ឧស្សាហ៍មានអារម្មណ៍ចង្អោរចង់ក្អួតនៅពេលព្រឹកមែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ក្រៅពីមានផ្ទៃពោះហើយនោះ ក៏នៅមានកត្តាមួយចំនួនដែលបង្កបញ្ហានេះឱ្យកើតមានឡើង! ថាតើមូលហេតុអ្វីខ្លះដែលអាចបណ្ដាលឱ្យមានអារម្មណ៍ចង់ក្អួតនៅពេលព្រឹក? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុទាំងនោះ ៖
១. ច្រាលទឹកអាស៊ីតក្រពះ
តើអ្នកបានទទួលទានអាហារខ្លាញ់ៗ ឬហឹរមុនពេលចូលគេងមែនទេ? នោះមិនចម្លែកឡើយប្រសិនបើមានអារម្មណ៍ចង្អោរចង់ក្អួតនៅពេលព្រឹកភ្ញាក់ពីគេងនោះ។ ភាគច្រើននៃអាការៈនេះបណ្ដាលមកពីបញ្ហាច្រាលទឹកអាស៊ីតក្រពះ។ ជាញឹកញយបញ្ហាច្រាលទឹកអាស៊ីតក្រពះច្រើនអមមកជាមួយនូវរោគសញ្ញាផ្សេងទៀតដូចជាឈឺពោះ ក្រហាយទ្រូង កើនទឹកមាត់ និងមានអារម្មណ៍ដូចដែកលោហៈក្នុងមាត់។
២. ជាតិស្ករក្នុងឈាមចុះទាប
ក្រៅពីច្រាលទឹកអាស៊ីតក្រពះ អាការៈចង្អោរចង់ក្អួតនៅពេលព្រឹកក៏អាចបណ្ដាលមកពីបញ្ហាជាតិស្ករក្នុងឈាមចុះទាបពេកផងដែរ។ ភាគច្រើនអាការៈចង្អោរចង់ក្អួតដោយសារជាតិស្ករក្នុងឈាមចុះទាប គឺអមមកជាមួយនូវរោគសញ្ញាផ្សេងទៀតដូចជាញ័រ ថប់បារម្ភ ភាំងៗ វិលមុខ បេះដូងលោតញាប់ បែកញើស និងឃ្លាន។
៣. គេងមិនគ្រប់
ភាគច្រើននៃពួកយើងសុទ្ធតែដឹងហើយថាការគេងបានស្កប់ពី ៧ ទៅ ៩ ម៉ោងក្នុងមួយយប់ចាំបាច់ខ្លាំងប៉ុណ្ណា។ ការគេងមិនគ្រប់ជះឥទ្ធិពលគួរឱ្យកត់សម្គាល់ចំពោះសុខភាពដដោយបង្កជាបញ្ហាផ្សេងៗរួមទាំងអាការៈចង្អោរចង់ក្អួត។ ទោះជាយ៉ាងណាបញ្ហាចង្អោរចង់ក្អួតដែលបណ្ដាលមកពីការគេងមិនគ្រប់តែងអមមកជាមួយនូវអាការៈអស់កម្លាំងនិងងងុយគេងខ្លាំង។
៤. ឥទ្ធិពលនៃគ្រឿងស្រវឹង
អាការៈធីងធោងចង្អោរចង់ក្អួតនៅពេលព្រឹកងាយនឹងកើតឡើងណាស់ក្រោយពេលអ្នកទទួលទានគ្រឿងស្រវឹងច្រើនពីយប់។ ការទទួលទានគ្រឿងស្រវឹងច្រើនពេកអាចបណ្ដាលឱ្យរលាកស្រទាប់ក្រពះផ្នែកខាងក្នុង ហើយបង្កើនការផលិតជាតិអាស៊ីត hydrochloric ដែលបណ្ដាលឱ្យចង្អោរចង់ក្អួត។
៥. កង្វះជាតិទឹកក្នុងរាងកាយ
កង្វះជាតិទឹកក្នុងរាងកាយអាចបណ្ដាលឱ្យមនុស្សមួយចំនួនមានអារម្មណ៍ចង្អោរចង់ក្អួត។ អាការៈផ្សេងទៀតនៃបញ្ហាខ្វះជាតិទឹកក្នុងរាងកាយរួមបញ្ចូលទាំងវិលមុខ ស្បែកស្ងួតខ្លាំង ទឹកនោមពណ៌ដិត ឬនោមតិចពេក និងអស់កម្លាំង។ បញ្ហាខ្សោះជាតិទឹកក្នុងរាងកាយអាចកើតមានឡើងនៅពេលព្រឹកក្រោយពេលមនុស្សម្នាក់មិនបានទទួលទានទឹកច្រើនម៉ោង។ ហើយអ្នកដែលទទួលទានគ្រឿងស្រវឹង ឬភេសជ្ជៈមានផ្ទុកជាតិកាហ្វេអ៊ីនមុនពេលចូលគេ ក៏ងាយនឹងជួបប្រទះបញ្ហាខ្សោះជាតិទឹកក្នុងរាងកាយនៅពេលព្រឹកដែរ។
៦. ឃ្លានអាហារ
អាការៈចង្អោរចង់ក្អួតអាចកើតមានឡើង ប្រសិនបើពេលចុងក្រោយបង្អស់ គឺនៅរយៈពេល ១២ ម៉ោងមុនពេលអ្នកក្រោកព្រឹក ឬច្រើនជាងនេះ។ ដូចបានលើកឡើងក្នុងចំណុចទី ២ គឺនៅពេលកម្រិតនៃជាតិស្ករ ឬគ្លុយកូសទាបក្នុងឈាមអាចបណ្ដាលឱ្យអ្នកមានអារម្មណ៍វិលមុខ ខ្សោយកម្លាំង ឬចង្អោរចង់ក្អួត។ ការរំលងមិនទទួលទានអាហារពេលព្រឹក ជាពិសេសប្រសិនបើអ្នកតែងមានទម្លាប់ទទួលទាននឹងអាចបណ្ដាលឱ្យអាការៈតែអាក្រក់ឡើង។
៧. ថប់បារម្ភ
អាការៈចង្អោរចង់ក្អួតនៅពេលព្រឹកក៏អាចមានទំនាក់ទំនងផ្សារភ្ជាប់ជាមួយបញ្ហាស្ត្រេស និងថប់បារម្ភផងដែរ។ ករណីខ្លះអាចបណ្ដាលមកពីភាពស្ត្រេស ឬថប់បារម្ភរ៉ាំរ៉ៃ។
៨. ការពុលអាហារ
នៅពេលយើងទទួលទានអាហារ ឬភេសជ្ជៈអ្វីមួយដែលកខ្វក់មិនស្អាត រាងកាយនឹងចាប់ផ្ដើមកម្ចាត់វាចេញភ្លាម។ ប្រសិនបើអ្នកពុលអាហារ អ្នកអាចនឹងជួយប្រទះអាការៈចង្អោរចង់ក្អួត ក្អួតតែម្ដង ឬរាគ ឈឺពោះ និងរមួលក្នុងពោះ។ ប្រសិនបើអ្នកជួបប្រទះអាការៈចង្អោរចង់ក្អួតនៅពេលព្រឹក វាអាចបណ្ដាលមកពីអ្វីមួយដែលអ្នកបានទទួលទានពីយប់ហើយ។
ប្រយ័ត្ន! ប្រសិនបើអ្នកជឿថាអាការៈចង្អោរចង់ក្អួតរបស់អ្នកមិនមែនបណ្ដាលមកពីមូលហេតុណាមួយខាងលើទេនោះ ចូរកុំស្ទាក់ស្ទើនឹងទៅជួបពិគ្រោះជាមួយគ្រូពេទ្យ៕