ភាគច្រើននៃពួកយើងសុទ្ធតែស្គាល់និងឧស្សាហ៍ទទួលទានទឹកដោះគោ ប៉ុន្តែប្រហែលជាមិនធ្លាប់ដឹងពីអត្ថប្រយោជន៍ដ៏ប្រសើរនៃភេសជ្ជៈនេះចំពោះសុខភាពស្បែកឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើទឹកដោះគោស្រស់ល្អយ៉ាងណាខ្លះចំពោះសម្រស់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរបៀបងាយៗក្នុងការប្រើប្រាស់ទឹកដោះគោស្រស់រក្សាសម្រស់ ៖
១. រូបមន្តបង្រួមរន្ធញើស
អ្វីដែលអ្នកត្រូវធ្វើ គឺគ្រាន់តែលាយផ្នែកពណ៌សនៃស៊ុត ១ គ្រាប់ជាមួយទឹកដោះគោ ១ ស្លាបព្រាកាហ្វេ។ កូរឱ្យសព្វសឹមលាបលើផ្ទៃមុខ ហើយទុកចោលរហូតដល់ស្ងួតសឹមលាងសម្អាតចេញជាមួយទឹកក្ដៅឧណ្ហៗ។ អនុវត្តឱ្យបាន ២ ដងក្នុងមួយសប្តាហ៍។
២. រូបមន្តសម្រាប់ជួយឱ្យស្បែកភ្លឺស្រស់ថ្លា
អ្វីដែលអ្នកត្រូវធ្វើ គឺគ្រាន់តែលាបម៉ាស្សាទឹកដោះគោឆៅ ឬស្រស់លើស្បែកមុខនិងក ហើយទុកចោលសម្រាប់រយៈពេល ១០ នាទី សឹមលាងសម្អាតចេញជាមួយទឹកត្រជាក់។ អ្នកក៏អាចលាយទឹកឃ្មុំ ១ ស្លាបព្រាបាយ ជាមួយទឹកដោះគោស្រស់ ២ ស្លាបព្រាបាយ និងទឹកក្រូចឆ្មារស្រស់ ១ ស្លាបព្រាបាយ ចូលគ្នាឱ្យសព្វ សឹមលាបល្បាយលើស្បែកដែលសម្អាតស្អាត ហើយទុកចោលសម្រាប់រយៈពេល ១០ នាទី មុននឹងលាងសម្អាតចេញ។
៣. រូបមន្តសម្រាប់ផ្ដល់សំណើមដល់ស្បែក
ទឹកដោះគោមានផ្ទុកអាស៊ីត lactic ក៏ដូចជាវីតាមីន A និងវីតាមីន D ដែលទទួលខុសត្រូវក្នុងការធ្វើឱ្យស្បែកទន់រលោងមានសំណើម។ អ្វីដែលអ្នកត្រូវធ្វើ គឺគ្រាន់តែលាយទឹកដោះគោស្រស់ក្ដៅឧណ្ហៗ ២ ពែងនិងទឹកឃ្មុំកន្លះពែងក្នុងទឹកធម្មតាចំនួនសមល្មមដើម្បីគេងត្រាំ។
៤. រូបមន្តសម្រាប់សម្អាតស្បែក
អ្វីដែលអ្នកត្រូវធ្វើ គឺគ្រាន់តែជ្រលក់ដុំសំឡីក្នុងទឹកដោះគោឆៅ រួចលាបវាលើផ្ទៃមុខនិងក។ ទុកចោលសម្រាប់រយៈពេល ៥ នាទី សឹមលាងសម្អាតចេញ។ អនុវត្តជាប្រចាំ។ អ្នកក៏អាចលាយទឹកដោះគោស្រស់ជាមួយល្ហុងទុំកិនម៉ដ្ឋ ហើយលាបល្បាយលើស្បែក រួចទុកចោលសម្រាប់រយៈពេលពី ២ ទៅ ៣ នាទី។ លាងសម្អាតចេញជាមួយទឹកត្រជាក់។
៥. កម្ចាត់មុន
អ្វីដែលអ្នកត្រូវធ្វើ គឺគ្រាន់តែលាបទឹកដោះគោលើមុននឹងរងចាំសម្រាប់រយៈពេល ១៥ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច៕