ជារឿយៗ ជំងឺខ្សោយបេះដូងត្រូវបានគេនិយាយតៗគ្នាថាបណ្តាលមកពីតំណពូជ ដែលឪពុកម្តាយ ឬជីដូនជីតា ធ្លាប់មានជំងឺនេះពីមុនមក។ ការពិត ជំងឺខ្សោយបេះដូងមិនមែនជាជំងឺតំណពូជនោះទេ វាគឺមានទំនាក់ទំនងទៅនឹងការខូចខាតនៃមុខងាររបស់បេះដូង ឬទ្រង់ទ្រាយរបស់បេះដូង ដូចជា ការលើសសម្ពាធឈាម ស្ទះសរសៃឈាមបេះដូង វិបត្តិចង្វាក់បេះដូង រលាកសាច់បេះដូង ខូចប្រឹសបេះដូង និងជំងឺបេះដូងពីកំណើត ជាដើម។
បន្ថែមលើនេះ ជំងឺទឹកនោមផ្អែម លើសជាតិខ្លាញ់ ការជក់បារី ការផឹកគ្រឿងស្រវឹង ក្នុងកម្រិតខ្ពស់ និងការប្រើប្រាស់ថ្នាំមួយចំនួន ក៏ជាមូលហេតុដែលនាំឱ្យអ្នកកើតជំងឺខ្សោយបេះដូងនេះដែរ។
តើយើងគួរការពារនិងចៀសឱ្យឆ្ងាយជំងឺខ្សោយបេះដូងបានតាមរបៀបណា? ខាងក្រោមនេះ ជាជម្រើសដ៏វិសេសវិសាល ដែលអាចជួយអ្នកគេចផុតពីវាបាន៖
-ឈប់ជក់បារី
-ធ្វើលំហាត់ប្រាណ
-ទទួលទានអាហារសុខភាព (មិនបរិភោគប្រៃពេក បរិភោគបន្លែនិងផ្លែឈើឲ្យបានគ្រប់គ្រាន់)
-រក្សាលំនឹងសម្ពាធឈាមរបស់អ្នក
-បន្ថយជាតិខ្លាញ់
-រក្សាទម្ងន់ដែលមានសុខភាពល្អ គឺមិនស្គមពេក និងមិនធាត់ពេក
-ព្យាបាល និងរក្សាលំនឹងជាតិស្ករ។
យ៉ាងណាមិញ អ្នកជំងឺលើសឈាម និងជំងឺទឹកនោមផ្អែម គប្បីត្រូវការពារឱ្យបានខ្ជាប់ខ្ជួន ព្រោះថាអ្នកជំងឺនេះ មានភាគរយខ្ពស់ក្នុងការកើតជំងឺខ្សោយបេះដូងទៅថ្ងៃខាងមុខ៕