ប្រទេសឥណ្ឌូនេស៊ីបានចាប់ផ្តើមចាក់វ៉ាក់សាំងការពារវីរុសកូរ៉ូណារបស់ខ្លួនកាលពីថ្ងៃពុធដោយប្រធានាធិបតី Joko Widodo បានទទួលវ៉ាក់សាំងដំបូងដែលផលិតដោយចិន។
ការចាក់វ៉ាក់សាំងនេះ ត្រូវបានផ្សាយផ្ទាល់ដើម្បីធានាដល់សាធារណជនថាវ៉ាក់សាំងដែលផ្តល់ដោយរដ្ឋាភិបាលដល់ប្រជាជនឥណ្ឌូនេស៊ី គឺមានសុវត្ថិភាព។
ការចាប់ផ្តើមចាក់វ៉ាក់សាំងនេះបានធ្វើឡើងបន្ទាប់ពីមានការយល់ព្រមពីការប្រើជាបន្ទាន់របស់រដ្ឋាភិបាលកាលពីថ្ងៃច័ន្ទនៃវ៉ាក់សាំង CoronaVac ពីក្រុមហ៊ុន Sinovac Biotech របស់ប្រទេសចិន។
បុគ្គលិកសុខាភិបាលជាង ១,៤៥ លាននាក់ដែលមានអាយុចន្លោះពី ១៨ ទៅ ៥៩ ឆ្នាំនឹងទទួលការចាក់ចំនួន ២ ដងក្នុងខែមករា និងកុម្ភៈ នេះបើយោងតាមរដ្ឋមន្ត្រីសុខាភិបាលលោក Budi Gunadi Sadikin ។
លោករដ្ឋមន្ត្រីបាននិយាយថា មនុស្សដែលមានអាយុលើសពី ៦០ ឆ្នាំនឹងត្រូវរង់ចាំយូរជាងនេះបន្តិច ដើម្បីចាក់វ៉ាក់សាំងខណៈដែលពួកគេត្រូវបានគេសន្មត់ថានឹងទទួលថ្នាំបង្ការពីក្រុមហ៊ុនផលិតឱសថអាមេរិច Pfizer និងក្រុមហ៊ុនផលិតឱសថអង់គ្លេស AstraZeneca ។
ប្រទេសឥណ្ឌូនេស៊ីមានគោលបំណងចាក់វ៉ាក់សាំងប្រហែល ១៨២ លាននាក់ក្នុងចំណោមប្រជាជន ២៧០ លាននាក់៕
