កាលពីថ្ងៃចន្ទម្សិលមិញនេះ អង់គ្លេសបានរាយការណ៍ករណីកូវីដ-១៩ថ្មី ប្រចាំថ្ងៃខ្ពស់បំផុតមិនធ្លាប់មាន ចំនួន ៤១.៣៨៥ នាក់ និង អ្នកស្លាប់ថ្មីចំនួន ៣៥៧ នាក់ ខណៈវីរុសកូរ៉ូណាបំលែងខ្លួនថ្មី ជំរុញអត្រាឆ្លងយ៉ាងរហ័ស។
នាយកផ្នែកវេជ្ជសាស្ត្រនៃសុខភាពសាធារណៈអង់គ្លេសបាននិយាយថា ”ការឆ្លងវីរុសកម្រិតខ្ពស់បែបនេះ គឺជាការព្រួយបារម្ភខ្លាំងស្របពេល ដែលមន្ទីរពេទ្យរបស់យើងកំពុងងាយរងគ្រោះបំផុត”។
នាយករដ្ឋមន្ត្រីបូរីស ចនសុន និងទីប្រឹក្សាផ្នែកវិទ្យាសាស្ត្ររបស់លោកបាននិយាយថា វីរុសកូរ៉ូណាថ្មី ដែលអាចចម្លងលឿនជាងមុន ៧០ភាគរយកំពុងរាលដាលយ៉ាងឆាប់រហ័សនៅក្នុងប្រទេសអង់គ្លេស ដែលជំរុញឱ្យមានវិធានការរឹតត្បិតសម្រាប់ទីក្រុងឡុងដ៍ និងតំបន់ភាគអាគ្នេយ៍ ស្របពេលដែលផែនការ ដើម្បីបន្ធូរបន្ថយនាបុណ្យគ្រីសម៉ាសនៅទូទាំងប្រទេសត្រូវបានកាត់បន្ថយយ៉ាងខ្លាំង៕