Join with Health.com.kh on Telegram

រដ្ឋាភិបាល​ថៃ កាលពី​ថ្ងៃ​ព្រហស្បតិ៍​បាន​រាយការណ៍​អំពី​ការស្លាប់​ថ្មី​ចំនួន​ពីរ​នាក់​ដោយសារ Covid-19 និង ២៧១​ករណី​ថ្មី ដែល​ឆ្លង​ក្នុងស្រុក​ចំនួន ២៥៩​ករណី និង​ការឆ្លង​នាំចូល​ចំនួន​១២​ករណី នាំ​ឱ​ចំនួន​អ្នក​ឆ្លង​សរុប​បាន​កើន​ឡើងដល់ ១១.២៦២ ករណី​។​

​លោក Taweesilp Visanuyothin អ្នកនាំពាក្យ​មជ្ឈមណ្ឌល​គ្រប់គ្រង​ស្ថានភាព Covid-19 បាន​និយាយថា​អ្នកស្លាប់​ម្នាក់​ក្នុងចំណោម​បុរស​២​នាក់ គឺ​បុរស​ជនជាតិ​អង់គ្លេស អាយុ ៧១ ឆ្នាំ ដែលមាន​ជំងឺ​ទឹកនោមផ្អែម ជំងឺ​ក្រ​ពេញទី​រ៉ូ​អ៊ី​ត និង​មហារីក​សួត​។​

​គាត់​បានមកពី​ទីក្រុង​ឡុង​ដ៍​កាលពី​ថ្ងៃទី​៧ ខែធ្នូ ហើយ​ត្រូវ​បានដាក់​ឲ្យ​នៅ​ដាច់​ពី​គេ​។ នៅ​ថ្ងៃទី​១១ ខែធ្នូ គាត់​មាន​គ្រុនក្តៅ ក្អក និង​ស្លេស្ម ហើយ​ត្រូវបាន​បញ្ជូនទៅ​មន្ទីរពេទ្យ​ឯកជន​មួយ​ដែល​គាត់​ត្រូវបាន​គេ​ធ្វើ​រោគវិនិច្ឆ័យ​ថា​មាន​ជំងឺ​រលាក​សួត​។ ស្ថានភាព​របស់គាត់​កាន់តែ​យ៉ាប់យ៉ឺន​បន្តិច​ម្តងៗ រហូតដល់​គាត់​ទទួលមរណភាព​កាលពី​ថ្ងៃ​ពុធ​។​

​អ្នកស្លាប់​ម្នាក់ទៀត​ជា​ពលករ​ថៃ ភេទ​ប្រុស អាយុ ៥៣​ឆ្នាំ មាន​ជំងឺ​ទឹកនោមផ្អែម​។ ចាប់ពី​ថ្ងៃទី​២៦ ដល់​ថ្ងៃទី​៣០ ខែធ្នូ ២០២០ គាត់​បានធ្វើ​ដំណើរ​ដោយ​យានយន្ត​ឯកជន​ទៅកាន់​ចន្ថា​បូរី ឈុន​បូរី និង​ខេត្ត ផេ​ត​ឆា​បូរី​។​

​នៅ​ថ្ងៃទី​៣ ខែមករា ២០២១ គាត់​មាន​អាកា​រៈ​គ្រុនក្តៅ ក្អក​ស្លេស្ម និង​ឈឺក្បាល​។ នៅ​ថ្ងៃទី​៥ ខែមករា គាត់​បាន​ស្វែងរក​ការព្យាបាល​នៅ​មន្ទីរពេទ្យ​មួយ​ក្នុង​ខេត្ត ណុន​ថា​បូរី ជា​កន្លែង​ដែល​គាត់​បានធ្វើ​តេ​ស្តិ៍​វិជ្ជមាន Covid-19 ហើយ​ត្រូវបាន​គេ​ធ្វើ​រោគវិនិច្ឆ័យ​ថា​មាន​ជំងឺ​រលាក​សួត​។ ស្ថានភាព​របស់គាត់​ប្រែជា​ធ្ងន់ធ្ងរ​នៅ​ថ្ងៃអាទិត្យ ហើយ​គាត់​បានទទួល​មរណភាព​នៅ​យប់​ថ្ងៃ​ពុធ​។​

​ករណី​ថ្មី​ចំនួន ២៧១​ករណី​រួមមាន ១៨១​ករណី​ត្រូវបាន​បញ្ជាក់​តាមរយៈ​ការស្វែងរក​ករណី​សកម្ម​, ៧៨ ករណី​ត្រូវបាន​រកឃើញ​នៅក្នុង​ប្រព័ន្ធ​សុខាភិបាល​ធម្មតា​, ១១​ករណី​គឺ​អ្នកធ្វើ​ច​ត្តា​ឡី​ស័ក​មកពី​៩​ប្រទេស និង​ជន​មាតុភូមិនិវត្តន៍​ខុសច្បាប់​ម្នាក់​មកពី​ប្រទេស​ម៉ាឡេស៊ី​៕​