ទោះបីជាស្គាល់ និងឧស្សាហ៍ទទួលទានទឹកឃ្មុំ ប៉ុន្តែភាគច្រើននៃពួកយើងប្រហែលជាមិនធ្លាប់ដឹងទេថា វាអាចផ្ដល់អត្ថប្រយោជន៍ជាច្រើនចំពោះសម្រស់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើទឹកឃ្មុំជួយអ្វីខ្លះដល់សម្រស់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រើប្រាស់ទឹកឃ្មុំដោះស្រាយបញ្ហាសម្រស់ ៖

១. ធ្វើឱ្យស្នាមសំលាកមើលលែងសូវឃើញ

អ្វីដែលអ្នកត្រូវធ្វើ គឺគ្រាន់តែលាយទឺកឃ្មុំ ១ ស្លាបព្រាកាហ្វជាមួយប្រេងដូង ឬប្រេងអូលីវ ១ ស្លាបព្រាកាហ្វេ។ កូរលាយឱ្យសព្វ សឹមប្រើចុងម្រាមដៃលាបម៉ាស្សាល្បាយលើតំបន់ស្បែកដែលទទួលរងផលប៉ះពាល់ក្នុងចលនាបែបរង្វង់សម្រាប់រយៈពេល ២ នាទី។ បន្ទាប់មកដាក់គ្រប់ក្រណាត់ស្អាតជ្រលក់ទឹកក្ដៅឧណ្ហៗលើស្បែក និងរងចាំរហូតដល់ស្ងួត។ អនុវត្តសារឡើងវិញជាប្រចាំ។

២. ម៉ាសផ្ដល់សំណើម

អ្វីដែលអ្នកត្រូវធ្វើ គឺគ្រាន់តែលាបម៉ាស្សាទឹកឃ្មុំលើស្បែកដែលស្ងួត ក្រោយពេលលាងសម្អាតរួច។ រងចាំសម្រាប់រយៈពេលពី ១៥ ទៅ ២០ នាទី សឹមលាងសម្អាតចេញជាមួយទឹកក្ដៅឧណ្ហៗ។

៣. រូបមន្តសម្រាប់ខាត់ស្បែក

លាយទឹកឃ្មុំ ២ ស្លាបព្រាបាយជាមួយម្សៅ Baking soda ១ ស្លាបព្រាបាយ។ លាងសម្អាតស្បែកជាមួយទឹក បន្ទាប់មកសឹមលាបដុសខាត់ល្បាយថ្នមៗលើស្បែកមុខ ឬរាងកាយក្នុងចលនាបែបរង្វង់។ លាងសម្អាតចេញជាមួយទឹកធម្មតា។ អ្នកអាចលាយទឹកដោះគោស្រស់ ២ ស្លាបព្រាកាហ្វេ ជាមួយទឹកឃ្មុំ ២ ស្លាបព្រាបាយ។ លាបម៉ាស្សាល្បាយនេះលើស្បែកមុខនិងរងចាំសម្រាប់រយៈពេល ១០ នាទីមុនពេលលាងសម្អាតចេញ។

៤. ព្យាបាលមុន

លាបផ្ដិតៗទឹកឃ្មុំលើតំបន់ស្បែកដែលទទួលរងផលប៉ះពាល់។ រងចាំសម្រាប់រយៈពេលពី ១០ ទៅ ១៥ នាទី សឹមលាងសម្អាតចេញជាមួយទឹកក្ដៅឧណ្ហៗ។

៥. ព្យាបាលសក់ខូច

គ្រាន់តែលាយទឹកឃ្មុំ ១ ស្លាបព្រាកាហ្វេក្នុងសាប៊ូកក់សក់ដែលអ្នកប្រើជាប្រចាំ។ អ្នកក៏អាចលាយជាមួយប្រេងអូលីវផងដែរសម្រាប់ប្រើជាក្រែមបន្ទន់សក់។ បន្ទាប់ពីកក់ល្បាយពេញសក់ហើយនោះ ចូរប្រើប្រាស់កន្សែងរុំសក់ឱ្យជិតសម្រាប់រយៈពេល ២០ នាទី មុនពេលកក់ជាមួយសាប៊ូដូចពេលធម្មតា។

៦. ជួយឱ្យស្រកទម្ងន់

អ្វីដែលអ្នកត្រូវធ្វើ គឺគ្រាន់តែលាយទឹកឃ្មុំ ១ ស្លាបព្រាកាហ្វេក្នុងតែខ្ញី ១ ពែង។ កូរឱ្យសព្វ សឹមទទួលទាន ២០ នាទីមុនពេលអាហារ។

៧. ទប់ស្កាត់បញ្ហាស្បែកយារធ្លាក់

ទឹកឃ្មុំមានផ្ទុកលក្ខណៈសម្បត្តិប្រឆាំងដំណើរការនៃភាពចាស់តាមវ័យ ប្រឆាំងអុកស៊ីតកម្ម និងផ្ដល់សំណើមដែលអាចជួយទប់ស្កាត់បញ្ហាស្បែកយារធ្លាក់។ អ្វីដែលអ្នកត្រូវធ្វើ គឺគ្រាន់តែលាយប្រេងអូលីវនិងទឹកក្រូចឆ្មារស្រស់ពី ២ ទៅ ៣ ដំណក់ជាមួយទឹកឃ្មុំ ៣ ស្លាបព្រាកាហ្វេ។ កូរឱ្យសព្វ សឹមលាបម៉ាស្សាល្បាយលើស្បែកមុខ ក៏ដូចជាក។ លាងសម្អាតចេញតាមក្រោយ។ អ្នកគួរអនុវត្តរូបមន្តនេះឱ្យបានយ៉ាងហោចណាស់ ២ ដងក្នុងមួយថ្ងៃ។

ចំណាំ៖ ចូរជ្រើសរើសប្រើប្រាស់ទឹកឃ្មុំសុទ្ធសរីរាង្គដែលមានគុណភាពខ្ពស់ទើបប្រសើរ៕