុំ បង្កើនអារម្មណ៍ល្អប្រសើរ និងជម្រុញការផលិតសារធាតុ GABA ក្នុងខួរក្បាលជួយឱ្យគេងលក់ស្រួលឆាប់រហ័ស។

៧. ផ្លែឈើរី

ផ្លែឈើនេះមានផ្ទុកសម្បូរទៅដោយមេឡាតូនីនដែលរក្សាតុល្យភាពនៃវដ្ដដំណេករបស់រាងកាយ។ បរិមាណខ្ពស់នៃមេឡាតូនីននឹងផ្ដល់សញ្ញាដល់រាងកាយឱ្យគេងផងដែរ។ ដើម្បីជាការប្រសើរចូរទទួលទានផ្លែឈើរីក្រោយអាហារពេលល្ងាចជាជាងទទួលទានពេលថ្ងៃ៕