Join with Health.com.kh on Telegram

​ជំងឺ​រលាក​ថ្លើម​ប្រភេទ​B បង្កឡើង​ដោយ​ពពួក​វីរុស​ដែល​អាច​ឲ្យ​អ្នក​រលាក​ថ្លើម​កាន់តែ​ធ្ងន់ធ្ងរ ថែមទាំង​ប្រឈម​នឹង​ជំងឺ​ក្រិន​ថ្លើម និង​មហារីក​ថ្លើម​។ មាន​វិធី​ជាច្រើន​ដែល វា អាច​ឆ្លង​បាន ដែល​ពេល​យើង​នឹង​លើកយក​ការចម្លង​ពី​ម្តាយ​ទៅ​កូន​ក្នុង​ផ្ទៃ​មក​និយាយ ថា​តើ​ជំងឺ​រលាក​ថ្លើម​ប្រភេទ​B អាច​បង្ការ​មិន​ឲ្យ​ឆ្លងទៅ​កូន​ក្នុង​ផ្ទៃ​បាន​យ៉ាងដូចម្តេច​?

​ការធ្វើ​រោគវិនិច្ឆ័យ​មេរោគ​រលាក​ថ្លើម​ប្រភេទ​B សម្រាប់​ស្ត្រី​មាន​ផ្ទៃពោះ គួរ​ធ្វើឡើង​នៅ​អំឡុង​ត្រីមាស​ទី​២ គឺ​នៅពេល​គភ៌​អាយុ​បាន ៦​ខែ​។ ប្រសិនបើ​ម្តាយ​មាន Antigen Hbs វិជ្ជមាន​នោះ គឺ​តម្រូវ​ឲ្យ​ពិនិត្យ​ឈាម​មួយចំនួន​ម​ន្ថែ​ម​ទៀត ដើម្បី​រាប់​ចំនួន​មេរោគ​ថ្លើម​ប្រភេទ​B​។ បើកាលណា​វត្តមាន​មេរោគ​នៅក្នុង​ឈាមមាន​ចំនួន​លើសពី ១០​ម៉ឺន UI ស្ត្រី​មាន​ផ្ទៃពោះ​តម្រូវ​ឲ្យ​ប្រើ​ថ្នាំ​ប្រឆាំងនឹង​មេរោគ​រលាក​ថ្លើម​ប្រភេទ​B រហូត​ដល់ពេល​សម្រាល ដើម្បី​កាត់បន្ថយ​ការចម្លង​មេរោគ​ទៅ​ទារក​។​

​បន្ទាប់ពី​សម្រាល​ក្នុង​រយៈពេល​២៤​ម៉ោង ទារក​ត្រូវបាន​ចាក់​ថ្នាំ​បង្ការ​ការពារ​រលាក​ថ្លើម​ប្រភេទ​B ទើប​អាចឱ្យ​ទារក​បៅដោះ​ម្តាយ​បាន​។ ហើយ​ទារក​ត្រូវ​បន្ត​ចាក់​វ៉ាក់សាំង​បង្ការ​រលាក​ថ្លើម​ប្រភេទ​B នេះ គ្រប់​ចំនួន​៣​ដង ដោយ​លើក​ទី​២ នៅ​១​ខែ​បន្ទាប់ និង​លើក​ទី​៣ នៅ​៦​ខែ​បន្ទាប់ ឫ​តាម​ការកំណត់ ឫ​ណាត់​ដោយ​គ្រូពេទ្យ​របស់​អ្នក​៕