​​ទឹក​ភ្លោះ គឺជា​ទឹក​មួយ​ប្រភេទ​ដែល​ថ្លា និង​មាន​ពណ៌​លឿង​បន្តិច​ដែល​កើតឡើង​សម្រាប់​ផ្ទុក​ទារក​ក្នុង​ពេល​ស្ត្រី​មាន​ផ្ទៃពោះ​។ ជា​ធម្មតា​វា​នឹង​កើតមាន​នៅក្នុង​១២​ថ្ងៃ​ដំបូង​នៃ​ការ​មាន​ផ្ទៃពោះ​។ ជញ្ជាំង​ថង់ទឹកភ្លោះ​ត្រូវបាន​បង្កើតឡើង​ដោយ​ស្រទាប់​ចំនួន​ពីរ​ជាន់​គឺ Chorion និង Amnion សម្រាប់​ធានា​ក្នុង​ការជួយ​ឲ្យ​ទារក​រស់នៅក្នុង​ថង់ទឹកភ្លោះ​មាន​សុវត្ថិភាព​។

​ជាធម្មតា ទឹកភ្លោះ​ត្រូវបាន​ផ្សំ​ឡើង​ដោយ​ទឹក​ជាមួយនឹង​អេឡិចត្រូ​លីត្រ ប៉ុន្តែ​ដល់​សប្តាហ៍​ទី ១២ ទៅ​ទី​១៤​នៃ​ការ​មាន​ផ្ទៃពោះ វា​នឹង​បន្ថែម​នូវ​សារធាតុ​ជាច្រើន​ទៀត​ដូចជា កាបូ​អ៊ី​ដ្រាត ប្រូតេអ៊ីន ខ្លាញ់ ផូស្វ័រ​លីពីត និង​អ៊ុយ​រ៉េ​សម្រាប់​ជួយ​ដល់​ការលូតលាស់​របស់​ទារ​ក​។

ទឹកភ្លោះ​មាន​តួនាទី​សំខាន់ៗ​ដូចជា​៖

  • ​ការពារ​ទារក​ពី​សម្ពាធ​ខាងក្រៅ​
  • ​ជាតិ​ទឹក​របស់​ទឹកភ្លោះ​នឹង​ជួយ​រក្សា​ភាព​កកក្តៅ និង​សម្រួល​ដល់​សីតុណ្ហភាព​របស់​ទារក​
  • ​ទឹកភ្លោះ​មាន​អង់ទីគ័រ​សម្រាប់​គ្រប់គ្រង​ការបង្ក​រោគ​លើ​ទារក​
  • ​ទារក​ក្នុង​ផ្ទៃ​អាច​ប្រើប្រាស់​ទឹកភ្លោះ​សម្រាប់​រៀន​ដកដង្ហើម និង​លេប​អាហារ​
  • ​នៅពេល​ទារក​អណ្តែត​ក្នុង​ទឹក​ភ្លោះ គេ​នឹង​អាច​ធ្វើ​ចលនា​បាន​យ៉ាង​សេរី ដើម្បី​ឲ្យ​ឆ្អឹង និង​សាច់ដុំ​លូតលាស់​បាន​គ្រប់គ្រាន់​
  • ​ទឹកភ្លោះ​នឹង​បង្ការ​កុំឲ្យ​រាងកាយ​ដូចជា ម្រាមដៃ និង​ម្រាមជើង​លូតលាស់​ស្អិត​ជាប់​គ្នា​៕