ស្មានមិនដល់សោះថា ស្លឹកគ្រៃ ផ្ដល់អត្ថប្រយោជន៍អស្ចារ្យច្រើនយ៉ាងនេះចំពោះសុខភាព

ស្លឹកគ្រៃ គឺមិនត្រឹមតែជាគ្រឿងផ្សំបង្កើនរសជាតិអាហារ និងផ្ដល់ក្លិនឈ្ងុយប៉ុណ្ណោះទេ ប៉ុន្តែក៏ជាឱសថបែបធម្មជាតិប្រយុទ្ធប្រឆាំងព្យាបាលជំងឺជាច្រើនផងដែរ។ (អាន ៖ ចេះតែអស់កម្លាំង ឈឺសាច់ដុំ ដេកមិនលក់អារម្មណ៍ភិតភ័យអាចដោះស្រាយបាន) ស្លឹកគ្រៃ គឺជាប្រភពដ៏សម្បូរបែបមួយនៃវីតាមីន A , វីតាមីន C, វីតាមីន B, អាស៊ីត folic, ម៉ាញ៉េស្យូម, ស័ង្កសី, ផូស្វ័រ, ប៉ូតាស្យូម, ជាតិដែក, កាល់ស្យូម និងទង់ដែង ដែលសុទ្ធសឹងតែជាសារធាតុល្អចាំបាច់ចំពោះរាងកាយ។ ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីអត្ថប្រយោជន៍ដ៏ប្រសើរមិនគួរឲ្យជឿមួយចំនួននៃស្លឹកគ្រៃក្នុងការទប់ស្កាត់ ក៏ដូចព្យាបាលបញ្ហាសុខភាពផ្សេងៗ ៖

១. ធ្វើឲ្យការរំលាយអាហារមានភាពប្រសើរឡើង

ស្លឹកគ្រៃ គឺជាជំនួយការដល់ល្អបំផុតមួយក្នុងដំណើរការនៃការរំលាយអាហារ។ លក្ខណៈសម្បិត្តសម្លាប់មេរោគរបស់ស្លឹកគ្រៃនឹងសម្លាប់ពពួកបាក់តេរី ក៏ដូចជាប៉ារ៉ាស៊ីតដែលបង្កផលប៉ះពាល់ដល់បំពង់រំលាយអាហារ ឬពោះវៀនធំ។ ឥទ្ធិពលវិជ្ជមាននៃស្លឹកគ្រៃ គឺជួយក្នុងការព្យាបាលបញ្ហាទូទៅទាក់ទងនឹងការរំលាយអាហារដូចជា ទល់លាមក, ពិបាករំលាយអាហារ, ក្រហាយទ្រូង, ហើមពោះ, ក្អួត និងឈឺចាប់រមួលក្នុងពោះ។ ដើម្បីទទួលបានលទ្ធផលល្អប្រសើរ ចូរព្យាយាមទទួលទានទឹកតែស្លឹកគ្រៃជាប្រចាំ។ ទោះជាយ៉ាងណាតែស្លឹកគ្រៃមិនសម្រាប់កុមារទទួលទានឡើយ។

២. គ្រប់គ្រងកម្រិតកូឡេស្តេរ៉ូល

ស្លឹកគ្រៃមានផ្ទុកលក្ខណៈសម្បត្តិប្រឆាំងនឹងបរិមាណកូឡេស្តេរ៉ូល ដោយកាត់បន្ថយការស្រូបយកអត្រានៃជាតិកូឡេស្តេរ៉ូលតាមរយៈពោះវៀន។ លើសពីនេះទៅទៀត ស្លឹកគ្រៃក៏ជួយក្នុងដំណើរការអុកស៊ីដង់នៃកូឡេស្តេរ៉ូលមិនល្អក្នុងចរន្តឈាមផងដែរ ដូច្នេះវានឹងកាត់បន្ថយហានិភ័យនៃបញ្ហាស្ទះសសៃឈាម។ អ្វីដែលសំខាន់នោះ គឺស្លឹកគ្រៃមានប្រសិទ្ធិភាពធ្វើឲ្យសម្ពាធឈាមស្ថិតក្នុងកម្រិតធម្មតាតាមរយៈសារធាតុប៉ូតាស្យូមខ្ពស់ដែលវាមានផ្ទុក។

៣. លក្ខណៈសម្បត្តិសម្អាត និងបន្សាបជាតិពុល

ការទទួលទានស្លឹកគ្រៃទៀងទាត់ជួយក្នុងការសម្អាត និងបន្សាបជាតិពុលចេញពីរាងកាយទាំងមូលតែម្ដង។ ស្លឹកគ្រៃជម្រុញការឈឺនោម ឬមានឥទ្ធិពលធ្វើឲ្យនោមញឹកដែលល្អក្នុងការបញ្ចេញជាតិពុលផ្សេងៗ, អាស៊ីតអ៊ុយរិក និងកូឡេស្តេរ៉ូលអាក្រក់ពីក្នុងចរន្តឈាម។ ហើយការនោមធម្មតា ក៏ជួយក្នុងការសម្អាតតម្រងនោមផងដែរ។ លក្ខណៈសម្បត្តិសម្អាត ឬលាងជម្រះនៃតែស្លឹកគ្រៃ ល្អប្រសើរបំផុតចំពោះការសម្អាតរាល់សរីរាង្គខាងក្នុង រួមបញ្ចូលទាំង តម្រងនោម, ផ្លោកនោម, ថ្លើម និងលំពែង។ វាដើរតួនាទីយ៉ាងសំខាន់មួយផងដែរក្នុងការបង្កើនចរន្តឈាមរត់ឲ្យមានលក្ខណៈកាន់តែប្រសើរឡើង។

៤.  ព្យាបាលជំងឺផ្ដាសាយ ឬគ្រុនផ្ដាសាយ

ស្លឹកគ្រៃមានលក្ខណៈសម្បត្តិ​ប្រឆាំងបាក់តេរី និងមេរោគផ្សិត ហេតុនេះវានឹងជួយឲ្យរាងកាយបន្សាំខ្លួនទប់ទល់ទៅនឹងអាការៈក្អក,​ ក្ដៅខ្លួន, ផ្ដាសាយធម្មតា ឬជំងឺគ្រុនផ្ដាសាយ។ លើសពីនេះទៅទៀត ស្លឹកគ្រៃ មានផ្ទុកសម្បូរទៅដោយវីតាមីន C ដូច្នេះវាក៏ជួយបង្កើនប្រព័ន្ធភាពស៊ាំឲ្យមានលក្ខណៈកាន់តែប្រសើរឡើង និងកាត់បន្ថយហានិភ័យនៃរោគឆ្លងផងដែរ។ ការទទួលទានតែស្លឹកគ្រៃមានឥទ្ធិពលជួយបំបែកស្លេស ក៏ដូចជាសំបោរដែលកើតឡើងនៅពេលមានជំងឺផ្ដាសាយទៀតផង។

៥. ប្រសិទ្ធិភាពប្រយុទ្ធប្រឆាំងនឹងជំងឺមហារីក

ស្លឹកគ្រៃមានផ្ទុកនូវសមាសធាតុមួយហៅថា citral stimulates apoptosis ដែលសម្លាប់កោសិកាមហារីកដោយមិនផ្ដល់ផលប៉ះពាល់ណាមួយលើកោសិកាសុខភាពល្អ។ មិនត្រឹមតែប៉ុណ្ណឹងទេ ស្លឹកគ្រៃ ក៏មានផ្ទុកនូវសារធាតុប្រឆាំងអុកស៊ីតកម្មដែលជួយក្នុងការកាត់បន្ថយហានិភ័យនៃជំងឺមហារីកផងដែរ​ តាមរយៈការសម្លាប់រ៉ាឌីកាល់សេរី។

៦. ព្យាបាលជំងឺរលាកសន្លាក់

លក្ខណៈសម្បត្តិប្រឆាំងនឹងការរលាក ហើយបំបាត់ការឈឺចាប់នៃស្លឹកគ្រៃ ធ្វើឲ្យវាក្លាយជាឱសថបែបធម្មជាតិដ៏ប្រសើរសម្រាប់អ្នកដែលជួបប្រទះបញ្ហាផ្សេងៗទាក់ទងជាមួយសន្លាក់ឆ្អឹង។ លក្ខណៈសម្បត្តិប្រឆាំងការរលាកនៃស្លឹកគ្រៃជួយក្នុងការកាត់បន្ថយសកម្មភាពនៃអង់ស៊ីមដែលបង្កការឈឺចាប់ និងរលាកក្នុងសន្លាក់៕