​ខ្ញុំ​ដឹង​ហើយ​ថា ប្រជាជន​ខ្មែរ​យើង​ទំនងជា​មិន​មាន​ច្រើន​ឡើយ​ដែល​ស្គាល់​ឧបករណ៍​អាំង​ថ្ងៃ​ដែល​អាច​ប្រើ​ក្នុង​ផ្ទះ​បាន ប៉ុន្តែ​យក​ល្អ​គួរតែ​ស្វែងយល់​អំពី​វា​ផង​ដើម្បី​ជា​ចំណេះដឹង​នៅ​ថ្ងៃក្រោយ​។ តាម​ការសិក្សា​ថ្មី​មួយ​បានឲ្យដឹងថា ឧបករណ៍​អាំង​ថ្ងៃ​ដែល​ប្រើ​ក្នុងផ្ទះ អាច​បង្កើត​ជា​កាំរស្មី​យូ​វី​ដែល​មាន​គ្រោះថ្នាក់​ដល់​ស្បែក​បាន​។ ឧបករណ៍​នេះ​ដែរ ច្រើន​តែ​ឃើញ​មាន​ក្នុង​ហាង​កែ​សម្ផស្ស​ធំៗ​ប៉ុណ្ណោះ​។

​យ៉ាងណាមិញ ការប្រើប្រាស់​ឧបករណ៍​មួយ​នេះ​ប្រហែល​ជា​ប្រឈម​ខ្ពស់​នឹង​ជំងឺ​មហារីក​ស្បែក​មួយ​ប្រភេទ​ឈ្មោះថា Melanoma ដែល​វា​ត្រូវ​បាន​គេ​ចាត់ទុកថា​ជា​ជំងឺ​មហារីក​ស្បែក​ដែល​មាន​ភាព​គ្រោះថ្នាក់​បំផុត​។ កាលពី​១០​ឆ្នាំមុន ជំងឺមហារីក​ប្រភេទ​នេះ​ត្រូវបាន​គេ​រកឃើញ​ថា មាន​ការកើនឡើង​យ៉ាងខ្លាំងបំផុត​។
​កាលពី​ឆ្នាំ ២០០៩ ភ្នាក់ងារ​ស្រាវជ្រាវ​មកពី​អង្គការ​សុខភាព​ពិភពលោក​វិញ​បាន​ចាត់​ចំណាត់ថ្នាក់​ឧបករណ៍​បង្កើត​កាំរស្មី​យូ​វី ជា ភ្នាក់ងារ​បង្ក​ជំងឺមហារីក​ដល់​មនុស្ស​ជាតិ​។ ប៉ុន្តែ ការប្រើ​ឧបករណ៍​អាំង​ថ្ងៃ​ក្នុងផ្ទះ នៅតែ​មាន​ភាព​ពេញនិយម​សម្រាប់​ស្ត្រី​វ័យក្មេង​ដដែល ជា​ពិសេស​តំបន់​លោកខាងលិច​តែម្តង​។

ការសិក្សា​មួយ​ដែល​បាន​ធ្វើឡើង​ដោយ​សាកលវិទ្យាល័យ Oslo បាន​រកឃើញ ស្ត្រី​អាយុ ៣០​ឆ្នាំ​ឡើង​ទៅ ដែល​ប្រើ​ឧបករណ៍​អាំង​ថ្ងៃ​ក្នុងផ្ទះ មានការ​ប្រឈម​នឹង​ជំងឺ​មហារីក​ស្បែក Melanoma រហូតដល់ ៣២​ភាគរយ ដែល​វា​ច្រើនជាង​អ្នក​ដែល​មិន​ប្រើ​សោះ​។ សម្រាប់​ស្ត្រី​ដែល​ប្រើ​ឧបករណ៍​នេះ​ដែរ តែ​អាយុ​ក្រោម ៣០​ឆ្នាំ​វិញ ជា​មធ្យម​រកឃើញ​ជំងឺមហារីក​ស្បែក Melanoma លឿន​ជាង ស្ត្រី​ដែល​មិន​ប្រើ​សោះ ពីរ​ឆ្នាំ​៕