ភាគច្រើននៃពួកយើងសុទ្ធតែបានហើយថា ការបន្ថែមផ្លែចេកចូលក្នុងរបបអាហារប្រចាំថ្ងៃអាចផ្ដល់អត្ថប្រយោជន៍ច្រើនយ៉ាងណាចំពោះទាំងសុខភាពរាងកាយ និងសម្រស់។ (អាន ៖ ចេះតែអស់កម្លាំង ឈឺសាច់ដុំ ដេកមិនលក់ អារម្មណ៍ភិតភ័យអាចដោះស្រាយបាន) ផ្លែឈើត្រូពិចនេះ គឺថែមទាំងមានប្រសិទ្ធិភាពដោះស្រាយបញ្ហាទល់លាមក ក៏ដូចជាកាត់បន្ថយសម្ពាធឈាម បង្ការជំងឺលើសឈាម។ ទោះជាយ៉ាងណា មានមនុស្សមិនច្រើនទេដែលដឹងថា ប្រសិនបើអ្នកយកផ្លែចេកទៅធ្វើជាតែនោះវានឹងប្រែជាអាចផ្ដល់អត្ថប្រយោជន៍កាន់តែប្រសើរពេញលេញថែមទៀតចំពោះសុខភាព។ ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីវិធីងាយៗក្នុងការធ្វើតែចេក និងអត្ថប្រយោជន៍ដ៏មិនគួរឲ្យនៃតែនេះលើរាងកាយ ៖

– អ្វីដែលអ្នកត្រូវការ ៖ ចេកធម្មជាតិ ១ ផ្លែ ទំហំល្មម, ទឹកធម្មតា ៦ ពែង និងទឹកឃ្មុំ។

– របៀបធ្វើ ៖ ជាដំបូង លាងផ្លែចេកឲ្យស្អាតសិន និងកាត់ផ្នែកខាងចុងនៃចេកចោល។ បន្ទាប់មក ដាក់ដាំទឹក ៦ ពែងក្នុងឆ្នាំងដល់ពុះ។ នៅពេលទឹកចាប់ផ្ដើមពុះ ចូរដាក់ចេកចូល។ ទុករម្ងាស់ចេកក្នុងទឹកប្រហែល ១០ នាទី សឹមពន្លត់ភ្លើងចង្ក្រាន។ ទុកឲ្យចុះត្រជាក់បន្តិចសិន សឹមស្រងយកចេកចេញ រួមបន្ថែមទឹកឃ្មុំចូលដើម្បីបង្កើនរសជាតិជាការស្រេច។

– អត្ថប្រយោជន៍នៃការទទួលទានតែចេក

១. ជួយឲ្យគេងលក់បានស្រួល

ត្រឹមតែ ១ ពែង នៃតែចេកនៅពេលចូលគេង គឺអាចដោះស្រាយបញ្ហាគេងមិនលក់បានយ៉ាងប្រសើរ។ តែចេកមានប្រសិទ្ធិភាពហាក់ដូចជាថ្នាំគេងលក់អញ្ចឹង ប៉ុន្តែវាមិនផ្ដល់ផលប៉ះពាល់អ្វីចំពោះសុខភាពដូចថ្នាំឡើយ។

២. ជួយកាត់បន្ថយសម្ពាធឈាម

តើអ្នកកំពុងជួបប្រទះបញ្ហាសម្ពាធឈាមឡើងខ្ពស់ ឬកំពុងកើតជំងឺលើសឈាមមែនទេ? ចូរទទួលទានតែចេកជាប្រចាំ ក៏ព្រោះតែនេះមានផ្ទុកនូវជាតិប៉ូតាស្យូមដែលជួយកាត់បន្ថយកម្រិតនៃសម្ពាធឈាមឡើងខ្ពស់។ ប៉ុន្តែទោះជាយ៉ាងណា បើអ្នកកំពុងប្រើប្រាស់ថ្នាំបន្ថយសម្ពាធឈាមនោះ ចូរធ្វើការពិគ្រោះជាមួយគ្រូពេទ្យសិន មុននឹងទទួលទានតែចេកបន្ថែម។

៣. សម្រួលការរំលាយអាហារ

គ្រាន់តែទទួលទានតែចេក ១ ពែង ភ្លាម ក្រោយញុាំអាហាររួច គឺអាចជួយបង្កើនដំណើរនៃការរំលាយអាហារគួរឲ្យកត់សម្គាល់។ តែចេកជួយឲ្យរាងកាយរំលាយអាហារបានងាយជាងមុន ហើយស្រូបយកសារធាតុចិញ្ចឹមពីអាហារបានកាន់តែច្រើន។ លើសពីនេះទៅទៀត តែចេក ក៏ទប់ស្កាត់បញ្ហានៃការច្រាលទឹកអាស៊ីតក្រពះបានដែរ។

៤. ជួយពង្រឹងប្រព័ន្ធភាពស៊ាំនៃរាងកាយ

តែចេក ក៏មានផ្ទុកសម្បូរទៅដោយវីតាមីន C ផងដែរ ហើយនេះជាហេតុផលដែលអ្នកគួរព្យាយាមទទួលទានតែចេក ១ ពែង ជាប្រចាំ ដើម្បីរក្សាបាននូវភាពរឹងមាំនៃប្រព័ន្ធភាពស៊ាំ និងធ្វើឲ្យប្រព័ន្ធភាពស៊ាំកាន់តែប្រសើរឡើង។ អ្នកនឹងសម្គាល់ឃើញលទ្ធផល ជាពិសេសកំឡុងពេលរដូវនៃជំងឺផ្ដាសាយ ឬរដូវត្រជាក់ចូលមកដល់៕