របបអាហារសុខភាពល្អ គឺចាំបាច់ណាស់សម្រាប់គ្រប់គ្នា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែវាកាន់តែសំខាន់ថែមមួយកម្រិតទៀតចំពោះអ្នកជំងឺទឹកនោមផ្អែម។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកជំងឺទឹកនោមផ្អែមមិនគួរទទួលទាន ៖
១. អាហារមានផ្ទុកប្រូតេអ៊ីនខ្ពស់
ប្រូតេអ៊ីន គឺជាក្រុមនៃអាហារដ៏សំខាន់បំផុតមួយដែលរាងកាយត្រូវការដើម្បីរក្សាបាននូវសុខភាពល្អរឹងមាំ។ ទោះជាយ៉ាងណាមិនមែនមានន័យថាអ្នកអាចទទួលទានបានតាមចិត្តចង់ឡើយ ពិសេសចំពោះអ្នកចូលចិត្តទទួលទានសាច់ក្រហម! នេះក៏ព្រោះតែការទទួលទានច្រើនពេកអាចបង្កើនហានិភ័យនៃជំងឺទឹកនោមផ្អែមនិងជំងឺមហារីក។ អ្នកគួរកម្រិតការទទួលទានមិនលើសពី ២ ដងក្នុងមួយសប្តាហ៍ដោយជំនួសមកវិញនូវត្រី សាច់មាន់ (គ្មានស្បែក) និងបន្លែច្រើនដើម្បីទទួលបានប្រូតេអ៊ីនគ្រប់គ្រាន់។
២. អាហារមានផ្ទុកសម្បូរទៅដោយកាបូអ៊ីដ្រាត
ការកាត់បន្ថយការទទួលទានអាហារសម្បូរដោយកាបូអ៊ីដ្រាតជាគន្លឹះចម្បងមួយដែលអ្នកគួរអនុវត្តដើម្បីគ្រប់គ្រងជំងឺទឹកនោមផ្អែម។ បរិមាណនៃកាបូអ៊ីដ្រាតច្រើនពេកធ្វើឱ្យកោសិកាធន់នឹងអាំងស៊ុយលីនបង្កបញ្ហាជាតិស្ករក្នុងឈាមឡើងខ្ពស់។ ទោះជាយ៉ាងណាមិនមែនមានន័យថាអ្នកត្រូវឈប់ទទួលទានអាហារមានផ្ទុកកាបូអ៊ីដ្រាតតែម្ដងឡើយក៏ព្រោះរាងកាយនៅត្រូវការវា! អ្វីដែលសំខាន់ គឺត្រូវកាត់បន្ថយ ឬកម្រិតការទទួលទាន។
៣. អាហារចៀនបំពង
អាហារចៀន ឬបំពងភាគច្រើន គឺមានផ្ទុកជាតិខ្លាញ់មិនល្អ។ ដូច្នេះដើម្បីជាការប្រសើរចូរជ្រើសរើសវិធីចម្អិនផ្សេងទៀតដូចជាស្ងោ អាំង ឬចំហុយជំនួសវិញ។ ប្រសិនបើអ្នកឈប់ទទួលទានអាហារចៀន ឬបំពងមិនបានចូរជ្រើសរើសប្រើប្រាស់ខ្លាញ់ល្អដូចជាប្រេងអូលីវ។
៤. អាហារសម្បូរជាតិខ្លាញ់
ថ្វីត្បិតតែអាហារដែលមានផ្ទុកសម្បូរទៅដោយជាតិខ្លាញ់មិនបណ្ដាលឳ្យកម្រិតនៃជាតិស្ករក្នុងឈាមឡើងខ្ពស់ដោយផ្ទាល់ ប៉ុន្តែវារួមចំណែកបង្កើនភាពធន់នឹងអាំងស៊ុយលីនរបស់រាងកាយ។ លើសពីនេះទៅទៀតអាហារសម្បូរជាតិខ្លាញ់ត្រូវការពេលយូរដើម្បីរំលាយដែលអាចជះឥទ្ធិពលដល់កម្រិតជាតិស្ករក្នុងឈាមឡើងខ្ពស់។ ទោះជាយ៉ាងណានេះមិនមែនមានន័យថាអ្នកកំពុងមានបញ្ហាជាតិស្ករក្នុងឈាមឡើងខ្ពស់និងអ្នកជំងឺទឹកនោមផ្អែមមិនអាចទទួលទានអាហារសម្បូរជាតិខ្លាញ់បានតែម្ដងនោះទេ គឺអាចញ៊ាំបានក្នុងបរិមាណ ឬកម្រិតសមល្មម។
៥. បាយស
បាយសធ្វើឳ្យជាតិស្ករក្នុងឈាមឡើងខ្ពស់ឆាប់រហ័សដោយសារវាមានផ្ទុកជាតិសសៃតិច ប៉ុន្តែជាតិកាបូអ៊ីដ្រាតដែលរាងកាយបំលែងទៅជាជាតិស្ករខ្ពស់។ដូច្នេះដើម្បីជាការប្រសើរអ្នកគួរកាត់បន្ថយបាយស ហើយព្យាយាមទទួលទានបាយអង្ករសម្រូបជំនួសវិញក៏ព្រោះវាមានផ្ទុកជាតិសសៃខ្ពស់។ ជាតិសសៃអាចជួយគ្រប់គ្រងកម្រិតនៃជាតិស្ករក្នុងឈាមឳ្យមានស្ថេរភាព។
៦. ប្រភេទអាហារកញ្ចប់
អ្នកមានជំងឺទឹកនោមផ្អែមប្រភេទទី ២ ឬអ្នកដែលមិនចង់កើតជំងឺនេះ គួរជៀសឱ្យផុតពីការទទួលទានអាហារកញ្ចប់។ អាហារប្រភេទនេះមិនត្រឹមតែធ្វើឱ្យអ្នកពិបាកក្នុងការសម្រកទម្ងន់ប៉ុណ្ណោះទេ ប៉ុន្តែវាមានផ្ទុកសម្បូរទៅដោយជាតិខ្លាញ់មិនល្អដែលអាចបង្កើនកម្រិតកូឡេស្តេរ៉ូលអាក្រក់ ហើយកាត់បន្ថយកម្រិតនៃកូឡេស្តេរ៉ូលល្អក្នុងឈាមបង្កទៅជាបញ្ហាសុខភាពគួរឱ្យព្រួយបារម្ភ។ លើសពីនេះទៅទៀតការទទួលទានអាហារកញ្ចប់ច្រើនក៏បង្កការរលាកផ្សេងៗក្នុងរាងកាយដែលអាចនាំឲ្យកើតមានជំងឺទឹកនោមផ្អែម។
៧. អាហារមានផ្ទុកជាតិស្ករខ្ពស់
អ្នកជំងឺទឹកនោមផ្អែមត្រូវប្រយ័ត្នក្នុងការទទួលទានអាហារសម្បូរជាតិស្ករ និងមានផ្ទុកកាបូអ៊ីដ្រាតគុណភាពទាប។ នេះក៏ព្រោះតែវាអាចបង្កើនកម្រិតនៃជាតិស្ករក្នុងឈាមគួរឱ្យកត់សម្គាល់។ ក្រៅជំងឺទឹកនោមផ្អែម ការទទួលទានអាហារសម្បូរជាតិស្ករលើសកម្រិតក៏នាំឱ្យកើនទម្ងន់ ព្រមទាំងបង្កើនហានិភ័យនៃជំងឺបេះដូងនិងដាច់សសៃឈាមខួរក្បាលផងដែរ៕