ទម្លាប់ប្រចាំថ្ងៃមួយចំនួនអាចជះផលប៉ះពាល់គួរឱ្យកត់សម្គាល់ចំពោះសុខភាពស្បែកប្រែជាឆាប់ចាស់ជ្រីវជ្រួញ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើទម្លាប់ទាំងនោះមានអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលអ្នកគួរចៀសវាងដើម្បីទប់ស្កាត់បញ្ហាស្បែកឆាប់ចាស់ជ្រីវជ្រួញ ៖
១. ការទទួលទានអាហារ និងសាច់កែច្នៃច្រើនពេក
សាច់កែច្នៃមានផ្ទុកសម្បូរទៅដោយជាតិប្រៃ ឬអំបិលដែលអាចធ្វើឱ្យអ្នកមានអាការៈហើម។ សាច់ប្រភេទនេះក៏ជាប្រភពនៃសារធាតុ nitrites ដែលបំផ្លាញកូឡាជែន និងភាពបត់បែនក្នុងស្បែកផងដែរ។ ការទទួលទានសាច់កែច្នៃក៏អាចធ្វើឱ្យស្បែកឆាប់ចាស់ជាងអាយុផងដែរ ដោយវាគ្មានផ្ទុកសារធាតុចិញ្ចឹមល្អៗដើម្បីទ្រង់ទ្រង់សុខភាពស្បែករក្សាភាពក្មេងជាងវ័យ។ ដូច្នេះដើម្បីជៀសផុតពីគ្រោះថ្នាក់ កុំទទួលទានសាច់កែច្នៃច្រើនពេក និងមិនត្រូវទទួលទានរាល់ថ្ងៃឡើយ។ អ្នកក៏គួរកម្រិនការទទួលទានសាច់ក្រហមដូចគ្នា! នោះក៏ព្រោះតែសាច់ក្រហមមានផ្ទុកជាតិ carnitine ខ្ពស់ដែលអាចធ្វើឱ្យជញ្ជាំងសសៃឈាមឡើងរឹងបង្កបញ្ហានៃភាពចាស់ជាងវ័យ។
២. ការទទួលទានគ្រឿងស្រវឹងលើសកម្រិត
ការទទួលទានគ្រឿងស្រវឹងច្រើននឹងបង្កបញ្ហាខ្សោះជាតិទឹកក្នុងរាងកាយ។ ជាលទ្ធផលស្បែកត្រូវទទួលរងផលប៉ះពាល់ដោយប្រែជាស្ងួតគ្មានសំណើម ឆាប់ជ្រីវជ្រួញ។ គ្រឿងស្រវឹងក៏ធ្វើអោយសសៃឈាមរីកធំបណ្ដាលអោយស្បែកប្រែជាស្រអាប់។
៣. ការទទួលទានអាហារ ឬភេសជ្ជៈមានជាតិស្ករខ្ពស់
ស្ករ គឺជាប្រភេទនៃអាហារដែលធ្វើអោយស្បែកឆាប់ចាស់ជាងវ័យលឿនបំផុត ហើយវាក៏បង្កផលប៉ះពាល់ដល់ប្រព័ន្ធភាពស៊ាំរាងកាយផងដែរ។ ស្ករក៏ពន្លឿនការលេចឡើងនៃស្នាមជ្រីវជ្រួញ និងធ្វើអោយស្បែកស្រអាប់គ្មានពន្លឺដោយសារវាបំផ្លាញកូឡាជែននិងភាពបត់បែននៃស្បែក។ ព្យាយាមទទួលទានផ្លែឈើជំនួសការទទួលស្ករ ឬអាហារផ្អែមច្រើនហួស។
៤. ការទំពារស្ករកៅស៊ូ
អ្នកចូលចិត្តទំពារស្ករកៅស៊ូភាគច្រើនតែងមានស្នាមជ្រីវជ្រួញនៅជុំវិញមាត់ដែលអ្នកជំនាញជឿថាមកពីការទំពារស្ករកៅស៊ូ។ នៅពេលទំពារ គឺយើងអាចនឹងប្រើប្រាស់សាច់ដុំជុំវិញមាត់លើសកម្រិតដែលបង្កឱ្យស្នាមខ្សែរនិងស្នាមជ្រីវជ្រួញលេចឡើង។
៥. ការរត់
នៅពេលធ្វើលំហាត់ប្រាណជាតិខ្លាញ់ក្រោមស្រទាប់នៃស្បែកត្រូវបានដុតបំផ្លាញ។ ការបាត់បង់ជាលិកាខ្លាញ់អាចបណ្ដាលឱ្យស្នាមជ្រីវជ្រួញកាន់តែជ្រៅងាយនឹងមើលឃើញ ជាពិសេសប្រសិនបើមិនបានប្រើប្រាស់ឡេលាបការពារកម្ដៅថ្ងៃ។
៦. ការសម្លឹងមើលទូរស័ព្ទ
ការប្រើប្រាស់ទូរស័ព្ទក៏អាចបណ្ដាលឱ្យអ្នកមើលទៅចាស់ជាងវ័យផងដែរ។ អ្នកជំនាញខាងវេជ្ជសាស្ត្របានឱ្យដឹងថាការសម្លឹងមើលទូរស័ព្ទជាប់រហូតអាចបណ្តាលឱ្យមានស្នាមខ្សែផ្នត់ៗកាន់តែច្រើននៅលើក។
៧. ការប្រើប្រាស់ទុយោបឺត
ការទទួលទានកាហ្វេ ឬតែតាមរយៈបំពង់បឺត ឬទុយោរពិតជាអាចជួយទប់ស្កាត់ស្នាមប្រឡាក់ជាប់ធ្មេញ ប៉ុន្តែវាបង្កស្នាមខ្សែជុំវិញបបូរមាត់។ ដូច្នេះសម្រាប់អ្នកដែលងាយលេចឡើងនូវស្នាមជ្រីវជ្រួញបបូរមាត់ គួរតែចៀសប្រើប្រាស់ទុយោរបឺតញឹកញាប់។
៨. គេងផ្អៀង
ការគេងបែរទៅម្ខាង ឬផ្អៀងនិងការគេងផ្កាប់មុខជាកត្តាចម្បងបំផុតមួយនៃបញ្ហាលេចឡើងនូវស្នាមខ្សែលើស្បែក ព្រមទាំងភាពជ្រីវជ្រួញខណៈដែលផ្ទៃមុខអាចត្រដុសប៉ះនឹងខ្នើយជាប់ជានិច្ច។