​ការស្រាវជ្រាវ​ថ្មី​បានបង្ហាញ​ថា ថ្នាំ​ប្រឆាំងនឹង​ជំងឺ​ធ្លាក់​ទឹកចិត្ត venlafaxine គឺ​មាន​ប្រសិទ្ធភាព​ដូច​ទៅ​នឹង​ការព្យាបាល​ដោយ​អរ​ម៉ូ​ន​អ៊ឹ​ស្ត្រូ​សែន​ដែរ​ក្នុង​ការបន្ថយ​អាការៈ​ក្តៅ និង​បែកញើស​យប់​ដែល​ទាក់ទង​ទៅ​នឹង​ការ​អស់​រដូវ​។​

​ដោយយោង​តាម​អ្នកស្រាវជ្រាវ​, ការព្យាបាល​ដោយ​អរ​ម៉ូ​ន​អ៊ឹ​ស្ត្រូ​សែន​ត្រូវបាន​គេ​ចាត់ទុកថា​ជា​ការព្យាបាល​ស្តង់ដារ​សម្រាប់​បញ្ហា​ក្តៅ និង​បែកញើស​យប់ ប៉ុន្តែ​វា​ត្រូវបាន​គេ​ប្រើប្រាស់​ក្នុង​កម្រិត​មួយ​ទាប​បំផុត​ដោយសារតែ​ហានិភ័យ​ដែ​ល​ត្រូវ​បាន​ផ្សារភ្ជាប់​ទៅ​នឹង​ការព្យាបាល​នោះ​។ ហានិភ័យ​រួមមាន​បញ្ហា​កំណក​ឈាម និង​ការកើនឡើង​ហានិភ័យ​នៃ​ការព្យាបាល​នៃ​ជំងឺមហារីក​មួយចំនួន​។​

​ការស្រាវជ្រាវ​ថ្មី​របស់​យើង​បាន​ផ្តល់​នូវ​ទិន្នន័យ​សំខាន់​សម្រាប់​គ្រូពេទ្យ និង​ស្ត្រិ​ដែល​កំពុង​ធ្វើការ​សម្រេច​ចិត្ត​ក្នុង​ការព្យាបាល​សម្រាប់​បញ្ហា​ក្តៅ និង​បែកញើស​យប់នោះ​។ វេជ្ជបណ្ឌិត ហា​ឌី​ន ជូ​ហ្វ (Hadine Joffe) បាន​និយាយថា ការស្រាវជ្រាវ​របស់​យើង​បានបង្ហាញ​ថា ការព្យាបាល​ដោយ​ថ្នាំ​ដែល​មិនមែន​ជា​អរ​ម៉ូ​ន ឬ​ជា​អរ​ម៉ូ​ន​ក្តី​គឺ​មាន​សភាព​ថេរ​ល្អ និង​ជា​ជម្រើស​ដែល​មាន​ប្រសិទ្ធភាព​សម្រាប់​បន្ថយ​រោគសញ្ញា​។​

Joffe បាន​សម្គាល់​ឃើញថា ការ​ក្តៅ និង​ការ​បែកញើស​យប់ ប៉ះពាល់​លើ​ស្ត្រី​ជា​ង​៨០%​ក្នុង​វ័យ​កណ្តាល​របស់​ពួកគេ និង​ជា​រោគសញ្ញា​ដំបូង​ដែល​ទាក់ទង​ទៅ​នឹង​ការ​អស់​រដូវ​ដែលនាំអោយ​ស្ត្រី​អស់​រដូវ​នោះ​ស្វែងរក​ការព្យាបាល​។​

​ការស្រាវជ្រាវ​បាន​មើល​ទៅលើ​ស្ត្រី​ជិត​៣៥០​នាក់ ដែល​កំពុងតែ​ឈាន​ចូល​អស់​រដូវ ឬ​ក៏​អស់រ​ដូ​វហើយ​។ គ្រប់​ស្ត្រី​ទាំងអស់​មាន​ការ​ក្តៅ និង​បែកញើស​យប់​។ ពួកគេ​ក៏​ត្រូវបាន​គេ​ជ្រើសរើស​អោយ​ទទួល​ការព្យាបាល​ដោយ​ថ្នាំ​អ៊ឹ​ស្ត្រូ​សែន​ក្នុង​កម្រិត​ទាប​, ថ្នាំ venlafaxine hydrochloride ក្នុង​កម្រិត​ទាប ឬ​ប្រើ placebo​។​

​ក្រោយ​៨​សប្តាហ៍​, ការ​ក្តៅ និង​ការ​បែកញើស​យប់​បាន​ថយ​ចុះ​ដល់​៥៣%​ក្នុងចំនោម​ស្ត្រី​ដែល​ទទួល​ការព្យាបាល​ដោយ​អរ​ម៉ូ​ន​អ៊ឹ​ស្ត្រូ​សែន​។ ចំពោះ​ស្ត្រី​ដែល​ប្រើ venlafaxine​រោគសញ្ញា​ទាំងនោះ​បាន​ធ្លាក់​មក​នៅត្រឹម​៤៨%​។ ជិត​២៩%​នៃ​ការប្រើ placebo ក៏​មាន​ការ​ប្រសើរ​ឡើង​នូវ​រោគសញ្ញា​ផងដែរ​។​

​បើ​ធៀប​ទៅនឹង placebo, ការព្យាបាល​ដោយ​អរ​ម៉ូ​ន​អ៊ឹ​ស្ត្រូ​សែន​បាន​បន្ថយ​ចំនួន​នៃ​ការ​ក្តៅ ឬ​បែកញើស​យប់​ដល់​ទៅ​ជា​មធ្យម​២,៣​ក្នុង​មួយ​ថ្ងៃ​។ ថ្នាំ venlafaxine បាន​បន្ថយ​ចំនួន​នៃ​រោគ​សញ្ញា​ដល់​ទៅ​១,៨​ក្នុង​មួយ​ថ្ងៃ​, នេះ​ដោយយោង​តាម​ការស្រាវជ្រាវ​ដែល​ត្រូវ​បាន​ចេញផ្សាយ​នៅក្នុង​កាសែត JAMA Internal Medicine​។​

​ការស្រាវជ្រាវ​នេះ​គឺជា​ការស្រាវជ្រាវ​ដំបូង​ដើម្បី​ប្រៀបធៀប​ការព្យាបាល​ដោយ​អរ​ម៉ូ​ន​អ៊ឹ​ស្ត្រូ​សែន និង​ការព្យាបាល​ដោយ​មិន​ប្រើ​អរ​ម៉ូ​ន ហើយ​បាន​បង្ហាញថា ថ្នាំ venlafaxine ជា​ថ្នាំ​ដែលមាន​ប្រសិទ្ធភាព​ដទៃ​ទៀត​ដូច​ទៅ​នឹង​ការព្យាបាល​ដោយ​អរ​ម៉ូ​ន​ផងដែរ​៕