ការរក្សាឱ្យបាននូវស្ថានភាពស្បែកស្រស់ស្អាតគ្រប់ពេលមិនមែនងាយស្រួលឡើយជាពិសេសប្រសិនបើជាប្រចាំអ្នកតែងស្ថិតក្រោមកម្ដៅថ្ងៃ, ខ្យល់ និងភាពប្រែប្រួលនៃអាកាសធាតុ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កត្តាបរិយាកាសអាចជះឥទ្ធិពលចំពោះស្បែកដែលនាំឱ្យស្ងួត និងស្រអាប់មិនភ្លឺរលោង។ ទោះជាយ៉ាងណាកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអ្វីដែលអ្នកគួរផ្លាស់ប្ដូរក្នុងរបបអាហារប្រចាំដើម្បីរក្សាបាននូវសុខភាពស្បែកល្អប្រសើរស្រស់ស្អាត ៖

១. រួមបញ្ចូលត្រីសាលម៉ុន (Salmon)

ត្រីសាលម៉ុនជាប្រភពដ៏ប្រសើរនៃអាស៊ីតខ្លាញ់អូមេហ្កា ៣ ដែលជួយកម្ចាត់រ៉ាឌីកាល់សេរីក្នុងរាងកាយ និងធ្វើឱ្យភាពបត់បែននៃស្បែកកាន់តែមានលក្ខណៈប្រសើរឡើង។ ជាលទ្ធផលអ្នកនឹងអាចទប់ស្កាត់ ឬពន្យឺតរាល់សញ្ញានៃភាពចាស់តាមវ័យដូចជាស្នាមខ្សែលើស្បែក និងស្នាមជ្រីវជ្រួញជាដើម។

២. កាត់បន្ថយអាហារសម្បូរជាតិស្ករ

ស្ករ គឺជាប្រភេទនៃអាហារដែលធ្វើអោយស្បែកឆាប់ចាស់ជាងវ័យលឿនបំផុត ហើយវាក៏បង្កផលប៉ះពាល់ដល់ប្រព័ន្ធភាពស៊ាំរាងកាយផងដែរ។ ស្ករក៏ពន្លឿនការលេចឡើងនៃស្នាមជ្រីវជ្រួញ និងធ្វើអោយស្បែកស្រអាប់គ្មានពន្លឺដោយសារវាបំផ្លាញកូឡាជែននិងភាពបត់បែននៃស្បែក។ ព្យាយាមទទួលទានផ្លែឈើជំនួសការទទួលស្ករ ឬអាហារផ្អែមច្រើនហួស។ ទឹកផ្លែឈើកំប៉ុង ឬដបក៏ដូចគ្នា! ភេសជ្ជៈប្រភេទនេះមានផ្ទុកសម្បូរទៅដោយជាតិស្ករមិនចាញ់ភេសជ្ជៈសូដា ឬភេសជ្ជៈកំប៉ុងឡើយ! ជាតិស្ករនៅក្នុងទឹកផ្លែឈើកំប៉ុង ឬដបផ្ដល់ផលអាក្រក់គួរឱ្យព្រួយបារម្ភចំពោះស្បែក ដោយវាបំបែកកូឡាជែនដ៏សំខាន់ក្នុងស្បែក។ លើសពីនេះទៅទៀត ទឹកផ្លែឈើកំប៉ុង ឬដបគ្មានផ្ទុកជាតិសសៃដែលស្បែកត្រូវការចាំបាច់គ្រប់គ្រាន់ឡើយ។ ដូច្នេះដើម្បីជាការប្រសើរចំពោះសុខភាពស្បែកជៀសផុតពីជាតិពុល ក៏ដូចជាបញ្ហានានា ហើយទទួលបាននូវវីតាមីន និងជាតិរ៉ែល្អៗ អ្នកអាចកិនផ្លែឈើស្រស់ ឬបន្លែជាភេសជ្ជៈយកមកទទួលទានដោយខ្លួនឯង ជំនួសការទិញទឹកផ្លែឈើកំប៉ុង ឬដបមកទទួលទាន។អ្នកក៏អាចទទួលទានផ្លែឈើស្រស់ៗតែម្ដង ដើម្បីទទួលបាននូវសារធាតុប្រឆាំងអុកស៊ីតកម្ម និងវីតាមីនពេញលេញដែលមានផ្ទុកក្នុងផ្លែឈើ

៣. កុំភ្លេចស៊ុត

អាហារមួយប្រភេទទៀតដែលអ្នកគួររួមបញ្ចូលក្នុងរបបអាហារ គឺសុទ្ធ។ នេះក៏ព្រោះតែស៊ុតជាប្រភពដ៏ប្រសើរនៃប្រូតេអ៊ីនដែលរាងកាយត្រូវការដើម្បីជួសជុលកោសិកាដែលទទួលរងការខូចខាតដោយសាររ៉ាឌីកាល់សេរី។ ស៊ុតក៏មានផ្ទុកសម្បូរទៅដោយប្រូបាយអូទីនដែលសំខាន់សម្រាប់ការពារស្បែកប្រឆាំងភាពស្ងួតផងដែរ។

៤. គ្រាប់ធញ្ញជាតិនិងគ្រាប់ពូជ

អ្នកក៏ចាំបាច់គួររួមបញ្ចូលគ្រាប់ធញ្ញជាតិនិងគ្រាប់ពូជក្នុងរបបអាហារផងដែរ។ គ្រាប់ធញ្ញជាតិនិងគ្រាប់ពូជមិនត្រឹមតែជាអាហារសម្រន់ដ៏ឆ្ងាញ់ប៉ុណ្ណោះទេ ប៉ុន្តែការរួមបញ្ចូលវាក្នុងអាហារអាចជួយរក្សាសុខភាពស្បែកគួរឱ្យកត់សម្គាល់។ នេះក៏ព្រោះតែវាមានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ដែលផ្ដល់សំណើមដល់ស្បែក។ ការទទួលទានគ្រាប់ធញ្ញជាតិនិងគ្រាប់ពូជអាចការពារស្បែកទប់ស្កាត់ភាពស្ងួត ក៏ដូចជាភាពចាស់តាមវ័យនៃស្បែក។ ទោះជាយ៉ាងណាកុំជ្រើសរើសទទួលទានប្រភេទដែលមានលាយគ្រឿងផ្សំដូចជាអំបិល និងមិនគួរញ៊ាំលើសពីមួយក្ដាប់ដៃក្នុងមួយថ្ងៃឡើយ។

៥. កុំរំលងប្រូខូលី ឬផ្កាខាត់ណាខៀវ

បន្លែនេះជាប្រភពដ៏ប្រសើរនៃវីតាមីន C វីតាមីន K ជាតិសសៃ សារធាតុប្រឆាំងអុកស៊ីតកម្ម សារធាតុ folate កាល់ស្យូម និង lutein ដែលមានប្រសិទ្ធិភាពខ្ពស់ជួយប្រយុទ្ធប្រឆាំងភាពចាស់តាមវ័យ និងការរលាកគួរអោយកត់សម្គាល់។ រាងកាយត្រូវការវីតាមីន C ដើម្បីបង្កើនការផលិតកូឡាជែនដែលរក្សាភាពបត់បែន និងរឹងមាំនៃស្បែក។

៦. ញ៊ាំការ៉ុតផង

ជាប្រភពដ៏ប្រសើរនៃវីតាមីន A ដែលមិនត្រឹមតែល្អសម្រាប់សុខភាពភ្នែកប៉ុណ្ណោះទេ ប៉ុន្តែក៏ជួយកម្ចាត់មុន និងការរលាកលើស្បែកផងដែរ។ វីតាមីន A ឬ beta-carotene កាត់បន្ថយការផលិតហួសកម្រិតនៃកោសិកាស្បែកក្នុងស្រទាប់ខាងក្រៅនៃស្បែក។ ហើយវាក៏ជួយកាត់បន្ថយការប្រមូលផ្ដុំនៃកោសិកាស្បែកងាប់ៗដែលអាចបង្កការរាំងស្ទះដល់រន្ធញើសផងដែរ។

៧. ចៀសវាងសាច់កែច្នៃ

សាច់កែច្នៃមានផ្ទុកសម្បូរទៅដោយជាតិប្រៃ ឬអំបិលដែលអាចធ្វើឱ្យអ្នកមានអាការៈហើម។ សាច់ប្រភេទនេះក៏ជាប្រភពនៃសារធាតុ nitrites ដែលបំផ្លាញកូឡាជែន និងភាពបត់បែនក្នុងស្បែកផងដែរ។ ការទទួលទានសាច់កែច្នៃក៏អាចធ្វើឱ្យស្បែកឆាប់ចាស់ជាងអាយុផងដែរ ដោយវាគ្មានផ្ទុកសារធាតុចិញ្ចឹមល្អៗដើម្បីទ្រង់ទ្រង់សុខភាពស្បែករក្សាភាពក្មេងជាងវ័យ។ ដូច្នេះដើម្បីជៀសផុតពីគ្រោះថ្នាក់ កុំទទួលទានសាច់កែច្នៃច្រើនពេក និងមិនត្រូវទទួលទានរាល់ថ្ងៃឡើយ។ អ្នកក៏គួរកម្រិនការទទួលទានសាច់ក្រហមដូចគ្នា! នោះក៏ព្រោះតែសាច់ក្រហមមានផ្ទុកជាតិ carnitine ខ្ពស់ដែលអាចធ្វើឱ្យជញ្ជាំងសសៃឈាមឡើងរឹងបង្កបញ្ហានៃភាពចាស់ជាងវ័យ៕