​ចាប់តាំងពី​វីរុស​កូ​រ៉ូ​ណា​រាតត្បាត​ពាសពេញ​សាកលលោក រហូតមកដល់​ពេលនេះ ក៏មាន​ការលេចចេញ​នូវ​វីរុស​កូ​រ៉ូ​ណា​បំ​លែងខ្លួន​ថ្មី ហើយ​មនុស្សម្នា​ជាច្រើន​បាន​ចូលរួម​ទប់ស្កាត់​តាម​វិធី​ផ្សេងៗ​ដូចជា ការ​លាងដៃ​ជាមួយ​សាប៊ូ ឫ​ជែ​ល អាល់កុល អោយបាន​ញឹកញាប់ ការរក្សា​គម្លាត ជាពិសេស​គឺ​ការពាក់​ម៉ាស់​។ បើ​និយាយ​ដល់​ការពាក់​ម៉ាស់​នេះ​វិញ មនុស្សនិយម​ប្រើ​ម៉ាស់​ទៅតាម​ចំណូលចិត្ត ឫ​ការយល់ឃើញ​រៀងៗ​ខ្លួន ដោយ​គិតថា​ម៉ាស់​ដែល​ខ្លួន​ប្រើ​មាន​ប្រសិទ្ធ​ការពារ​មេរោគ​បានល្អ និង​ស្រួល​ប្រើ​។ យ៉ាងណាមិញ ពាក់ព័ន្ធ​នឹង​ការប្រើ​ម៉ាស់​នេះ រដ្ឋាភិបាល​បារាំង​បាន​ព្រមាន​ថា ម៉ាស់​ក្រណាត់​អាច​មិន​ការពារ​មនុស្ស​ពី​ការឆ្លង​វីរុស​កូ​រ៉ូ​ណា​បំ​លែងខ្លួន​ថ្មី​បានទេ​។​

​នាពេល​ថ្មីៗ​នេះ​កូ​វីដ​-១៩ បំ​លែងខ្លួន​ថ្មី​ចំនួន​២​មកពី​ចក្រភព​អង់គ្លេស និង​អាហ្វ្រិក​ខាងត្បូង​បាន​ចូលដល់​ប្រទេស​បារាំង ហើយ​រដ្ឋាភិបាល​បានចាប់ផ្តើម​កែប្រែ​ការណែនាំ​របស់ខ្លួន​ស្តីពី​ការពាក់​ម៉ាស់​។ ទោះបី​មិនបាន​ផ្សព្វផ្សាយ​ជា​ផ្លូវការ​ក៏ដោយ ក្រុមប្រឹក្សា​សុខភាព​បារាំង បាន​និយាយថា​ម៉ាស់​ក្រណាត់​ច្នៃ​ដោយ​ខ្លួនឯង​ប្រហែលជា​មិនមែនជា​ជម្រើស​សុវត្ថិភាព​បំផុត​នោះទេ​។​

​ផ្ទុយទៅវិញ មនុស្ស​គួរតែ​ប្រកាន់ខ្ជាប់​នូវ​ការពាក់​ម៉ាស់​អាជីព ដូចជា ម៉ាស់​វះកាត់ ដែល​អាចរំលាយ​បាន ឬ ម៉ាស់​ចម្រោះ FFP2 ដែល​ត្រូវ​ពាក់​ជា​ចាំបាច់​នៅតាម​ទីសាធារណៈ​មួយចំនួន​នៅ​ប្រទេស​អាល្លឺម៉ង់​រួចទៅហើយ​។​

​សហប្រធាន​នៃ​ក្រុមការងារ​ប្រយុទ្ធប្រឆាំង​កូ​វីដ​-១៩ នៃ HCPS បាន​និយាយថា ”​នៅពេល​និយាយ​ដល់​ការ​ជ្រៀតចូល​នៃ​វីរុស​បំ​លែងខ្លួន​ថ្មី​មួយចំនួន​…​ដែល​ឆ្លង​កាន់តែ​លឿន​នោះ​…​សំណួរ​ត្រូវបាន​លើកឡើងថា តើ​ម៉ាស់​ប្រភេទ​ណា​គួរ​ណែនាំ​ដល់​សាធារណជន​ទូទៅ​”​។ គាត់​បាន​ពន្យល់ថា ខណៈ​ម៉ាស់​ក្រណាត់​ត្រូវបាន​មនុស្ស​ជាច្រើន​ចូលចិត្ត​ពាក់ ព្រោះ​ពួកវា​អាច​បោកគក់​ប្រើ​ឡើងវិញ​បាន តែ​ពួកវា​មិនអាច​ធានា​ការពារ​ប្រឆាំងនឹង​កូ​វីដ​បំ​លែងខ្លួន​ថ្មី​បានទេ​៕​