រាងកាយនឹងមានសុខភាពល្អនៅពេលណាដែលរាល់សរីរាង្គនិងប្រព័ន្ធផ្សេងៗក្នុងរាងកាយដំណើរការប្រក្រតី។ ប៉ុន្តែអ្វីដែលគួរឱ្យកត់សម្គាល់នោះ គឺប្រសិនបើមួយក្នុងចំណោមប្រព័ន្ធផ្សេងៗក្នុងរាងកាយដូចជាប្រព័ន្ធភាពស៊ាំ ប្រព័ន្ធសសៃឈាមបេះដូង ឬសូម្បីតែប្រព័ន្ធរំលាយអាហារចាប់ផ្ដើមដំណើរការខុសប្រក្រតី នោះផ្នែកផ្សេងទៀតនៃរាងកាយអាចទទួលរងផលប៉ះពាល់គួរឱ្យព្រួយបារម្ភ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដូច្នេះសម្រាប់អ្នកដែលមានបញ្ហាពាក់ព័ន្ធនឹងប្រព័ន្ធរំលាយអាហារ គឺមិនត្រឹមតែជួយប្រទះអាការៈរាញ ហើមពោះ ឬឡើងហ្គាសប៉ុណ្ណោះទេ ប៉ុន្តែក៏ងាយនឹងប្រឈមមុខជាមួយហានិភ័យនៃជំងឺទឹកនោមផ្អែម អតុល្យភាពនៃអ័រម៉ូន និងសូម្បីតែជំងឺថប់បារម្ភជាដើម។ នេះហើយជាមូលហេតុដែលអ្នកចាំបាច់គួររក្សាឱ្យបាននូវសុខភាពប្រព័ន្ធរំលាយអាហារមានសុខភាពល្អនិងដំណើរការបានប្រក្រតី។ ថាតើប្រព័ន្ធរំលាយអាហារគ្មានសុខភាពល្អអាចបង្កជារោគសញ្ញា ឬអាការៈអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរោគសញ្ញាស្មានមិនដល់មួយចំនួននៃបញ្ហាខ្សោយប្រព័ន្ធរំលាយអាហារ ៖
១. ភ្លាមៗស្រាប់តែប្រតិកម្មនឹងអាហារមួយចំនួន
ប្រព័ន្ធរំលាយអាហារទទួលខុសត្រូវក្នុងការបំបែកអាហារនិងកម្ចាត់រាល់ជាតិពុលចេញពីអ្វីដែលពួកយើងបានទទួលទានចូល។ នៅពេលពោះវៀនមានបញ្ហានោះរាងកាយមិនអាចកម្ចាត់ជាតិពុលពីក្នុងអាហារឡើយដែលជាលទ្ធផលនៃការប្រតិកម្មនឹងអាហារមួយចំនួនភ្លាមៗ។ រោគសញ្ញានៃប្រតិកម្មអាហាររួមមានចង្អោរចង់ក្អួត ឈឺពោះ ឡើងជាតិហ្គាស ពិបាករំលាយអាហារ រមួលក្នុងពោះ និងរាគជាដើម។
២. ស្ត្រេស ឬតានតឹងក្នុងអារម្មណ៍
ប្រសិនបើអ្នកសម្គាល់ឃើញថាខ្លួនឯងតែងមានអារម្មណ៍ស្ត្រេស ថប់បារម្ភ ឬសូម្បីតែបាក់ទឹកចិត្តជាប្រចាំ នោះវាក៏អាចបណ្ដាលមកពីប្រព័ន្ធរំលាយអាហារកំពុងមានបញ្ហាដែរ។ អ្នកគួរដឹងថាស្រទាប់នៃពោះវផនមានសសៃឈាមដែលមានជាលិកាស្រដៀងនឹងខួរក្បាល។ សសៃប្រសាទខ្លួនវាផ្ទាល់ គឺជាអ្នកដែលបង្ហាញសញ្ញាដល់ខួរក្បាល។ បន្ថែមពីនេះពោះវៀនក៏ជាសរីរាង្គមួយដែលទទួលខុសត្រូវសម្រាប់ការផលិតអ័រម៉ូនរីករាយផងដែរ។ ដូច្នេះប្រសិនបើប្រព័ន្ធរំលាយអាហារដំណើរការមិនប្រក្រតី អ្នកនឹងមិនអាចគ្រប់គ្រងស្ត្រេសបានល្អឡើយ។
៣. អារម្មណ៍ឆាប់ប្រែប្រួល
អ្នកដែលមានប្រព័ន្ធរំលាយអាហារខ្សោយងាយនឹងមានអារម្មណ៍ឆាប់មួរម៉ៅ ឬឆាប់ប្រែប្រួលណាស់។ នេះក៏ព្រោះតែប្រព័ន្ធរំលាយអាហារដែលគ្មានតុល្យភាពត្រឹមត្រូវអាចជះផលប៉ះពាល់ដល់កម្រិតនៃអ័រម៉ូន។ ជាលទ្ធផលអារម្មណ៍ប្រាកដជាប្រែប្រួលខុសធម្មតា។
៤. ពិបាកគេងលក់បានស្កប់
ដើម្បីគេងលក់បានស្កប់យើងត្រូវការអ័រម៉ូនសេរ៉ូតូនីន (serotonin) ដែលមានប្រសិទ្ធភាពជួយរាងកាយក្នុងការគ្រប់គ្រងអារម្មណ៍និងរដ្ដនៃការគេង។ ហើយប្រសិនបើដំណើរការមុខងារពោះវៀនមិនប្រក្រតីទេនោះបញ្ហាពិបាកគេងនឹងកើតឡើងដែលបង្កជាជំងឺគេងមិនលក់ជះឥទ្ធិពលដល់ប្រព័ន្ធភាពស៊ាំរាងកាយងាយប្រឈមមុខជាមួយជំងឺផ្សេងៗ។
៥. បញ្ហាស្បែកផ្សេងៗ
ប្រសិនបើអ្នកតែងតែកើតមុនជាប្រចាំ ឬមានបញញហាស្បែកផ្សេងៗ វាប្រហែលបណ្ដាលមកពីសុខភាពពោះវៀនមិនល្អហើយ។ នៅពេលពោះវៀនទទួលរងការរលាក វាអាចបង្កជាបញ្ហារោគមុនលើស្បែក។
៦. សក់ជ្រុះកាន់តែខ្លាំង
សក់ជ្រុះអាចជាបញ្ហាទូទៅបំផុតមួយ ប៉ុន្តែប្រសិនបើសក់ជ្រុះខ្លាំងពេក ឬក្នុងបរិមាណច្រើន ហើយអ្នកអាចសម្គាល់ឃើញចំណុចទំពែកនោះវាអាចជាអាការៈគួរឱ្យកត់សម្គាល់នៃភាពមិនប្រក្រតីនៃសុខភាពពោះវៀន។ ក្រៅពីភាពតានតឹងក្នុងអារម្មណ៍ ឬបញ្ហាពោះវៀនក៏អាចបណ្ដាលឱ្យសក់ជ្រុះ និងប្រែជាស្ដើងផងដែរ។ នេះក៏ព្រោះតែពោះវៀនមានតួនាទីក្នុងការផលិតវីតាមីន B7 ឬបាយអូទីនដែលជួយទប់ស្កាត់សក់ជ្រុះនិងជំងឺស្បែកផ្សេងៗ។
៧. ការចងចាំចុះខ្សោយ
ពិបាកចងចាំ ឬមិនអាចប្រមូលផ្ដុំអារម្មណ៍បានល្អមែនទេ? ប្រព័ន្ធរំលាយអាហារមានបញ្ហាក៏ជាកត្តាចម្បងមួយនៃបញ្ហាទាក់ទងនឹងការចងចាំរបស់អ្នកផងដែរ។ បាក់តេរីក្នុងពោះវៀនត្រូវតែមានតុល្យភាពដើម្បីអាចដំណើរការមុខងាររំលាយអាហារដែលអ្នកបានទទួលទានចូលត្រឹមត្រូវ។ ដូច្នេះប្រសិនបើប្រព័ន្ធរំលាយអាហារ ឬពោះវៀនដំណើរការមិនប្រក្រតីទេនោះ វាអាចជះផលប៉ះពាល់ដល់ផ្នែកផ្សេងៗទៀតនៃរាងកាយរួមបញ្ចូលទាំងខួរក្បាល។ តាមរយៈការជ្រើសរើសទទួលទានអាហារបានត្រឹមត្រូវនិងការយកចិត្តទុកដាក់លើសុខភាពប្រព័ន្ធរំលាយអាហារ អ្នកមិនចាំបាច់បារម្ភពីបញ្ហាខ្សោយការចងចាំទៀតឡើយ។
៨. ឃ្លានមិនឈប់
ប្រសិនបើមិនប្រតិកម្មនឹងអាហារទេនោះ អ្នកអាចនឹងជួបប្រទះអាការៈផ្ទុយវិញដោយចេះតែឃ្លានអាហារមួយចំនួនមិនឈប់។ នេះក៏ព្រោះតែពោះវៀនដែលមានបញ្ហាមិនអាចដំណើរការបំបែកអាហារដែលពួកយើងទទួលទានបានត្រឹមត្រូវជាលទ្ធផលនៃអតុល្យភាព។ អតុល្យភាពនេះអាចបណ្ដាលឱ្យអ្នកប្រែជាឃ្លានខ្លាំងពិសេសអាហារសម្បូរជាតិស្ករនិងជាតិខ្លាញ់៕