តើអ្នកកំពុងជួបប្រទះបញ្ហានៃជំងឺថប់បារម្ភនិងពិបាកក្នុងការគេងលក់បានស្កប់មែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ទល់អាការៈនៃជំងឺថប់បារម្ភនិងគេងមិនលក់ ៖
១. បង្កើនការទទួលទានអាហារមានផ្ទុកអាស៊ីតខ្លាញ់អូមេហ្កា ៣
ពេលខ្លះអាហារដែលពួកយើងទទួលទានអាចដើរតួនាទីចំពោះបញ្ហាថប់បារម្ភ ឬពិបាកក្នុងការគេងផងដែរ។ ដូច្នេះប្រសិនបើអ្នកចង់កាត់បន្ថយអាការៈបៃជំងឺថប់បារម្ភនិងពិបាកក្នុងការគេងលក់ ចូរព្យាយាមទទួលទានអាហារសម្បូរអាស៊ីតខ្លាញ់អូមេហ្កា ៣។ មិនត្រឹមតែចាំបាច់សម្រាប់រក្សាសុខភាពបេះដូងប៉ុណ្ណោះទេ ប៉ុន្តែអាស៊ីតខ្លាញ់អូមេហ្កា ៣ ក៏ល្អសម្រាប់បំបាត់ថប់បារម្ភផងដែរ។ ប្រភពដ៏ប្រសើរបំផុតនៃអាស៊ីតខ្លាញ់អូមេហ្កា ៣ គឺត្រីសម្បូរខ្លាញ់ ស៊ុត និងគ្រាប់ធញ្ញជាតិ។ ទោះជាយ៉ាងណាអ្នកមិនគួរទទួលទានច្រើនពេកឡើយ។
២. បង្កើនការទទួលទានបន្លែបៃតង
បន្លែបៃតងជាប្រភពដ៏ប្រសើរនៃវីតាមីន ជាតិរ៉ែចាំបាច់ សារធាតុប្រឆាំងអុកស៊ីតកម្ម និងមានលក្ខណៈសម្បត្តិរក្សាតុល្យភាពអ័រម៉ូន។ ហើយបញ្ហានៃជំងឺថប់បារម្ភអាចបណ្ដាលមកពីអតុល្យភាពនៃអ័រម៉ូនក្នុងរាងកាយ។
៣. កុំរំលងតែបៃតង
តែបៃតងជាប្រភពដ៏ប្រសើរនៃសារធាតុ L-theanine ហើយការទទួលទានក្នុងកម្រិតត្រឹមត្រូវអាចជួយទប់ទល់អាការៈនៃជំងឺថប់បារម្ភគួរឱ្យកត់សម្គាល់។
៤. ចៀសវាងទទួលទានកាហ្វេច្រើនហួស
វាមិនមែនជារឿងចំលែកអ្វីឡើយដែលការទទួលទានកាហ្វេអាចបណ្ដាលឱ្យកើតមានអាការៈញ័រ ចង្អោរចង់ក្អួត និងបេះដូងលោតញាប់ខុសប្រក្រតី ជាពិសេសចំពោះអ្នកដែលចាញ់ជាតិកាហ្វេអ៊ីន។ ជាតិកាហ្វេអ៊ីនអាចបង្កបញ្ហានៃជំងឺថប់បារម្ភ ឬធ្វើឱ្យស្ថានភាពកាន់តែយ៉ាប់យ៊ឺនឡើង ប្រសិនបើអ្នកកំពុងជួបប្រទះបញ្ហានៃជំងឺនេះស្រាប់។ ដូច្នេះដើម្បីជាការប្រសើរ ចូរកាត់បន្ថយ ឬបញ្ឈប់ការទទួលទានកាហ្វេតែម្ដង។ ហើយអ្នកក៏គួរតែកម្រិតការទទួលទានភេសជ្ជៈមានផ្ទុកជាតិកាហ្វេអ៊ីនដទៃដូចជាតែ ភេសជ្ជៈកំប៉ុង និងភេសជ្ជៈប៉ូវកម្លាំងផង។
៥. ចៀសវាងទទួលទានអាហារកែច្នៃ
ការទទួលទានអាហារប្រភេទនេះសឹងគ្រប់ពេលអាចបង្កជាបញ្ហាថប់បារម្ភ ឬធ្លាក់ទឹកចិត្តនៅថ្ងៃណាមួយនាពេលអនាគត។ មកទល់នឹងពេលសព្វថ្ងៃនេះ ការសិក្សាស្រាវជ្រាវកាន់តែច្រើនឡើងៗកំពុងព្យាយាមបង្ហាញពីទំនាក់ទំនងរវាងជំងឺថប់បារម្ភ និងការទទួលទានអាហារកែច្នៃ។ វេជ្ជបណ្ឌិតជាច្រើនជឿថា គ្រឿងផ្សំមួយចំនួននៅក្នុងអាហារកែច្នៃ រួមបញ្ចូលទាំងស្ករចម្រាញ់ សារធាតុ GMO’s សារធាតុគ្លូទែន (Gluten) និងគ្រឿងផ្សំសិប្បនិម្មិតបន្ថែមរសជាតិផ្សេងទៀត គឺអាចបង្កការរំខានដល់សារធាតុគីមីរបស់ខួរក្បាលដែលនឹងនាំឱ្យកើតមានជំងឺថប់បារម្ភ ក៏ដូចជាធ្លាក់ទឹកចិត្
៦. ធ្វើលំហាត់ប្រាណ
ការធ្វើលំហាត់ប្រាណមិនត្រឹមតែល្អសម្រាប់សុខភាពរាងកាយប៉ុណ្ណោះទេ ប៉ុន្តែក៏អាចជួយឱ្យអ្នកមានអារម្មណ៍ល្អរីករាយផងដែរ។ នោះក៏ព្រោះតែខួរក្បាលពោរពេញទៅដោយអ័រម៉ូនរីករាយនៅពេលអ្នកធ្វើលំហាត់ប្រាណណាមួយ។ សកម្មភាពរាងកាយភាគច្រើនអាចរាប់ជាទម្រង់នៃលំហាត់ប្រាណ ដូច្នេះហើយទើបការដើរ ឬគ្រាន់តែរត់ត្រឹកៗជំនួសការអង្គុយ ឬគេងអាចជួយលើកអារម្មណ៍របស់អ្នកជៀសផុតពីអាការៈនៃជំងឺថប់បារម្ភ។ វាក៏ជាគំនិតដ៏ប្រសើរបំផុតមួយដែរក្នុងការចំណាយពេលនៅក្រោម ឬត្រូវពន្លឺព្រះអាទិត្យខ្លះ ក៏ព្រោះវាជាប្រភពដ៏ល្អនៃវីតាមីន D សារធាតុចិញ្ចឹមដ៏ចាំបាច់មួយសម្រាប់រក្សាអារម្មណ៍ស្រស់ស្រាយ។
៧. ធ្វើសមាធិ
ការធ្វើសមាធិជាប្រចាំនឹងធ្វើឱ្យអ្នកឆាប់គេងលក់ដោយវាជាវិធីដ៏ល្អដើម្បីបំបាត់ទុក្ខ ឬការគិតអវិជ្ជមាន។ ចិត្តស្ងប់នឹងជួយឱ្យអ្នកអាចគេងបានស្កប់គ្រប់គ្រាន់។ ហើយការធ្វើសមាធិជាវិធីដ៏ល្អបំផុតមួយសម្រាប់ភាពស្ងប់សុខក្នុងចិត្តនិងកាត់បន្ថយភាពតានតឹង ព្រមតាំងថប់បារម្ភបានយ៉ាងប្រសើរ។ ចូរចំណាយពេលពី ១០ ទៅ ១៥ នាទីក្នុងមួយថ្ងៃទៅអង្គុយកន្លែងស្ងាត់ ហើយធ្វើការសមាធិផ្ដោតអារម្មណ៍លើការដកដង្ហើមចេញចូលមួយៗជ្រៅបណ្ដោយចិត្ត៕