ចង់កម្ចាត់មុនឆាប់រហ័សមិនពិបាកឡើយ! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) គួរធ្វើបែបណាទៅ? កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗកម្ចាត់មុនយ៉ាងឆាប់រហ័សបែបធម្មជាតិ ៖
១. ទទួលទានទឹកឱ្យបានច្រើនគ្រប់គ្រាន់ជាប្រចាំ
ធ្លាប់ដឹងទេថាគ្រាន់តែទទួលទានទឹកឱ្យបានច្រើនគ្រប់គ្រាន់ជាប្រចាំអាចជួយដោះស្រាយបញ្ហាមុនបានយ៉ាងប្រសើរ? នេះក៏ព្រោះតែទឹកជួយកម្ចាត់ជាតិពុលផ្សេងៗចេញពីក្នុងរាងកាយដោយប្រាកដថារាល់កាកសំណល់និងសារធាតុពុលដែលបង្កបញ្ហាមុនលើស្បែកត្រូវបានកម្ចាត់។ ម្យ៉ាងវិញទៀតជាតិទឹកក៏ជួយរក្សាតុល្យភាពនៃpH ឬកម្រិតអាស៊ីតបាសដែលទប់ស្កាត់ហានិភ័យនៃបញ្ហាមុន។
២. ត្រសក់
នេះក៏ព្រោះតែត្រសក់មានផ្ទុកសម្បូរទៅដោយវីតាមីន C សារធាតុប្រឆាំងអុកស៊ីតកម្មជួយកាត់បន្ថយការរលាកនិងពន្លឿនភាពជាសះស្បើយនៃស្បែកដែលទទួលរងការខូចខាតដោយសារមុន។ ក្រៅពីប្រើប្រាស់បន្ទះត្រសក់ម៉ាស្សាលើស្បែកមុខដែលមានបញ្ហា អ្នកក៏អាចកិនត្រសក់ឱ្យម៉ដ្ឋរួចលាយជាមួយទឹកក្រូចឆ្មារស្រស់ពី ២ ទៅ ៣ ស្លាបព្រាកាហ្វេ។ បន្ទាប់មកលាបល្បាយលើស្បែកកន្លែងដែលមានបញ្ហាមុន និងទុកចោលសម្រាប់រយៈពេលពី ១០ ទៅ ១៥ នាទី សឹមលាងសម្អាតចេញ។
៣. ទឹកក្រូចឆ្មារស្រស់
ក៏ដូចនឹងត្រសក់ដែរ ក្រូចឆ្មារស្រស់មានផ្ទុកសម្បូរទៅដោយវីតាមីន C ដែលល្អណាស់សម្រាប់ប្រឆាំងរោគមុន។ អ្វីដែលអ្នកត្រូវធ្វើ គឺលាយទឹកក្រូចឆ្មារស្រស់ជាមួយទឹកធម្មតាក្នុងបរិមាណស្មើគ្នាមុននឹងលាបលើមុនដោយប្រុងប្រយ័ត្នជាការស្រេច។ អ្នកក៏អាចលាយទឹកក្រូចឆ្មារស្រស់ជាមួយជែលប្រទាលកន្ទុយក្រពើដោយអ្វីដែលអ្នកត្រូវការ គឺជែលប្រទាលកន្ទុយក្រពើចំនួនពី ២ ទៅ ៣ ស្លាបព្រាបាយ និងទឹកក្រូចឆ្មារស្រស់ ២ ស្លាបព្រាបាយ។ ហើយអ្វីដែលអ្នកត្រូវធ្វើ គឺលាយជែលប្រទាលកន្ទុយក្រពើជាមួយទឹកក្រូចឆ្មារស្រស់។ កូរឱ្យសព្វក្លាយជាល្បាយខាប់ៗ។ បន្ទាប់មកត្រូវលាងសម្អាតមុខជាមួយទឹកក្ដៅឧណ្ហៗ និងផ្ដិតថ្នមៗឱ្យស្ងួតសិន។ លាបម៉ាស្សាល្បាយផ្ទៃមុខ និងទុកចោលសម្រាប់រយៈពេលយ៉ាងហោចណាស់ពី ១៥ ទៅ ២០ នាទី។ លាងសម្អាតចេញនៅពេលស្ងួត។ អនុវត្តជាប្រចាំដើម្បីព្យាបាលមុន។
៤. ទឹកដោះគោស្រស់
អ្វីដែលអ្នកត្រូវធ្វើ គឺគ្រាន់តែប្រើប្រាស់បន្ទះសំឡីជ្រលក់លាបទឹកដោះគោស្រស់ត្រជាក់ៗលើមុននៅមុនពេលចូលគេង។ ដើម្បីទទួលបានលទ្ធផលកាន់តែប្រសើរត្រូវប្រាកដថាទឹកដោះគោដែលអ្នកប្រើប្រាស់ គឺទឹកដោះគោសុទ្ធ។ ទោះជាយ៉ាងណារូបមន្តនេះមិនសាកសមសម្រាប់អ្នកដែលប្រតិកម្មអាឡែកស៊ីនឹងទឹកដោះគោ ឬផលិតផលអាហារផ្សំឡើងពីទឹកដោះគោឡើយ។
៥. ថ្នាំគ្រាប់អាស្ពីរីន
អ្វីដែលអ្នកត្រូវធ្វើ គឺគ្រាន់តែកិនអាស្ពីរីនឱ្យម៉ដ្ឋរួចលាយជាមួយទឹកធម្មតាបន្តិចឱ្យក្លាយជាល្បាយខាប់ៗ។ លាបល្បាយលើតំបន់ស្បែកដែលមានបញ្ហាមុន។ ទុកចោលសម្រាប់រយៈពេល ៣០ នាទី សឹមប្រើប្រាស់ក្រដាសសើម ឬក្រណាស់សើមស្អាតជូតចេញ។ ទោះជាយ៉ាងណាកុំអនុវត្តរូបមន្តនេះឱ្យសោះប្រសិនបើអ្នកប្រតិកម្មអាឡែកស៊ីនឹងថ្នាំអាស្ពីរីន!
៦. រមៀត
អ្វីដែលអ្នកត្រូវធ្វើ គឺគ្រាន់តែលាយទឹកធម្មតាពី ២ ទៅ ៣ ដំណក់ក្នុងម្សៅរមៀតចំនួន ១ ស្លាបព្រាកាហ្វេ។ កូរឱ្យសព្វក្លាយជាល្បាយខាប់ៗ សឹមលាបលើមុននិងរងចាំសម្រាប់រយៈពេលប៉ុន្មាននាទី។ លាងសម្អាតចេញជាមួយទឹកត្រជាក់៕